កូរ៉េចង់វិនិយោគលើការកែច្នៃសម្រាមទៅជាថាមពលនៅកម្ពុជា

• 20 ខែ​ធ្នូ 2022
• ព័ត៌មានក្នុងស្រុក
• 6 មើល

សាធារណរដ្ឋកូរ៉េ បានស្វែងរកការគាំទ្រពីសម្ដេចតេជោ ហ៊ុន សែន លើគម្រោងកែច្នៃសម្រាមទៅជាថាមពលរបស់ក្រុមហ៊ុនអេកូខេម។ នេះបើតាមការស្នើឡើងរបស់ ឯកឧត្ដម ប៉ាក ហឹងឃ្យុង (Park Heung Kyeong) ឯកអគ្គរដ្ឋទូតនៃសាធារណរដ្ឋកូរ៉េ ក្នុងជំនួបសម្ដែងការគួរសម នៅថ្ងៃទី១៩ ខែធ្នូ ឆ្នាំ២០២២។

ជាការឆ្លើយតប សម្តេចតេជោ​ បានគាំទ្រនិងបានឱ្យឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអ​គ្គ​​​លេខាធិការក្រុមប្រឹក្សាអភិវឌ្ឍន៍កម្ពុជា ធ្វើការងារជាបន្តជាមួយឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាម​ព​ល​ និងសាលារាជធានីភ្នំពេញលើសំណើគម្រោងនេះផងដែរ។

ក្នុងជំនួបនេះផងដែរ សម្តេចតេជោនាយករដ្ឋមន្ត្រី បានលើកឡើងផងដែរថា ស្ពានមិត្តភាព កម្ពុជា-កូរ៉េ ជាសារបញ្ជាក់អំពីទំនាក់ទំនងដ៏ល្អរវាងប្រទេសទាំងពីរ កម្ពុជា និងកូរ៉េ។

គួរបញ្ជាក់ថា ប្រទេសកូរ៉េ បានផ្តល់កម្ចីជាង ២៤៥លានដុល្លារអាមេរិក សម្រាប់គម្រោងសាងសង់ស្ពានមិត្តភាពកម្ពុជា-កូរ៉េ (ផ្សារចាស់-ជ្រោយចង្វារ, ជ្រោយចង្វារ-អរិយក្សត្រ)។ (អានបន្ថែម)

គម្រោងនេះ អាចនឹងត្រូវសាងសង់នៅចុងឆ្នាំ២០២៣ ដោយរង់ចាំបំពេញនីតិវិធីពាក់ព័ន្ធឱ្យចប់សព្វគ្រប់ជាមុនសិន។ (អានបន្ថែម)

• Energy and Environment