កម្ពុជាពង្រឹងសមត្ថភាពអភិវឌ្ឍន៍លំនៅឋាន និងនគរូបនីយកម្មប្រកបដោយចីរភាព តាមរយៈវគ្គបណ្តុះបណ្តាលថ្នាក់តំបន់នៅសាធារណៈរដ្ឋកូរ៉េ

Proeksa Meas
2 ខែកញ្ញា 2026
ព័ត៌មានអចលនទ្រព្យ
13 មើល

ក្រុមការងារក្រសួងរៀបចំដែនដីចូលរួមសិក្សាពីវិធីសាស្ត្រ «Housing at the Centre Housing at the Centre Approach for Urban Resilience in Asian Cities » ដើម្បីបង្កើនភាពធន់នៃទីក្រុងក្នុងតំបន់អាស៊ី ទប់ទល់នឹងការប្រែប្រួលអាកាសធាតុ

ខេត្តហ្គាំងវ៉ុន៖ ការអភិវឌ្ឍតំបន់ប្រជុំជនប្រកបដោយចីរភាព និងការត្រៀមលក្ខណៈទប់ទល់នឹងការប្រែប្រួលអាកាសធាតុ បានក្លាយជាអាទិភាពចម្បងមួយសម្រាប់បណ្តាប្រទេសក្នុងតំបន់អាស៊ី នៅក្នុងបរិបទដែលការរីកចម្រើនផ្នែកនគរូបនីយកម្មកំពុងកើនឡើងយ៉ាងរហ័ស។ នៅក្នុងបរិបទនេះ ក្រុមការងារនៃអគ្គនាយកដ្ឋានលំនៅឋាន នៃក្រសួងរៀបចំដែនដី នគរូបនីយកម្ម និងសំណង់ បានចូលរួមក្នុងវគ្គបណ្តុះបណ្តាលថ្នាក់តំបន់ដ៏សំខាន់មួយ ស្តីពី «Housing at the Centre Approach for Urban Resilience in Asian Cities» ដែលត្រូវបានផ្សព្វផ្សាយកាលពីថ្ងៃទី២៧ ខែសីហា ឆ្នាំ២០២៦ កន្លងទៅ។ វគ្គបណ្តុះបណ្តាលនេះត្រូវបានរៀបចំឡើងនៅខេត្តហ្គាំងវ៉ុន សាធារណៈរដ្ឋកូរ៉េ ដោយមានការសហការរវាងមជ្ឈមណ្ឌល International Urban Training Center ហៅកាត់ថា IUTC អង្គការ UN-Habitat និងអាជ្ញាធរខេត្តហ្គាំងវ៉ុន។

វគ្គបណ្តុះបណ្តាលនេះផ្តោតសំខាន់លើការផ្លាស់ប្តូរបទពិសោធន៍ជាក់ស្តែង ការពង្រឹងសមត្ថភាពមន្ត្រីបច្ចេកទេស និងការសិក្សាជ្រៅជ្រះអំពីវិធីសាស្ត្រអភិវឌ្ឍន៍លំនៅឋានដោយយកប្រជាជន និងលំនៅឋានជាមជ្ឈមណ្ឌល ហៅថា Housing at the Centre។ វិធីសាស្ត្រនេះមានគោលដៅបង្កើនភាពធន់នៃតំបន់ប្រជុំជន និងទីក្រុងក្នុងបណ្តាប្រទេសនៅអាស៊ី ដើម្បីឆ្លើយតបទៅនឹងបញ្ហាដង់ស៊ីតេនៃការរីកចម្រើនទីក្រុងយ៉ាងរហ័ស និងផលប៉ះពាល់នៃការប្រែប្រួលអាកាសធាតុ។ ការរៀបចំគោលនយោបាយលំនៅឋានដែលតភ្ជាប់ជាមួយការរៀបចំដែនដី និងការយល់ដឹងពីសិទ្ធិរស់នៅរបស់ប្រជាពលរដ្ឋ ត្រូវបានមើលឃើញថាជាគ្រឹះយ៉ាងរឹងមាំក្នុងការកាត់បន្ថយហានិភ័យគ្រោះធម្មជាតិ និងការលើកកម្ពស់គុណភាពជីវិតក្នុងទីក្រុង។

ការចូលរួមរបស់ប្រតិភូកម្ពុជានៅក្នុងកម្មវិធីនេះ ស្តែងឱ្យឃើញពីការប្តេជ្ញាចិត្តរបស់ក្រសួងរៀបចំដែនដី នគរូបនីយកម្ម និងសំណង់ ក្នុងការនាំយកចំណេះដឹង និងបទពិសោធន៍អន្តរជាតិមកអនុវត្តក្នុងបរិបទកម្ពុជា។ ការយល់ដឹងពីវិធីសាស្ត្រ Housing at the Centre នឹងជួយឱ្យកម្ពុជាអាចរៀបចំផែនការរៀបចំដែនដី និងការអភិវឌ្ឍលំនៅឋានសមរម្យ និងមានតម្លៃសមរម្យសម្រាប់ប្រជាពលរដ្ឋ ជាពិសេសក្រុមប្រឈម ព្រមទាំងបង្កើនសមត្ថភាពទប់ទល់នឹងការលិចលង់ កំដៅខ្លាំង និងវិបត្តិអាកាសធាតុផ្សេងៗនៅក្នុងតំបន់ប្រជុំជនដែលកំពុងរីកចម្រើនយ៉ាងសកម្ម។

សូមជម្រាបថា ការពង្រឹងសមត្ថភាពមន្ត្រីកម្ពុជាតាមរយៈវគ្គបណ្តុះបណ្តាលនៅសាធារណៈរដ្ឋកូរ៉េនេះ គឺជាជំហានយុទ្ធសាស្ត្រដ៏សំខាន់ក្នុងការរៀបចំទីក្រុងកម្ពុជាឱ្យមានភាពធន់ និងចីរភាពនាអនាគត។ ការដាក់បញ្ចូលប្រជាជន និងលំនៅឋាននៅចំកណ្តាលនៃផែនការអភិវឌ្ឍន៍នគរូបនីយកម្ម មិនត្រឹមតែជួយការពារប្រជាពលរដ្ឋពីបម្រែបម្រួលអាកាសធាតុប៉ុណ្ណោះទេ ប៉ុន្តែថែមទាំងជាកាតាលីករជំរុញឱ្យមានការអភិវឌ្ឍសេដ្ឋកិច្ច-សង្គមប្រកបដោយបរិយាបន្ន និងភាពធន់មាំខ្ពស់។ (អានបន្ថែម)