អន្តរក្រសួងពិនិត្យសំណើរសុំបង្កើតរោងចក្រផលិតអំបិល និងសិក្សាសក្តានុពលវិស័យអំបិលនៅកម្ពុជា

Proeksa Meas
6 ខែមិថុនា 2026
ព័ត៌មានសំណង់
27 មើល

គណៈកម្មាធិការអន្តរក្រសួងដឹកនាំដោយក្រសួងសេដ្ឋកិច្ច និងហិរញ្ញវត្ថុ ពិនិត្យលើគំនិតផ្តួចផ្តើមរបស់វិស័យឯកជន ដើម្បីធ្វើទំនើបកម្មខ្សែសង្វាក់កែច្នៃក្នុងស្រុក និងខ្សែសង្វាក់ផ្គត់ផ្គង់

គណៈកម្មការលើកទឹកចិត្ត និងជំរុញផលិតកម្មអំបិល បានដឹកនាំអន្តរក្រសួងពិភាក្សាលើការស្នើគម្រោងបង្កើតរោងចក្រផលិតអំបិល និងការសិក្សាសក្តានុពលវិស័យអំបិលនៅកម្ពុជា។ នេះបើយោងតាមកិច្ចប្រជុំអន្តរក្រសួងកាលថ្ងៃទី ២៧ ខែឧសភា ឆ្នាំ២០២៦ ដឹកនាំដោយឯកឧត្តម ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និង ហិរញ្ញវត្ថុ និងជាប្រធានគណៈកម្មការលើកទឹកចិត្ត និង ជំរុញផលិតកម្មអំបិល។

ឯកឧត្តម ហ៊ាន សាហ៊ីប បានឱ្យដឹងថា កិច្ចប្រជុំនេះរៀបចំឡើងក្នុងគោលបំណងសិក្សាស្វែងយល់ អំពីទស្សនៈវិស័យគម្រោង សក្តានុពលផលិតកម្ម ការកែច្នៃ និងការប្រើប្រាស់អំបិលក្នុងស្រុក ក៏ដូចជាការពិនិត្យលទ្ធភាពនៃការចូលរួមរបស់វិស័យឯកជន ក្នុងការគាំទ្រការអភិវឌ្ឍវិស័យអំបិលកម្ពុជា។

ជាលទ្ធផលអង្គប្រជុំនោះ បានផ្តល់ជាមតិយោបល់ និងធាតុចូលល្អៗ ដើម្បីឱ្យក្រុមហ៊ុនអាចបន្តសិក្សា និង រៀបចំការស្នើសុំឱ្យបានលម្អិតបន្ថែម រួមមាន ផែនការវិនិយោគ គំរូអាជីវកម្ម ប្រភពទុន បច្ចេកវិទ្យាផលិត និងកែច្នៃ ផែនការសហការជាមួយកសិករ និងសហគមន៍អំបិល ការវាយតម្លៃផលប៉ះពាល់បរិស្ថាន-សង្គម និង ចំណុចស្នើសុំការលើកទឹកចិត្តដែលក្រុមហ៊ុនចង់បានស្របតាមអភិក្រម “ជីវភាពនៃប្រព័ន្ធតួអង្គតែមួយ” ក្នុងការជំរុញការអភិវឌ្ឍវិស័យអំបិល ឱ្យមានមានចីរភាព។

ជាការកត់សម្គាល់ គម្រោងស្នើបង្កើតរោងចក្រផលិតអំបិល និងការសិក្សាសក្តានុពលផលិត និងប្រើប្រាស់អំបិលនៅកម្ពុជា គឺស្នើដោយក្រុមហ៊ុន ចេនឡា ហ្វ៊ូដ អិចប្រេស ឯ.ក (CHENLA FOOD EXPRESS CO., LTD.)។ អន្តរក្រសួងយល់ថា ការចូលរួមរបស់វិស័យឯកជនក្នុងការអភិវឌ្ឍវិស័យអំបិល គួរត្រូវបានស្វាគមន៍ ប្រសិនបើគម្រោងមានភាពច្បាស់លាស់ អាចអនុវត្តបានជាក់ស្តែង និងចូលរួមដោះស្រាយតម្រូវការរបស់វិស័យមួយនេះ ពិសេសបម្រើផលប្រយោជន៍សាធារណៈ៕ (អានបន្ថែម)

- Video Advertisement -