កូរ៉េគ្រោងបោះទុន $១៣ពាន់លាន ពង្រីកប្រតិបត្តិការរបស់ខ្លួននៅព្រលានយន្តហោះថ្មីរបស់វៀតណាម

Sommana Yan
27 ខែសីហា 2024
ព័ត៌មានអន្តរជាតិ
86 មើល

ជាយុទ្ធសាស្ត្រពង្រីកវត្តមានក្នុងទីផ្សារអាស៊ីរបស់ខ្លួន ក្រុមហ៊ុនសាជីវកម្មអាកាសយានដ្ឋានអន្តរជាតិ Incheon របស់កូរ៉េ ត្រូវបានជ្រើសរើសជាក្រុមហ៊ុនផ្តល់សេវាប្រឹក្សាយោបល់លើប្រតិបត្តិការនៃអាកាសយានដ្ឋានអន្តរជាតិ Long Thanh ថ្មីរបស់ប្រទេសវៀតណាម។ គម្រោងដ៏ធំមួយនៅអាស៊ីអាគ្នេយ៍នេះ គ្រោងនឹងកាត់បន្ថយការកកស្ទះនៅអាកាសយានដ្ឋានអន្តរជាតិ Tan Son Nhat នៅទីក្រុងហូជីមិញ ដែលកំពុងជួបបញ្ហាមានអ្នកធ្វើដំណើរច្រើនលើសបន្ទុក នេះបើយោងតាម Theinvestor.vn ចុះថ្ងៃទី ០៩ ខែសីហា ឆ្នាំ ២០២៤។

ប្រភពដដែលបានឱ្យដឹងថា គម្រោងអាកាសយានដ្ឋាន Long Thanh ថ្មីនេះ ត្រូវបានរចនាឡើងដើម្បីទទួលអ្នកដំណើរឱ្យបាន ១០០លាននាក់ និងដឹកទំនិញ ៥លានតោន ក្នុងមួយឆ្នាំ និងកំពុងត្រូវបានអភិវឌ្ឍជាបីដំណាក់កាលចាប់ពីឆ្នាំ ២០២៦ ដល់ឆ្នាំ ២០៥០ ជាមួយនឹងការចំណាយប៉ាន់ស្មានចំនួន ១៣,៣ ពាន់លានដុល្លារ។

សាជីវកម្មអាកាសយានដ្ឋានអន្តរជាតិ Incheon បានសហការជាមួយដៃគូវៀតណាម គឺក្រុមហ៊ុន PMI នឹងដឹកនាំគម្រោងនេះ ដោយប្រើប្រាស់ជំនាញរបស់ខ្លួនក្នុងបច្ចេកវិទ្យា និងការវាយតម្លៃតម្លៃ ដើម្បីយកឈ្នះដៃគូប្រកួតប្រជែងដូចជា ADP របស់បារាំង និងក្រុមហ៊ុន Fraport របស់អាល្លឺម៉ង់។ ក្រុមហ៊ុនបណ្តាក់ទុនរួមគ្នានេះ មានភារកិច្ចផ្តល់សេវាប្រឹក្សាយោបល់ដ៏ទូលំទូលាយដែលរួមមានការព្រាងគំនិតប្រតិបត្តិការអាកាសយានដ្ឋាន ការបង្កើតយុទ្ធសាស្រ្តពាណិជ្ជកម្ម និងការផ្តល់ការណែនាំអំពីប្រតិបត្តិការសាកល្បង។ គម្រោងនេះ ត្រូវបានគេរំពឹងថានឹងត្រូវបញ្ចប់ក្នុងរយៈពេល ២៤ ខែក្រោយការចុះកិច្ចសន្យាជាមួយនឹងតម្លៃប្រហែល ៨,០៦ លានដុល្លារ។

ប្រធាន និងជានាយកប្រតិបត្តិនៃសាជីវកម្មអាកាសយានដ្ឋានអន្តរជាតិ Incheon លោក Lee Hag-jae បានសង្កត់ធ្ងន់ថា “ការបណ្តាក់ទុនទៅប្រទេសវៀតណាមនេះ តំណាងឱ្យការពង្រីកជាយុទ្ធសាស្រ្តនៃអាជីវកម្មក្រៅប្រទេសរបស់សាជីវកម្មនៅក្នុងតំបន់អាស៊ីអាគ្នេយ៍ បន្ទាប់ពីក្រុមហ៊ុនបានអនុវត្តគម្រោងជោគជ័យនៅទីក្រុង Batam ប្រទេសឥណ្ឌូនេស៊ី និងទីក្រុងម៉ានីល ប្រទេសហ្វីលីពីន។ ក្រុមហ៊ុនសាជីវកម្ម Incheon ក៏មានគោលបំណងធ្វើប្រតិបត្តិការអាកាសយានដ្ឋានជាង ១០ នៅក្រៅប្រទេសនៅឆ្នាំ ២០៤០ ដោយពង្រឹងយុទ្ធសាស្រ្តរបស់ខ្លួនដើម្បីក្លាយជាប្រតិបត្តិករព្រលានយន្តហោះឈានមុខគេលើពិភពលោក។

មូលដ្ឋានថ្មីនៅក្នុងប្រទេសវៀតណាមនេះ មិនត្រឹមតែលើកកំពស់ផលប័ត្រធុរកិច្ចអន្តរជាតិរបស់សាជីវកម្មអាកាសយានដ្ឋានអន្តរជាតិ Incheon ប៉ុណ្ណោះទេ ថែមទាំងពង្រឹងជំហររបស់ខ្លួនជាអ្នកឯកទេសសកលក្នុងប្រតិបត្តិការព្រលានយន្តហោះ ស្របតាមចក្ខុវិស័យរយៈពេលវែងរបស់ខ្លួនក្នុងការពង្រីក និងឧត្តមភាពក្នុងវិស័យអាកាសចរណ៍លំដាប់ពិភពលោកផងដែរ៕

- Video Advertisement -