ក្រុមហ៊ុនសុខាភិបាលដ៏ធំ១នៅប្រទេសអូស្រ្តាលី  ចង់បោះទុនវិនិយោគនៅកម្ពុជា

• Sommana Yan
• 28 ខែ​សីហា 2025
• Uncategorized @km
• 154 មើល

Aspen Medical គឺជាក្រុមហ៊ុនឈានមុខគេផ្នែកសុខាភិបាលនៅប្រទេសអូស្រ្តាលី កំពុងស្វែងរកកិច្ចសហការជាមួយអង្គភាពពាក់ព័ន្ធ សំដៅបណ្តាក់ទុនវិនិយោគនៅកម្ពុជានាពេលអនាគត។

នេះបើយោងតាមជំនួបពិភាក្សារវាងឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ជាមួយលោក Glenn Keys AO ស្ថាបនិក និងប្រធានក្រុមហ៊ុន Aspen Medical នៅថ្ងៃទី២៦ ខែសីហា ឆ្នាំ២០២៥។

នាឱកាសនោះ  ប្រធានក្រុមហ៊ុន Aspen Medical បានបង្ហាញអំពីប្រវត្តិការងារ និងបទពិសោធន៍របស់ក្រុមហ៊ុនដែលធ្លាប់បានអនុវត្តជោគជ័យនាពេលកន្លងមកលើគម្រោងសុខាភិបាលនៅក្នុងប្រទេសអូស្ត្រាលី ប្រទេសឥណ្ឌូនេស៊ី និងប្រទេសហ្វីជី។ លោកថា ក្រុមហ៊ុននឹងសិក្សាលម្អិតលើវិសាលភាពគ្របដណ្តប់សម្រាប់ការវិនិយោគនៅកម្ពុជា ហើយស្វែងរកកិច្ចសហការជាមួយអង្គភាពពាក់ព័ន្ធសំដៅបណ្តាក់ទុនវិនិយោគនាពេលអនាគត។

ទន្ទឹមគ្នានេះ ឯកឧត្តមឧបនាយករដ្ឋមន្ត្រី បានស្វាគមន៍ទៅកាន់ក្រុមហ៊ុនដែលគ្រោងនឹងធ្វើការសិក្សាលម្អិតអំពីការវិនិយោគនៅកម្ពុជា ខណៈឯកឧត្តម ក៏បានលើកបង្ហាញអំពីសក្តានុពលចំពោះការវិនិយោគលើវិស័យសុខាភិបាលនៅក្នុងប្រទេសកម្ពុជា និងការយកចិត្តទុកដាក់របស់រាជរដ្ឋាភិបាលកម្ពុជាផងដែរ។

គួរបញ្ជាក់ថា ក្រុមហ៊ុន Aspen Medical មិនត្រឹមតែបានវិនិយោគលើផ្នែកសុខាភិបាលនៅក្នុងប្រទេសអូស្ត្រាលី ប្រទេសឥណ្ឌូនេស៊ី និងប្រទេសហ្វីជីប៉ុណ្ណ៉ទេ ក្រុមហ៊ុននេះ ក៏មានប្រតិបត្តិការសេវាសុខាភិបាលនៅក្នុងប្រទេសមហាអំណាចធំៗមួយចំនួនទៀតលើពិភពលោកដូចជាសហរដ្ឋអាម៉េរិក និងចក្រភពអង់គ្លេសផងដែរ។

កិច្ចសហការដ៏មានសក្តានុពលរវាង Aspen Medical និង Cambodia បង្ហាញពីជំហានដ៏ជោគជ័យមួយឆ្ពោះទៅរកការពង្រឹងវិស័យថែទាំសុខភាព និងការកែលម្អលទ្ធផលសុខភាពសម្រាប់ប្រជាជនកម្ពុជាទាំងអស់៕