ក្រសួងរៀបចំដែនដី បង្ហាញសមិទ្ធផលការងារតាមយុទ្ធសាស្ត្រសមរភូមិទាំងប្រាំពីរ ដើម្បីទទួលបានការគាំទ្រពីរដ្ឋសភា

Proeksa Meas
7 ខែវិច្ឆិកា 2026
ព័ត៌មានអចលនទ្រព្យ
49 មើល

ការប្តេជ្ញាចិត្តខ្ពស់ក្នុងការលើកកម្ពស់សោភ័ណភាពទីក្រុង សំណង់ និងជីវភាពរស់នៅប្រកបដោយចីរភាពឆ្ពោះទៅចក្ខុវិស័យឆ្នាំ២០៥០

ក្នុងកិច្ចប្រជុំអន្តរគណៈកម្មការរវាងរដ្ឋសភា និងក្រសួងរៀបចំដែនដី នគរូបនីយកម្ម និងសំណង់ ដែលប្រព្រឹត្តទៅកាលពីថ្ងៃទី២៧ ខែតុលា ឆ្នាំ២០២៦ ក្រសួងបានបង្ហាញពីវឌ្ឍនភាពនៃការអនុវត្តការងារតាមផែនទីឯកភាព និងយុទ្ធសាស្ត្រសមរភូមិទាំងប្រាំពីរយ៉ាងម៉ឺងម៉ាត់។ កិច្ចប្រជុំដ៏មានសារៈសំខាន់នេះ មានការចូលរួមពីតំណាងគណៈកម្មការជំនាញនៃរដ្ឋសភា និងថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ដើម្បីពិនិត្យមើលលើការអនុវត្តគោលនយោបាយបម្រើឧត្តមប្រយោជន៍ជាតិ និងប្រជាជន ស្របតាមការវិវត្តនៃរចនាសម្ព័ន្ធសង្គម-សេដ្ឋកិច្ច។

យុទ្ធសាស្ត្រសមរភូមិទាំងប្រាំពីររបស់ក្រសួង ត្រូវបានដាក់ចេញដើម្បីធានានិរន្តរភាព និងការអភិវឌ្ឍប្រកបដោយបរិយាបន្ន ដោយផ្តោតលើការរៀបចំផ្ទះសំបែងឱ្យមានរបៀបរៀបរយ ការពង្រឹងរដ្ឋបាលសាធារណៈទំនើប និងការកសាងមូលធនមនុស្ស។ ក្រសួងក៏បានដាក់ចេញនូវវិធានការយ៉ាងសកម្មក្នុងការបង្កើតបរិយាកាសគ្មានវិវាទ តាមរយៈការចុះបញ្ជីដីធ្លី ការដោះស្រាយវិវាទដីធ្លី ការរក្សាអាយុជីវិតបឹងទន្លេសាប និងតំបន់រមណីយដ្ឋានសៀមរាប-អង្គរ ក៏ដូចជាការដោះស្រាយបញ្ហាចម្រូងចម្រាសតាមបុរីនានា។ ទន្ទឹមនឹងនេះ ការងាររៀបចំដែនដី និងនគរូបនីយកម្ម ត្រូវបានយកចិត្តទុកដាក់ខ្ពស់តាមរយៈការកំណត់តំបន់អភិរក្ស កសិកម្ម ពាណិជ្ជកម្ម និងការកសាងទីប្រជុំជនជាបុរីជនបទ និងភូមិឋានក្សេមក្សាន្ត។

បន្ថែមពីលើនេះ ក្រសួងបានជំរុញយ៉ាងខ្លាំងក្លាលើកិច្ចការលំនៅឋាន និងការងារសម្បទានដើម្បីសង្គម និងសេដ្ឋកិច្ច ដូចជាការអភិវឌ្ឍលំនៅឋានតម្លៃសមរម្យ ការដោះស្រាយអគារទ្រុឌទ្រោម និងការអនុវត្តគម្រោងសម្បទានដីសង្គមកិច្ចជូនប្រជាពលរដ្ឋក្រីក្រ អតីតកងកម្លាំងប្រដាប់អាវុធ និងកងការពារព្រំដែន។ ក្នុងវិស័យសំណង់ និងស្ថាបត្យកម្មខ្មែរនាសហសម័យ ការយកចិត្តទុកដាក់ត្រូវបានផ្តល់ទៅលើសុវត្ថិភាព គុណភាព សោភ័ណភាព និងការលើកកម្ពស់អត្តសញ្ញាណជាតិ។ លើសពីនេះ ក្រសួងក៏បានពង្រឹងឧស្សាហកម្មពាក់ព័ន្ធ រួមមានឧស្សាហកម្មសំណង់ គ្រឿងបង្គុំ និងអចលនទ្រព្យ ព្រមទាំងការជំរុញការងារកែទម្រង់វិមជ្ឈការ និងវិសហមជ្ឈការនៅថ្នាក់ក្រោមជាតិផងដែរ។

កិច្ចខិតខំប្រឹងប្រែងដ៏មមាញឹករបស់ក្រសួងរៀបចំដែនដី នគរូបនីយកម្ម និងសំណង់ ក្រោមការដឹកនាំដ៏មុតស្រួច មិនត្រឹមតែជួយកសាងទំនុកចិត្តដល់ប្រជាពលរដ្ឋប៉ុណ្ណោះទេ ប៉ុន្តែថែមទាំងជាគ្រឹះដ៏រឹងមាំក្នុងការប្រែក្លាយសង្គមជាតិឱ្យទៅជាសង្គមទំនើប ស៊ីវិល័យ និងមានភាពធន់អមដោយចីរភាព ស្របតាមចក្ខុវិស័យកម្ពុជាឆ្នាំ២០៥០ ក្នុងការបោះជំហានឆ្ពោះទៅរកការជាប្រទេសមានចំណូលខ្ពស់៕ (អានបន្ថែម)