តើចិនប្រើបច្ចេកវិទ្យាអ្វីខ្លះដើម្បីសង់រោងចក្រថាមពលខ្យល់លើសមុទ្រជ្រៅបំផុតលើលោក?

Sommana Yan
17 ខែឧសភា 2026
ព័ត៌មានសំណង់
214 មើល

ក្រុមហ៊ុន Fujian Yongfu Power Engineering បានទទួលជោគជ័យក្នុងការសាងសង់រោងចក្រថាមពលដើរខ្យល់នៅលើសមុទ្រដែលជ្រៅបំផុតមួយក្នុងពិភពលោក ដោយប្រើប្រាស់បច្ចេកវិទ្យាសំខាន់ ២ របស់ក្រុមហ៊ុន Bentley Systems។

គម្រោងនេះត្រូវប្រឈមនឹងការលំបាកក្នុងការសាងសង់ទួរប៊ីនចំនួន ៦២ ក្នុងទឹកដែលមានជម្រៅរហូតដល់ ៤៥ ម៉ែត្រ។ ក្រុមវិស្វករត្រូវជម្នះលើបញ្ហាគ្រោះធម្មជាតិ និងបរិស្ថានយ៉ាងខ្លាំងៗ ពិសេសព្យុះទីហ្វុង ដីបាតសមុទ្រមិនមានស្ថេរភាព និងគ្រោះរញ្ជួយដីកម្រិតធ្ងន់។

ជាមួយនឹងបញ្ហាទាំងនេះ វិធីសាស្ត្រសាងសង់ធម្មតាគឺមិនប្រសិទ្ធភាពគ្រប់គ្រាន់ឡើយ ដែលធ្វើឱ្យមានការចំណាយខ្ពស់ ខណៈគំរូប្លង់ដែលមិនស៊ីសង្វាក់គ្នាក៏នឹងធ្វើគ្រឹះទួរប៊ីនមានបញ្ហានៅបាតសមុទ្រ។

ដើម្បីដោះស្រាយបញ្ហានេះ ក្រុមហ៊ុន Fujian Yongfu បានប្រើប្រាស់កម្មវិធី PLAXIS និង SACS Wind Turbine របស់ Bentley។ កម្មវិធីទាំងនេះបានបង្កើតប្រព័ន្ធឌីជីថលរួមតែមួយ ដែលជួយឱ្យវិស្វកររចនាប្លង់សំណង់ និងវិភាគផលប៉ះពាល់ដីក្នុងពេលដំណាលគ្នា។

ការរួមបញ្ចូលគ្នាយ៉ាងរលូននេះ ក៏បានជួយឱ្យក្រុមការងារធ្វើឱ្យប្រសើរឡើងនូវគ្រោងបង្គោលthree-pile suction conduit frame ដែលជាការរចនាមានស្ថិរភាពជាងមុន និងងាយស្រួលក្នុងការដំឡើងជាងគ្រឹះបែបធម្មតា ។

ការប្រើប្រាស់កម្មវិធីទាំងនេះនេះបានជួយកែលម្អប្លង់ឱ្យប្រសើរជាងមុន ដែលបានកាត់បន្ថយចំណាយគម្រោងចំនួន ៣០% ដោយសន្សំថវិកាបានជាង ៤០០ លានយន់។

ក្រៅពីអត្ថប្រយោជន៍ផ្នែកហិរញ្ញវត្ថុ កម្មវិធីទាំងនេះក៏បានជួយពន្លឿនការសាងសង់ និងកាត់បន្ថយផលប៉ះពាល់ដល់បរិស្ថានរបស់គម្រោងផងដែរ។

នៅពេលដែលដំណើរការពេញលេញ ស្ថានីយថាមពលខ្យល់នេះត្រូវបានរំពឹងថានឹងលុបបំបាត់ការប្រើប្រាស់ធ្យូងថ្មចំនួន ៥៣៥,០០០ តោន និងកាត់បន្ថយការបញ្ចេញឧស្ម័នកាបូន ១.៥ លានតោនក្នុងមួយឆ្នាំ ដែលនេះជាជោគជ័យដ៏សំខាន់សម្រាប់ទាំងការច្នៃប្រឌិតផ្នែកវិស្វកម្ម និងនិរន្តរភាពសកល។