ក្នុងឆ្នាំ២០២៤ ទំហំពាណិជ្ជកម្មរវាងកម្ពុជា-ថៃ កើនដល់ ១ម៉ឺនលានដុល្លារ

• Sommana Yan
• 12 ខែ​មីនា 2025
• ព័ត៌មានក្នុងស្រុក
• 140 មើល

ក្នុងឆ្នាំ២០២៤ ទំហំពាណិជ្ជកម្មរវាងប្រទេសកម្ពុជា និងប្រទេសថៃ បានកើនឡើងរហូតដល់ ១០.០០០លានដុល្លារ ខណៈភាគីទាំងពីរ បានប្តេជ្ញាជំរុញទំនាក់ទំនងទំហំពាណិជ្ជកម្មទ្វេភាគីឱ្យមានសន្ទុះរិតតែខ្លាំងថែមទៀតនាពេលខាងមុខ។

នេះបើយោងតាមជំនួបពិភាក្សារវាងសម្តេចតេជោ ហ៊ុន សែន ប្រមុខរដ្ឋស្តីទីកម្ពុជា ជាមួយ ឯកឧត្តម ធុល ត្រៃសូរ៉ាត់ (Tull Traisorat) ឯកអគ្គរាជទូតវិសាមញ្ញ និងពេញសមត្ថភាពថៃ ប្រចាំកម្ពុជា នៅថ្ងៃទី១១ ខែមីនា ឆ្នាំ២០២៥។

ក្នុងជំនួបនេះ សម្ដេចតេជោ បានឱ្យដឹងថា ទំហំពាណិជ្ជកម្មរវាងកម្ពុជា និងថៃ ក្នុងឆ្នាំ២០២៤ កន្លងទៅនេះ បានកើនឡើងរហូត១០ពាន់លានដុល្លារ ធៀបឆ្នាំ២០២៣ ដែលមានត្រឹមតែ ៨ពាន់លានដុល្លារប៉ុណ្ណោះ។ សម្តេចតេជោ បានចាត់ទុកការកើនឡើងនេះបង្ហាញពីទំនាក់ទំនងពាណិជ្ជកម្ម ការវិនិយោគរវាងភាគីទាំងពីរក៏កាន់តែល្អប្រសើរ។

ជាមួយគ្នានេះ ឯកឧត្តម ឯកអគ្គរាជទូតថៃ បានប្តេជ្ញាបំពេញបេសកកម្មនៅកម្ពុជា ដោយយកចិត្តទុកដាក់ ធ្វើយ៉ាងណាក្នុងការពង្រឹង និតពង្រីកទំនាក់ទំនងរវាងប្រទេសទាំងពីរ ឱ្យកាន់តែល្អប្រសើរបន្ថែមទៀត ជាពិសេសការគៀរគរវិនិយោគិនថៃមកកម្ពុជាឱ្យកាន់តែច្រើនបន្ថែមទៀតផងដែរ។

បើតាមជំនួបពិភាក្សាដដែល ក៏បានបងញ្ជាក់ដែរថា ក្នុងឆ្នាំ២០២៤នេះ កំណើនភ្ញៀវទេសចរណ៍ថៃមកកាន់ប្រទេសកម្ពុជាមានការកើនឡើងដល់ទៅ ២លាននាក់ ដែលឈរនៅលំដាប់ទី១ ក្នុងចំណោមទេសចរណ៍បរទេស ហើយទេសចរណ៍កម្ពុជាទៅប្រទេសថៃវិញគឺ ប្រមាណ ៥៥ម៉ឺននាក់ ក្នុងឆ្នាំ២០២៤ ដែលនេះបង្ហាញអំពីទំនាក់ទំនងដ៏ល្អប្រសើររវាងប្រទេសទាំងពីរផងដែរ។

នៅពេលដែលប្រទេសទាំងពីរបន្តធ្វើការសហការគ្នា ទស្សនវិស័យសម្រាប់ការកើនឡើងពាណិជ្ជកម្ម ការវិនិយោគ និងទេសចរណ៍មានភាពរឹងមាំ ដែលត្រួសត្រាយផ្លូវសម្រាប់អនាគតដ៏រុងរឿង។

• Business and Market
• Economy and Finance