ក្រុមហ៊ុនចំនួន២ ស្នើវិនិយោគប្រព័ន្ធស្រោចស្រព២ម៉ឺនហិកតា និងបង្កើតសួនកម្សាន្តនៅខេត្តកំពង់ចាម

Proeksa Meas
28 ខែតុលា 2026
ព័ត៌មានសំណង់
60 មើល

នាពេលឆាប់ៗខាងមុនេះ ខេត្តកំពង់ចាម នឹងមានសួនកម្សាន្តកុមារ ព្រមទាំងប្រព័ន្ធស្រោចស្រពទំហំ ២ម៉ឺនហិកតា ខណៈបច្ចុប្បន្នក្រុមហ៊ុនឯកជនចំនួន ២ កំពុងស្នើវិនិយោគ ហើយត្រូវបានរដ្ឋបាលខេត្តកំពង់ចាម ពិនិត្យលើសំណើវិនិយោគនេះរួចរាល់ហើយ។

ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានអនុគណៈកម្មការវិនិយោគខេត្តរដ្ឋបាលខេត្តកំពងចាម បានឱ្យដឹងថា កាលព្រឹកថ្ងៃទី១៩ ខែតុលា ឆ្នាំ២០២៦ រដ្ឋបាលខេត្តបានបើកកិច្ចប្រជុំអនុគណៈកម្មការវិនិយោគខេត្ត ដើម្បីពិនិត្យ និងពិភាក្សាលើសំណើសុំវិនិយោគរបស់ក្រុមហ៊ុនឯកជនចំនួន ២។

ឯកឧត្តមបានបញ្ជាក់ថា សំណើសុំវិនិយោគរបស់ក្រុមហ៊ុនឯកជនចំនួន ២ ដែលមានទីតាំងស្ថិតក្នុងភូមិសាស្ត្រក្រុងកំពង់ចាម និងស្រុកព្រៃឈរ ដែលរួមមាន៖ ១. ក្រុមហ៊ុន ហ្សូលី ហ្សានីន ត្រេឌីង ឯ.ក ស្នើសុំវិនិយោគលើគម្រោងបង្កើតសួនកម្សាន្តកុមារសន្តិភាព ដែលមានទីតាំងស្ថិតក្នុងភូមិសាស្ត្រក្រុងកំពង់ចាម និង ២. ក្រុមហ៊ុន ធី អេ អេហ្វ អាហ្គ្រីខលឆ័រ ហ្វើទីឡាយហ្សឺ ឯ.ក ស្នើសុំវិនិយោគលើគម្រោងប្រព័ន្ធស្រោចស្រពក្នុងស្រុកព្រៃឈរ ដែលមានសមត្ថភាពស្រោចស្រពលើផ្ទៃដីប្រមាណជាង ២០.០០០ ហិកតា ក្នុងស្រុកព្រៃឈរ និងស្រុកជើងព្រៃ។

ឯកឧត្តម បានបន្តដែរថា កិច្ចប្រជុំនេះមានគោលបំណងសំខាន់ក្នុងការពិនិត្យ និងពិភាក្សាលើសំណើគម្រោងវិនិយោគទាំងពីរ ដោយយកចិត្តទុកដាក់ខ្ពស់លើទិដ្ឋភាពច្បាប់ បទប្បញ្ញត្តិ និងនីតិវិធីជាធរមាន ដើម្បីធានាថា ការសម្រេចចិត្តលើគម្រោងវិនិយោគនីមួយៗប្រព្រឹត្តទៅដោយត្រឹមត្រូវ ច្បាស់លាស់ តម្លាភាព និងមានប្រសិទ្ធភាពខ្ពស់។

រដ្ឋបាលខេត្តកំពង់ចាម ក៏បានបញ្ជាក់បន្ថែមថា ការពិនិត្យ និងសម្រេចលើសំណើវិនិយោគទាំងនេះ គឺជាកម្លាំងចលករដ៏សំខាន់ក្នុងការជំរុញបរិយាកាសវិនិយោគ និងលើកកម្ពស់ការអភិវឌ្ឍសេដ្ឋកិច្ច-សង្គមក្នុងខេត្តកំពង់ចាម។ ក្នុងនោះ ផ្តោតសំខាន់លើការទាញយកប្រយោជន៍ពីសក្តានុពលមូលដ្ឋាន ការបង្កើតឱកាសការងារជូនប្រជាពលរដ្ឋ និងការជំរុញកំណើនសេដ្ឋកិច្ចក្នុងតំបន់ឱ្យកាន់តែរីកចម្រើន ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា៕ (អានបន្ថែម)

- Video Advertisement -