ជប៉ុនបោះទុនវិនិយោគលើលំនៅឋានដ៏ប្រណីតនៅថៃតម្លៃជិត ២០០ លានដុល្លារ

• Proeksa Meas
• 28 ខែ​កក្កដា 2017
• Uncategorized @km
• 195 មើល

ក្រុមហ៊ុនអភិវឌ្ឍន៍អចលនទ្រព្យឈានមុខគេរបស់ជប៉ុនមួយ បានចូលហ៊ុនវិនិយោគរួមគ្នាជាមួយក្រុមហ៊ុនរបស់ថៃដើម្បីអភិវឌ្ឍគម្រោងលំនៅឋានដ៏ល្អប្រណីតមួយនៅ Phuket ប្រទេសថៃ ដែលមានតម្លៃប្រមាណជាង ១៧៤លានដុល្លារអាមេរិក។

Kajima Oversea Asia ដែលជាក្រុមហ៊ុនអភិវឌ្ឍអចលនទ្រព្យរបស់ជប៉ុន បានចាប់ដៃគូជាមួយក្រុមហ៊ុនក្នុងស្រុករបស់ថៃ Minor International(MINT) ដែលជាក្រុមហ៊ុនចុះបញ្ជីមួយប្រតិបត្តិការលើការអភិវឌ្ឍសណ្ឋាគារ និងភោជនីយដ្ឋានជាច្រើននៅទូទាំងពិភពលោក ដើម្បីអភិវឌ្ឍន៍គម្រោង Avandina Hills ស្ថិតនៅក្រុង Phutket។

គម្រោងអភិវឌ្ឍនេះនឹងសាងសង់ផ្ទះវីឡាប្រណីតៗចំនួន ១៦យូនីត ដែលគ្រប់ដណ្តប់លើផ្ទៃដី ១៨ហិកតា ដោយសាងសង់ជា២ដំណាក់កាល។ ដំណាក់កាលទី១ នឹងអភិវឌ្ឍចំនួន ១១យូនីត គ្រោងបញ្ចប់នៅឆ្នាំ២០១៨ ខណៈដែលដំណាក់កាលទី២ នឹងបញ្ចប់ការសាងសង់នៅឆ្នាំ២០២០។

ក្រុមហ៊ុន MINT ក៏បានប្រកាសផងដែរអំពីការអភិវឌ្ឍន៍អគារអាផាតមិនប្រណីតៗ និងផ្សារលក់រាយចំនួន ៩៧យូនីត ព្រមទាំងការពង្រីកផ្សារទំនើប Turtle Village របស់ខ្លួនផងដែរ។

គួរជម្រាបថា គម្រោងអភិវឌ្ឍទាំងនេះបានជម្រុញកំណើនវិស័យទេសចរណ៍ក្នុងតំបន់ Phutket ដោយមានអត្រាកំណើន ១៨ ភាគរយក្នុងឆ្នាំ២០១៦ កន្លងមកនេះ៕