គណៈកម្មាធិការជាតិរៀបចំដែនដី និងនគរូបនីយកម្ម ប្រជុំពិនិត្យ និងសម្រេចលើសេចក្តីព្រាងផែនការរៀបចំដែនដីខេត្ត និងប្លង់គោលប្រើប្រាស់ដីថ្នាក់ក្រុង-ស្រុក

Proeksa Meas
17 ខែតុលា 2026
ព័ត៌មានអចលនទ្រព្យ
20 មើល

ឧបនាយករដ្ឋមន្ត្រី សាយ សំអាល និងរដ្ឋមន្ត្រី ប៉េង ពោធិ៍នា ដឹកនាំកិច្ចប្រជុំត្រួតពិនិត្យផែនការរៀបចំដែនដីខេត្តចំនួន ៥ ព្រមទាំងប្លង់គោលប្រើប្រាស់ដីក្រុង-ស្រុកចំនួន ៧ ដើម្បីស្នើសុំការយល់ព្រមពីរាជរដ្ឋាភិបាល

រាជធានីភ្នំពេញ៖ ការរៀបចំដែនដី និងការកំណត់ប្លង់គោលប្រើប្រាស់ដីធ្លីប្រកបដោយតម្លាភាព សុក្រឹតភាព និងចក្ខុវិស័យវែងឆ្ងាយ បានប្រែជាសសរស្ដម្ភយ៉ាងសំខាន់ ក្នុងការរុញច្រានការអភិវឌ្ឍសេដ្ឋកិច្ច-សង្គម ការពារបរិស្ថាន និងរៀបចំហេដ្ឋារចនាសម្ព័ន្ធរូបវន្តនៅកម្ពុជាឱ្យមានរបៀបរៀបរយ។ តាមរយៈកិច្ចប្រជុំកាលពីថ្ងៃទី២ ខែតុលា ឆ្នាំ២០២៦ នៅទីស្តីការក្រសួងរៀបចំដែនដី នគរូបនីយកម្ម និងសំណង់ ឯកឧត្តម សាយ សំអាល ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ ដោយមានការចូលរួមពី ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានគណៈកម្មាធិការ បានដឹកនាំកិច្ចប្រជុំគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ។ កិច្ចប្រជុំនេះ រៀបចំឡើងដើម្បីពិនិត្យ ពិភាក្សា និងសម្រេចលើប្លង់គោលប្រើប្រាស់ដីថ្នាក់ក្រុង និងស្រុក ព្រមទាំងពិនិត្យដើម្បីស្នើសុំការយល់ព្រមពីរាជរដ្ឋាភិបាលលើសេចក្តីព្រាងផែនការរៀបចំដែនដីថ្នាក់ខេត្ត។

នៅក្នុងអង្គប្រជុំ គណៈកម្មាធិការរៀបចំដែនដី និងនគរូបនីយកម្មថ្នាក់ជាតិ បានពិនិត្យ ពិភាក្សា និងត្រៀមអនុម័តលើសេចក្តីព្រាងផែនការរៀបចំដែនដីខេត្តចំនួន ៥ រួមមាន ខេត្តស្វាយរៀង ខេត្តស្ទឹងត្រែង ខេត្តកំពង់ចាម ខេត្តកំពត និងខេត្តបន្ទាយមានជ័យ។ ជាមួយគ្នានេះ គណៈកម្មាធិការក៏បានពិនិត្យលើសេចក្តីព្រាងប្លង់គោលប្រើប្រាស់ដីថ្នាក់ក្រុងចំនួន ៤ រួមមាន ក្រុងអរិយក្សត្រ ក្រុងកំពត ក្រុងប៉ោយប៉ែត និងក្រុងសិរីសោភ័ណ ព្រមទាំងសេចក្តីព្រាងប្លង់គោលប្រើប្រាស់ដីថ្នាក់ស្រុកចំនួន ៣ ទៀត រួមមាន ស្រុកឈូក ស្រុកអូរយ៉ាដាវ និងស្រុកកែវសីមា។

ការកំណត់ផែនការរៀបចំដែនដី និងប្លង់គោលប្រើប្រាស់ដីធ្លីនៅតាមបណ្តាខេត្ត ក្រុង និងស្រុកទាំងនេះ គឺជាជំហានយុទ្ធសាស្ត្រក្នុងការបែងចែកតំបន់អភិវឌ្ឍន៍សេដ្ឋកិច្ច តំបន់ពាណិជ្ជកម្ម តំបន់ឧស្សាហកម្ម តំបន់កសិកម្ម និងតំបន់អភិរក្សឱ្យបានច្បាស់លាស់។ ការសម្រេចចិត្តនេះ មិនត្រឹមតែជួយទប់ស្កាត់ការប្រើប្រាស់ដីធ្លីខុសគោលដៅ និងកាត់បន្ថយទំនាស់ដីធ្លីប៉ុណ្ណោះទេ ប៉ុន្តែថែមទាំងសម្រួលដល់ការវិនិយោគលើហេដ្ឋារចនាសម្ព័ន្ធសាធារណៈ និងការធ្វើនគរូបនីយកម្មប្រកបដោយចីរភាព។

សូមជម្រាបជូនថា កិច្ចប្រជុំពិនិត្យ និងសម្រេចលើសេចក្តីព្រាងផែនការរៀបចំដែនដីថ្នាក់ខេត្ត និងប្លង់គោលប្រើប្រាស់ដីថ្នាក់ក្រុង-ស្រុក ដោយគណៈកម្មាធិការជាតិរៀបចំដែនដី និងនគរូបនីយកម្ម គឺជាសក្ខីភាពនៃការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការគ្រប់គ្រងដែនដីប្រកបដោយតម្លាភាព និងប្រសិទ្ធភាព។ ការរៀបចំផែនការរៀបចំដែនដីឱ្យមានភាពច្បាស់លាស់ និងរៀបរយ នឹងក្លាយជាគ្រឹះយ៉ាងរឹងមាំក្នុងការជំរុញកំណើនសេដ្ឋកិច្ចជាតិ លើកកម្ពស់ជីវភាពរស់នៅរបស់ប្រជាពលរដ្ឋ និងធានាការអភិវឌ្ឍប្រកបដោយចីរភាពនៅគ្រប់តំបន់នៃព្រះរាជាណាចក្រកម្ពុជា។ (អានបន្ថែម)