កម្ពុជាទាក់ទាញវិនិយោគថ្មីជាង $៣៥០លាន ចូលក្នុងខេត្តសំខាន់ៗចំនួន៤

• Sommana Yan
• 2 ខែ​សីហា 2025
• ព័ត៌មានក្នុងស្រុក
• 149 មើល

ថ្មីៗនេះ ក្រុមប្រឹក្សាអភិវឌ្ឍន៍កម្ពុជា ទទួលបានការស្នើសុំចុះបញ្ជីពីក្រុមហ៊ុនឯកជនលើគម្រោងវិនិយោគថ្មីចំនួន ៧គម្រោង ក្រោមទុនវិនិយោគប្រមាណ៣៥០លានដុល្លារ ដោយគ្រោងនឹងបោះទីតាំនៅក្នុងខេត្តកណ្តាល តាកែវ កំពង់ឆ្នាំង និងត្បូងឃ្មុំ នាពេលខាងមុខនេះ។ នេះបើយោងតាមកិច្ចប្រជុំរបស់ក្រុមប្រឹក្សាអភិវឌ្ឍន៍កម្ពុជា នៅថ្ងៃទី៣០ ខែកក្កដា ឆ្នាំ២០២៥។

នាឱកាសនោះ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានឱ្យដឹងថា គម្រោងវិនិយោគទាំងនេះ មានទុនវិនិយោគសរុបប្រមាណ ៣៥០លានដុល្លារ អាចបង្កើតការងារបានប្រមាណ ៤ពាន់កន្លែង និងមានមុខសញ្ញាវិនិយោគក្នុងវិស័យកសិ-ឧស្សាហកម្មចំនួន១គម្រោង (កែច្នៃជ័រកៅស៊ូ), និងវិស័យឧស្សាហកម្មចំនួន៨គម្រោង (ផលិតសម្ភារៈកីទ្បានិងកាបូបដាក់សម្ភារៈកីទ្បា, ផលិតតុក្កតាគ្រប់ប្រភេទ, ផលិតស៊ីម៉ងត៍, ផលិតគ្រឿងអគ្គិសនីសម្រាប់ប្រើប្រាស់ក្នុងផ្ទះ, អាជីវកម្មថ្មអារ, និងផលិតបរិក្ខារអគ្គិសនីបំភ្លឺ អំពូលលម្អនិងគ្រឿងបន្ទាប់បន្សំ)។

គួររម្លឹកដែរថា ក្នុងឆមាសទី១ ឆ្នាំ២០២៥នេះ កម្ពុជាអនុម័តគម្រោងវិនិយោគថ្មីបានចំនួ​ន ​៣៧៣គម្រោង ក្នុងទុនវិនិយោគសរុប ៥,៨ពាន់លានដុល្លារ កើន ៧៧%។ គម្រោងវិនិយោគទាំង ៣៧៣នេះ នឹងអាចបង្កើតការងារជូនប្រជាពលរដ្ឋកម្ពុជាបានប្រមាណ ២៥ម៉ឺនកន្លែង។នេះបើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) កាលថ្ងៃទី០៧​ ខែកក្កដា ឆ្នាំ២០២៥។

លំហូរនៃការវិនិយោគនេះឆ្លុះបញ្ចាំងពីទំនុកចិត្តកាន់តែខ្លាំងឡើងលើទស្សនវិស័យសេដ្ឋកិច្ចរបស់កម្ពុជា និងសក្តានុពលរបស់ខ្លួនជាមជ្ឈមណ្ឌលក្នុងតំបន់សម្រាប់ឧស្សាហកម្មផ្សេងៗ៕