គម្រោងស្តារផ្លូវជាតិលេខ២៣ ក្រោមកម្ចីADB ជាង $២១លាន សង់បានជាង ៥៧%

• Sommana Yan
• 12 ខែ​សីហា 2024
• ព័ត៌មានក្នុងស្រុក
• 240 មើល

គិតត្រឹមខែកក្កដា ឆ្នាំ២០២៤នេះ គម្រោងស្តារ និងលើកកម្ពស់កម្រិតគុណភាពកំណាត់ផ្លូវជាតិលេខ២៣ ប្រវែង ១៩,៨៣គីឡូម៉ែត្រ សម្រេចបាន ៥៧,៥០ភាគរយ ហើយ។ នេះបើតាមការបញ្ចាក់របស់លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន ប្រាប់ទៅកាន់សារព័ត៌មានក្នុងស្រុកមួយកាលពីដើមខែសីហានេះ។

គួរបញ្ជាក់ថា កំណាត់ផ្លូវជាតិលេខ២៣ ដែលបាននិងកំពុងជួសជុលកែលម្អនេះមាន ប្រវែង១៩,៨៣គីឡូម៉ែត្រ ឆ្លងកាត់ឃុំលើកដែក ស្រុកកោះធំ រហូតដល់ឃុំពាមរាំង ស្រុកលើកដែក ខេត្តកណ្ដាល។ បើតាមផែនការ ផ្លូវនេះ ត្រូវបានសាងសង់ឡើងជា៤គន្លង (២គន្លងទៅ និង២គន្លងមក) ដោយពង្រីកទទឹងតួផ្លូវប្រវែង ១១ម៉ែត្រ និងក្រាលកៅស៊ូ AC កម្រាស់ ៨សង់ទីម៉ែត្រ លើទទឹងតួផ្លូវប្រវែង ១០ម៉ែត្រ។

ជាងនេះទៅទៀត ផ្លូវមួយខ្សែនេះ មានសក្តានុពល និងមានភាពប្រទាក់ក្រឡា តភ្ជាប់ជាមួយផ្លូវជាតិលេខ២១B និងផ្លូវជាតិលេខ២១ ឆ្ពោះទៅកាន់ទិសដៅរាជធានីភ្នំពេញ និងព្រំដែនកម្ពុជា-វៀតណាម(ជ្រៃធំ-ឡុងប៊ិញ) និងតភ្ជាប់ជាមួយផ្លូវជាតិលេខ១៤ ទិសដៅតម្រង់ទៅស្ពានអ្នកលឿង ខេត្តព្រៃវែង និងព្រំដែនកម្ពុជា-វៀតណាម (ក្អមសំណ-វិញសឿង) និងតភ្ជាប់ជាមួយបណ្តាញខ្សែផ្លូវផ្សេងៗដទៃទៀតនៅក្នុងតំបន់នេះ។

គួររំលឹកថា គម្រោងនេះ ទទួលបានឥណទានសម្បទាន ២១,៦៨លានដុល្លារ​ ពីធនាគារអភិវឌ្ឍន៍អាស៊ី (ADB) ដែលបានបើកការដ្ឋានកាលពីអំឡុងខែមិថុនា ឆ្នាំ២០២៣។ (អានបន្ថែម)

• Road and Infrastructure