រដ្ឋាភិបាល សម្រេចទុកជាមោឃៈការកាត់ដីបឹងតាមោកទំហំ ៣០ ហិកតា ដែលអនុម័តកាលពីឆ្នាំមុន

• 5 ខែ​មករា 2021
• Uncategorized @km
• 9 មើល

រាជរដ្ឋាភិបាលបានសម្រេចនរាករណ៍ ឬទុកជាមោឃៈការកាត់ដីបឹងតាមោក ៣០ ហិកតា ឱ្យទៅក្រសួងអភិវឌ្ឍន៍ជនបទ និងអគារអង្គភាពចំនួន ៣ ទៀត ដែលធ្វើឡើងកាលពីឆ្នាំមុន ក៏ដូចជាប្រកាសឱ្យដោះដូរទីតាំងស្ថាប័នរដ្ឋមួយចំនួនផងដែរ។

យោងតាមសេចក្ដីប្រកាសរបស់ទីស្ដីការគណៈរដ្ឋមន្ត្រីចុះថ្ងៃទី ៤ មករា ឆ្នាំ២០២១ រដ្ឋាភិបាលសម្រេចទុកជាមោឃៈលើលិខិតលេខ ៧៩០ សជណ.មឃ ដែលសម្រេចឱ្យកាត់ដីបឹងតាមោក ទំហំ ១៥ ហិកតា ដើម្បីសាងសង់អគារក្រសួងអភិវឌ្ឍន៍ជនបទថ្មី កាលពីឆ្នាំមុន។ (អានបន្ថែម)

សេចក្ដីប្រកាសដដែលក៏បានសម្រេចទុកជាមោឃៈលិខិតលេខ ៧៩១ សជណ.មឃ ដែលសម្រេចឱ្យកាត់ដីបឹងតាមោក ទំហំ ១៥ ហិកតា ដើម្បីសាងសង់អគារអង្គភាពចំនួន ៣ រួមមាន ១) អគារគណៈកម្មការជាតិគ្រប់គ្រងមហន្តរាយ ២) អគារគណៈកម្មាធិការសិទ្ធិមនុស្សកម្ពុជា និង ៣) អគារអាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន។

លើសពីនេះ លិខិតដដែលក៏បានសម្រេចឱ្យដោះដូរអគាររដ្ឋមួយចំនួន ដូចតទៅ៖
– ប្រគល់អគារក្រសួងរៀបចំដែនដី នគរូបនីយកម្ម សំណង់ បច្ចុប្បន្ន ជូនទៅក្រសួងអភិវឌ្ឍន៍ជនបទ
– ប្រគល់អគារក្រសួងអភិវឌ្ឍន៍ បច្ចុប្បន្ន ជូនមន្ទីររៀបចំដែនដីភ្នំពេញ
– ប្រគល់ទីតាំងទីស្ដីការក្រសួងរ៉ែ និងថាមពល បច្ចុប្បន្ន ជូនអង្គភាពទាំង ៣ ដូចរៀបរាប់ខាងលើ

គួរបញ្ជាក់ផងដែរ ក្នុងឆ្នាំ ២០២០ នេះ រដ្ឋាភិបាលកម្ពុជាបានសម្រេចកាត់ដីបឹងតាមោកយ៉ាងហោច ៩ លើក ឬ ស្មើនឹង ៦៨២ ហិកតា ឱ្យទៅជាកម្មសិទ្ធិឯកជន និងស្ថាប័នរដ្ឋមួយចំនួន។ (អានបន្ថែម)

• Laws and Regulation
• Projects Development