ក្រុមហ៊ុនជប៉ុនធំមួយមានផែនការវិនិយោគប្រមាណ ៧០០លានដុល្លារបន្ថែមទៀត នៅខេត្តពោធិ៍សាត់

Proeksa Meas
4 ខែសីហា 2026
ព័ត៌មានសំណង់
200 មើល

ក្រុមហ៊ុន MinebeaMitsumi Inc. ដែលជាក្រុមហ៊ុនឈានមុខគេមួយមកពីប្រទេសជប៉ុន មានផែនការពង្រីកការវិនិយោគបន្ថែមទៀតនៅកម្ពុជា ខណៈក្រុមហ៊ុននេះ បានបង្ហើបផែនការវិនិយោគប្រមាណ ៧០០ លានដុល្លារ បន្ថែមទៀតនៅខេត្តពោធិ៍សាត់ផងដែរ។

ថ្លែងក្នុងជំនួបជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលថ្ងៃទី២៨ កក្កដា ឆ្នាំ២០២៦ លោក Yoshihisa Kainuma អគ្គនាយកប្រតិបត្តិក្រុមហ៊ុន MinebeaMitsumi Inc. បានលើកឡើងពីគម្រោងសម្ពោធរោងចក្រថ្មីនៅកម្ពុជា ព្រមទាំងផែនការក្នុងការពង្រីកការវិនិយោគបន្ថែមទៀត របស់ក្រុមហ៊ុននៅកម្ពុជា។ លោកបញ្ជាក់ថា ភាពជោគជ័យ និងការរីកចម្រើនរបស់ក្រុមហ៊ុន ជាកត្តាទាក់ទាញវិនិយោគិនជប៉ុនផ្សេងទៀតឱ្យមកបណ្តាក់ទុននៅកម្ពុជា ហើយក្រុមហ៊ុននៅតែមានជំនឿទុកចិត្តលើបរិយាកាស និងស្ថិរភាពនៃការវិនិយោគនៅកម្ពុជា។

ជាការឆ្លើយតប សម្តេចធិបតី បានលើកទឹកចិត្តឱ្យក្រុមហ៊ុន ពិនិត្យលទ្ធភាពវិនិយោគបន្ថែមលើខ្សែច្រវាក់ផ្គត់ផ្គង់នៅក្នុងស្រុក ស្វែងរកដៃគូសក្តានុពលក្នុងស្រុក និងបន្តកិច្ចសហការជិតស្និទ្ធជាមួយក្រសួង-ស្ថាប័នពាក់ព័ន្ធ ដើម្បីពង្រឹងប្រសិទ្ធភាពនៃការវិនិយោគ ក៏ដូចជាចាប់យកឱកាសថ្មីៗក្នុងការរីកចម្រើនទៅមុខជាមួយកម្ពុជាផងដែរ។

ពាក់ព័ន្ធនឹងផែនការវិនិយោគនៅកម្ពុជានេះដែរ ឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល បានបញ្ជាក់នៅថ្ងៃទី ២៩ ខែកក្កដា ឆ្នាំ២០២៦ ថា ក្រុមហ៊ុនយក្សជប៉ុន MinebeaMitsumi បានវិនិយោគសរុប ១៩០០លានដុល្លារ រយៈពេល១៥ឆ្នាំនៅកម្ពុជា។ ចាប់ផ្ដើមដោយសម្តេចតេជោ ហ៊ុន សែន និងបន្តពូនជ្រុំដោយសម្តេចធិបតី ហ៊ុន ម៉ាណែត ក្រុមហ៊ុននេះ ក៏មានផែនការវិនិយោគ ៦០០-៧០០ លានដុល្លារបន្ថែមទៀតសម្រាប់រយៈពេល១០ឆ្នាំ ជាបន្តនៃគម្រោងជំហានទី២របស់ខ្លួននៅខេត្តពោធិ៍សាត់។ ក្រុមហ៊ុនបញ្ជាក់ថា ថាមពលបៃតងជាគន្លឹះសំខាន់មួយនៃការជ្រើសរើសព្រះកម្ពុជាជាគម្រោងរបស់ក្រុមហ៊ុន៕ (អានបន្ថែម)