ជប៉ុន ជួយកម្ពុជាជាង ៤០លានដុល្លារ ពង្រីកសមត្ថភាព​រោងចក្រផលិតទឹកស្អាតភូមិព្រែក

• Sommana Yan
• 3 ខែ​តុលា 2025
• Uncategorized
• 198 មើល

រដ្ឋាភិបាលជប៉ុន បានប្រកាសផ្តល់ជំនួយឥតសំណងជាង ៤០លានដុល្លារ ដល់រដ្ឋាករទឹកស្វយ័តក្រុងភ្នំពេញ ដើម្បីពង្រីកសមត្ថភាព​រោងចក្រផលិតទឹកស្អាតភូមិព្រែក ពី១៥០ពាន់ម៉ែត្រគូបក្នុងមួយថ្ងៃ ទៅ១៩៥ពាន់ម៉ែត្រគូបក្នុងមួយថ្ងៃ ​ ដើម្បីឆ្លើយតបនឹងផែនការមេផ្គត់ផ្គង់ទឹកស្អាតនៅក្រុងភ្នំពេញ។

ពិធីចុះហត្ថលេខាលើជំនួយនៃគម្រោងពង្រីកសមត្ថភាព រោងចក្រប្រព្រឹត្តិកម្មទឹកស្អាតភូមិព្រែក ធ្វើឡើងនាថ្ងៃទី៣០ ខែកញ្ញា ឆ្នាំ២០២៥ ក្រោមវត្តមាន លោក ឯក សុនចាន់ ​ប្រធានក្រុមប្រឹក្សាភិបាល​រដ្ឋាករទឹកស្វយ័តក្រុងភ្នំពេញ លោក ​ឡុង ណារ៉ូ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃរដ្ឋាករទឹកស្វយ័តក្រុងភ្នំពេញ និងតំណាងJICA។

លោក ​ឡុង ណារ៉ូ បានឱ្យដឹងថា រោងចក្រភូមិព្រែកដែលយើងបានសិក្សា នឹងត្រូវពង្រីកបន្ថែម ៤៥.០០០ ម៉ែត្រគូបក្នុងមួយថ្ងៃ ខណៈបច្ចុប្បន្នរោងចក្រភូមិព្រែកនេះ មានសមត្ថភាពផលិតត្រឹមតែ ​១៥០ពាន់ម៉ែត្រគូបក្នុងមួយថ្ងៃ។

លោកបន្តថា បន្ទាប់ពីការចុះហត្ថលេខានៅថ្ងៃនេះរួច ក្រុមហ៊ុនម៉ៅការជប៉ុន នឹងចាប់ផ្តើមសាងសង់ចាប់ពីពេលនេះតទៅ ដោយប្រើរយៈពេល ៣៦ខែ ហើយគ្រោងនឹងបញ្ចប់នៅចុងឆ្នាំ២០២៨។ នៅពេលបញ្ចប់ការសាងសង់ នៅចុងឆ្នាំ២០២៨ រោងចក្រនេះនឹងមានសមត្ថភាពផលិតទឹកស្អាត ១៩៥ពាន់ម៉ែត្រគូបក្នុងមួយថ្ងៃ។

លោកក៏បានគូសបញ្ជាក់ថា ការពង្រីកសមត្ថភាពផលិតទឹកស្អាតរបស់រោងចក្រភូមិព្រែកចំនួន ៤៥.០០០ ម៉ែត្រគូប ក្នុងមួយថ្ងៃបន្ថែមទៀតនេះ គឹដើម្បីធានាបាននូវការផ្គត់ផ្គង់ទឹកគ្រប់គ្រាន់សម្រាប់អ្នកភ្នំពេញ​ ស្របពេលមានការកើនឡើងយ៉ាងខ្លាំងនៃតម្រូវការទឹក។ ​

បច្ចុប្បន្ននេះ រដ្ឋាករទឹកស្វយ័តក្រុង​ភ្នំពេញមានសមត្ថភាពផលិតទឹកស្អាត ជាង ១លានម៉ែត្រគូបក្នុងមួយថ្ងៃ ខ្ពស់ជាងតម្រូវការបច្ចុប្បន្ន ដែលមានចន្លោះពី ៨៥ម៉ឺនម៉ែត្រគូបក្នុងមួយថ្ងៃ ទៅ ៨៧ម៉ឺនម៉ែត្រគូបក្នុងមួយថ្ងៃ។

• Investments
• Funds