ការចែកប័ណ្ណកម្មសិទ្ធដីធ្លីសរុបនៅកម្ពុជាបានជិត៩ លានបណ្ណ គ្រោងបញ្ចប់នៅឆ្នាំ២០២៧

Proeksa Meas
5 ខែសីហា 2026
ព័ត៌មានសំណង់
19 មើល

សម្តេចតេជោ ហ៊ុន ម៉ាណែត នាយករដ្ឋមន្ត្រី អញ្ជើញជាអធិបតីភាពក្នុងការចែកចាយវិញ្ញាបនបត្រសម្គាល់ម្ចាស់កម្មសិទ្ធិជាង ២៣,០០០ សន្លឹក នៅខេត្តកណ្តាល ខណៈដែលប័ណ្ណកម្មសិទ្ធិសរុបដែលបានចែកចាយឈានជិត ៩ លានសន្លឹកទូទាំងប្រទេស

គិតមកដល់ពេលបច្ចុប្បន្ននេះ ការចែកវិញ្ញាបនបត្រសម្គាល់ ម្ចាស់អចលនវត្ថុដីធ្លីនៅកម្ពុជា បានសរុបជិត ៩ លានបណ្ណ ស្មើនឹង ៨៦% នៃក្បាលដីដែលបានបិទផ្សាយរួច ដោយគ្រោងនឹង បញ្ចប់នៅឆ្នាំ២០២៧ ខាងមុខនេះ។ នេះបើយោងតាមប្រសាសន៍របស់ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា កាលថ្ងៃទី២៩ ខែកក្កដា ឆ្នាំ២០២៦ ក្នុងឱកាសអញ្ជើញប្រគល់វិញ្ញាបនបត្រសម្គាល់ម្ចាស់អចលនវត្ថុចំនួន ២៣០៧៦ បណ្ណជូនប្រជាពលរដ្ឋក្នុងឃុំជ័យធំ ឃុំរកាជន្លឹង និងឃុំពុកឫស្សី ស្រុកខ្សាច់កណ្តាល ខេត្តកណ្តាល។

នាឱកាសនោះ សម្តេចធិបតី ហ៊ុន ម៉ាណែត បានឱ្យដឹងថា ក្នុងអាណត្តិទី៧នេះ រាជរដ្ឋាភិបាលបានប្រគល់ភារកិច្ចជូនក្រសួងរៀបចំដែនដី នគរូបនីយកម្ម និងសំណង់ ដើម្បីបញ្ចប់ការងារវាស់វែង និងចុះបញ្ជីដីធ្លីជូនប្រជាពលរដ្ឋ។ សម្តេចបន្តថា គិតមកដល់ពេលនេះ យើងបានវាស់វែងក្បាលដីបន្ថែម ចំនួន ៦,៣ លានក្បាលដី ដែលនាំឱ្យការវាស់វែងក្បាលដីសរុបកើនដល់ជិត ១៤ លានក្បាលដី។ ជាមួយគ្នានេះ, យើងបានចេញបណ្ណបន្ថែមចំនួន ២,៦ លានបណ្ណ (សរុបជិត ១០ លានបណ្ណ) និងបានចែកវិញ្ញាបនបត្រសម្គាល់ម្ចាស់អចលនវត្ថុសរុបជិត ៩ លានបណ្ណ ស្មើនឹង ៨៦% នៃក្បាលដីដែលបានបិទផ្សាយរួច។ យើងគ្រោងនឹង បញ្ចប់ការងារនេះទាំងស្រុងនៅឆ្នាំ២០២៧ ខាងមុខ។

ក្នុងវិស័យដីធ្លីនេះដែរ សម្តេចធិបតី បញ្ជាក់ថា រាជរដ្ឋាភិបាលបានកំណត់ទិសដៅជំរុញការចុះបញ្ជីដីធ្លីបង្ហើយឱ្យបានចប់សព្វគ្រប់ក្នុងឆ្នាំ២០២៦ និងបញ្ចប់ការចែកបណ្ណកម្មសិទ្ធដីធ្លីនៅទូទាំងប្រទេសក្នុងឆ្នាំ២០២៧។ ជាមួយគ្នានេះ រាជរដ្ឋាភិបាលបានដាក់ចេញនូវអនុសាសន៍រៀបចំប្លង់គោលប្រើប្រាស់ដីធ្លីរយៈពេលវែង ដើម្បីងាយស្រួលធ្វើផែនការវិនិយោគ និងអភិវឌ្ឍន៍តាមតំបន់នីមួយៗផងដែរ៕ (អានបន្ថែម)

- Video Advertisement -