ជាង ៣០ឆ្នាំនេះ អង្គការ Halo Trust ជួយកម្ពុជារំដោះផ្ទៃដីមានមីនបានជាង ៥០០គីឡូម៉ែត្រការ៉េ

Sommana Yan
26 ខែកក្កដា 2024
Uncategorized @km
170 មើល

ចាប់ពីឆ្នាំ១៩៩១ រហូតដល់បច្ចុប្បន្ន អង្គការ Halo Trust បានជួយកម្ពុជារំដោះផ្ទៃដីមានមីនចំនួន ៥១១គីឡូម៉ែត្រការ៉េ។ នេះបើតាមជំនួបរវាងឯកឧត្តម ទេសរដ្ឋមន្រ្តី លី ធុជ និងលោក Miles Hawthorn នាយកអង្គការ Halo Trust ប្រចាំនៅកម្ពុជា ចូលជួបសម្តែងការគួរសម និងជម្រាបលា កាលពីថ្ងៃទី២៥ ខែកក្កដា ឆ្នាំ២០២៤។

ក្នុងជំនួបនេះ ឯកឧត្តម ទេសរដ្ឋមន្រ្តី លី ធុជ បានថ្លែងអំណរគុណចំពោះការរួមចំណែករបស់អង្គការ Halo Trust នៅកម្ពុជា ចាប់តាំងពីឆ្នាំ១៩៩១។

អង្គការ Halo Trust បានរំដោះផ្ទៃដីមានមីន និងសំណល់ជាតិផ្ទុះពីសង្រ្គាមបានជាង ៥១១គីឡូម៉ែត្រការ៉េ ដែលរួមមានមីនប្រឆាំងមនុស្សចំនួន ៣២២.០១៥គ្រាប់, មីនប្រឆាំងរថក្រោះចំនួន ៥.១១៧គ្រាប់, សំណល់ជាតិផ្ទុះពីសង្រ្គាមចំនួន ២១៩.៥៧១គ្រាប់ និងអាវុធធុនតូចជាង ១,៥លានគ្រាប់ ត្រូវបានរកឃើញ និងកំទេចចោល។

គួរបញ្ជាក់ថា រយៈពេលជាង ៣០ឆ្នាំកន្លងទៅ កម្ពុជាបានរំដោះផ្ទៃដីមានមីនបានជាង ៣ពាន់គីឡូម៉ែត្រការ៉េ ខណៈកម្ពុជា នៅសល់ផ្ទៃដីមិនទាន់ដោះមីន និងយុទ្ធភណ្ឌមិនទាន់ផ្ទុះប្រមាណ ១.៨៥៤ គីឡូម៉ែត្រការ៉េទៀត។ (អានបន្ថែម)