ខេត្តកំពង់ធំ ជាខេត្តមួយពឹងផ្អែកលើកសិកម្ម និងមានផ្ទៃដីធំជាងភ្នំពេញប្រមាណ ២០ដង

• Sommana Yan
• 19 ខែ​សីហា 2025
• Uncategorized @km
• 262 មើល

ខេត្តកំពង់ធំ គឺជាខេត្តមួយពឹងផ្អែកលើកសិកម្ម មានផ្ទៃដីធំជាងភ្នំពេញរហូតដល់ប្រមាណ ២០ដង មានប្រជាជនប្រមាណ ៩០ម៉ឺននាក់ ខណៈភាគីពាក់ព័ន្ធក៏បានជំរុញឱ្យមានកំណើនវិនិយោគនៅក្នុងខេត្តមួយនេះ ដើម្បីលើកកម្ពស់សេដ្ឋកិច្ចបន្ថែមទៀតផង​ដែរ។

នេះបើយោងតាមការលើកឡើងរបស់ ឯកឧត្ដម​ នួន ផារ័ត្ន អភិបាលខេត្តកំពង់ធំ ក្នុងពិធីចុះហត្ថលេខាលើអនុស្សរណៈនៃការយោគយល់គ្នា​ ស្តីពីការបង្កើតចំណងសម្ព័ន្ធមេត្រីភាព និងកិច្ចសហប្រតិបត្តិការរវាងរដ្ឋបាលរាជធានីភ្នំពេញ និងរដ្ឋបាលខេត្តកំពង់ធំ កាលពីថ្ងៃទី១៥ ខែសីហា ឆ្នាំ២០២៥។

នាឱកាសនោះ ឯកឧត្ដម​ អភិបាលខេត្តបានបញ្ជាក់ថា៖ ខេត្តកំពង់ធំ ជាខេត្តមួយពឹងផ្អែកលើកសិកម្ម មានផ្ទៃដីធំជាងភ្នំពេញប្រមាណ ២០ដង មានប្រជាជនប្រមាណ៩០ម៉ឺននាក់ និងមានផ្ទៃដី​សម្រាប់​បង្កបង្កើនផលចំនួន​ ៣០ម៉ឺនហិកតា ក្នុងនោះមានផ្ទៃដីសម្រាប់ដំណាំស្វាយចន្ទីចំនួន ​១៥ម៉ឺនហិកតា, ផ្ទៃ​ដីសម្រាប់ដាំដំណាំស្រូវ​ ៥ម៉ឺនហិកតា និងកៅស៊ូចំនួន​ ១៥ហិកតា។ ឯកឧត្តមរំពឹងថា កិច្ចសហប្រតិបត្តិការជាមួយរដ្ឋបាលរាជធានីភ្នំពេញ នឹងជួយអភិវឌ្ឍខេត្តកំពង់ធំឱ្យកាន់តែរីកចំរើនបន្ថែមទៀត។

ជាមួយគ្នានេះឯកឧត្ដម​ ឃួង ស្រេង អភិបាលរាជធានីភ្នំពេញ បានលើកឡើងដែរថា ​ខេត្តកំពង់ធំ ជាខេត្តទី២​ បន្ទាប់​ពី​ខេត្ត​ព្រះវិហារ​ដែលបានចងសម្ព័ន្ធមេត្រីភាព និងកិច្ចសហប្រតិបត្តិការជាមួយរាជធានីភ្នំពេញ។ ដោយសារខេត្តកំពង់ធំនៅមិនឆ្ងាយពីរាជធានីភ្នំពេញ ហើយជាខេត្តដែលពឹងផ្អែកលើកសិកម្ម ជា«ខេត្តអធិរាជស្វោយចន្ទី »។ រដ្ឋបាលរាជធានីភ្នំពេញ ក៏បានប្តេជ្ញាជួយកៀងគរអ្នកវិនិយោគឱ្យបានច្រើនទៅវិនិយោគនៅខេត្តមួយកំពង់ធំផងដែរ។

គួរបញ្ជាក់ថា តាមរយៈចុះ MOU រវាងរដ្ឋបាលភ្នំពេញ និងខេត្តកំពង់ធំនាពេលនេះ គឺបានជួយកសាងបរិយាកាសឱ្យកាន់តែអំណោយផល និងជំរុញដល់ការអភិវឌ្ឍ និងវិបុលភាព លើវិស័យសេដ្ឋកិច្ច ពាណិជ្ជកម្ម ទេសចរណ៍​ អប់រំ កីឡា​ ដឹកជញ្ជូនសាធារណៈ កិច្ច​ការការពារបរិស្ថាន ផែនការ ការអភិវឌ្ឍទីក្រុងវៃឆ្លាត​វិទ្យាសាស្ត្រ និងបច្ចេកវិទ្យា និងវិស័យផ្សេងៗទៀត៕

• land development and policy
• Agriculture and Aquaculture Project