រដ្ឋត្រៀមដីជាង ៣ពាន់ហិកតា សម្រាប់ចែកជូនពលរដ្ឋខ្វះដីក្នុងឃុំ៣ នៅស្រុកសេសាន

• 8 ខែ​មិថុនា 2023
• Uncategorized @km
• 6 មើល

រដ្ឋបាលស្រុកសេសាន រៀបចំដីសម្បទានសង្គមកិច្ច ចំនួនជាង ៣ពាន់ហិកតា សម្រាប់ចែកជូនប្រជាពលរដ្ឋក្រីក្រដែលខ្វះខាតដី សម្រាប់ធ្វើលំនៅឋានរស់នៅ  និងប្រកបរបរកសិកម្ម ដោយស្របច្បាប់នៅក្នុងឃុំចំនួនបី។ នេះបើតាមការផ្សព្វផ្សាយស្តីពីការដាក់ពាក្យស្នើសុំដីសម្បទានសង្គកិច្ចនៅភូមិស្រែតាប៉ាន ឃុំសាមឃួយ ស្រុកសេសាន ខេត្តស្ទឹងត្រែង កាលពីថ្ងៃទី០៥ ខែមិថុនា ឆ្នាំ២០២៣។

លោកសុវណ្ណ ពិសេដ្ឋ អភិបាលស្រុកបានបញ្ជាក់ថា នេះជាគោលនយោបាយរបស់រាជរដ្ឋាភិបាលដែលហៅថាគម្រោង LASEDIII សម្រាប់បងប្អូនប្រជាពលរដ្ឋនៅក្នុងឃុំសាមឃួយ ឃុំស្រែគរ និងឃុំភ្លុក ដែលរស់នៅគ្មានដីសង់លំនៅឋាន និងដីកសិកម្ម ត្រូវទៅដាក់ពាក្យស្នើសុំនៅសាលាឃុំ ចាប់ពីថ្ងៃទី១៥ ខែមិថុនា តទៅមានរយៈពេល ២២ថ្ងៃ។

លោកបានបន្តថា នៅពេលដែលបងប្អូនបានមកដាក់ពាក្យសុំដីនេះហើយ  អាជ្ញាធរមូលដ្ចាននឹងធ្វើការពិនិត្យវិនិច្ឆ័យវាយតម្លៃទៅតាមគ្រួសារនីមួយៗ ដើម្បីរៀបចំផ្តល់ដីជូនពលរដ្ឋប្រកបដោយតម្លាភាព។

សូមបញ្ជាក់ថា គោលនយោបាយរបស់រាជរដ្ឋាភិបាលក្នុងការផ្តល់ដីនេះ អាជ្ញាធរ-មន្ត្រីជំនាញ និងធ្វើការវាយតម្លៃចំពោះអ្នកស្នើសុំ ត្រូវមានចំណូលតិចជាង ឬស្មើបន្ទាត់ភាពក្រីក្រ ជាប្រភេទគ្រួសារស្ថិតក្នុងចំណាត់ថ្នាក់ប្រភេទក្រ១និងក្រ២  និងទទួលបានដីសម្រាប់សង់លំនៅឋាន ទំហំ៤០ម៉ែត្រ គុណនិង ៦០ម៉ែត្រ   និងដីកសិកម្មចាប់ពី ៣ហិកតាទៅ ៥ហិកតា  ទៅតាមគ្រួសារដែលមានសមាជិកតិចឬច្រើន។

• Policy and Strategy