ក្រុមហ៊ុនឯកជនស្នើសង់អាងចម្រោះទឹកកខ្វក់លើផ្ទៃដី ៣ ហិកតាក្នុងតំបន់សេដ្ឋកិច្ចពិសេសខេត្តព្រះសីហនុ

• 24 ខែ​កុម្ភៈ 2021
• ព័ត៌មានក្នុងស្រុក
• 6 មើល

ក្រុមហ៊ុនឯកជន កំពុងសិក្សាផលប៉ះពាល់លើគម្រោងសាងសង់អាងចម្រោះទឹកកខ្វក់ចំនួន ៤ លើផ្ទៃដី ៣ហិកតា ក្នុងតំបន់សេដ្ឋកិច្ចពិសេសខេត្តព្រះសីហនុ។ នេះបើយោងតាមកិច្ចប្រជុំរវាងអភិបាលរងខេត្តព្រះសីហនុ ឯកឧត្តម ឈិន សេងងួន និងតំណាងក្រុមហ៊ុន កាលពីថ្ងៃទី ២៣ កុម្ភៈនេះ។

គម្រោងនេះស្នើដោយក្រុមហ៊ុនទីប្រឹក្សាបច្ចេកទេស អេធីអឹម ហ្គ្រីនខនសាល់ធេនស៊ី ដោយមានកញ្ញា ឡុក គឹមហៀក ជាតំណាង។ បើទទួលបានការអនុម័ត គម្រោងនេះនឹងត្រូវសាងសង់ឡើងក្នុងតំបន់សេដ្ឋកិច្ចពិសេសថ្មី ដែលទីតាំងស្ថិតនៅភូមិវាល ស្រុកកំពង់សីលា នៃខេត្តព្រះសីហនុ។

ជាការឆ្លើយតប អភិបាលរងខេត្តព្រះសីហនុ បានណែនាំឱ្យក្រុមហ៊ុន សិក្សាទីតាំង និងជំរឿនប្រជាជនឱ្យបានច្បាស់ បំពាក់ម៉ាស៊ីនស្វ័យប្រវត្តិ ដើម្បីត្រួតពិនិត្យគុណភាពចុងក្រោយ ក៏ដូចជាប្រមូលទិន្នន័យឱ្យបានគ្រប់គ្រាន់មុននឹងឱ្យក្រុមការងារបច្ចេកទេសវាយតម្លៃ និងពិនិត្យហេតុប៉ះពាល់បរិស្ថាន នៅទីតាំងគម្រោង។

ក្រៅពីគម្រោងនេះ ខេត្តព្រះសីហនុក៏មានគម្រោងអាងប្រព្រឹត្តិទឹកកខ្វក់តម្លៃជាង ១៤០ លានដុល្លារ មួយផ្សេងទៀតដែលកំពុងសាងសង់ ដែលមកទល់បច្ចុប្បន្នសម្រេចបាន ៤៨% ហើយ។ (អានបន្ថែម)

• Energy and Environment
• Projects Development
• Urbanization and Architect