បច្ចុប្បន្នខេត្តមណ្ឌលគិរីកសាងផ្លូវបាន ៩៩ខ្សែ ប្រវែងជាង ៨៥ម៉ឺនគីឡូម៉ែត្រ

Sommana Yan
8 ខែមេសា 2023
Uncategorized
187 មើល

គិតរហូតមកទល់នឹងមកនេះ រដ្ឋបាលខេត្តមណ្ឌលគិរីមានបណ្តាញផ្លូវក្នុងខេត្តប្រវែងសរុបចំនួន ៨៥១.៣៧៦គីឡូម៉ែត្រ ដែលក្នុងនោះ ផ្លូវខេត្តមានចំនួន ៨ខ្សែ ផ្លូវក្រុងចំនួន ៥៩ខ្សែ និងផ្លូវលំចំនួន ៣២ខ្សែ។

នេះបើតាមប្រសាសន៍របស់ឯកឧត្តម ស៊ន សារុន អភិបាលរងខេត្តមណ្ឌលគិរី ថ្លែងក្នុងសន្និសីទសារព័ត៌មាននៅថ្ងៃទី០៦ ខែមេសា ឆ្នាំ២០២៣នេះ។

ឯកឧត្តមបានលើកឡើងថា បច្ចុប្បន្ន រដ្ឋបាលខេត្តបាននិងកំពុងយកចិត្ដទុកដាក់លើការជំរុញដល់ការងារកសាងជួសជុល ថែទាំ ផ្លូវជាតិ ផ្លូវខេត្តនិងបន្តកសាងផ្លូវខេត្ត ផ្លូវជនបទ ឱ្យមានគុណភាពខ្ពស់ ក្នុងគោលបំណងតភ្ជាប់បណ្តាញផ្លូវពីទីរួមខេត្ត ទៅស្រុក និងពីស្រុកមកទីរួមខត្ត។

ឯកឧត្តមមានប្រសាសន៍ថា «បច្ចុប្បន្ននេះ ពាក់ព័ន្ធនឹងវិស័យគមនាគមន៍ ខេត្តកសាងផ្លូវក្នុងខេត្តបានប្រវែងសរុប ៨៥១.៣៧៦គីឡូម៉ែត្រ។ ក្នុងនោះ ផ្លូវខេត្តមានចំនួន ៨ខ្សែ ប្រវែងសរុប ៣៣០គីឡូម៉ែត្រ ផ្លូវក្រុង ៥៩ខ្សែ មានប្រវែង ៦៥គីឡូម៉ែត្រ ផ្លូវលំ ៣២ខ្សែ ប្រវែង ២៥៥គីឡូម៉ែត្រ»។

យោងតាមការបញ្ជាក់របស់អភិបាលរងខេត្ត សម្រាប់ផ្លូវជាតិ ដែលឆ្លងកាត់ខេត្តមណ្ឌលគិរី មានផ្លូវជាតិលេខ៧៦ ភ្ជាប់ពីស្រុកស្នួល ខេត្តក្រចេះ មកកាន់ក្រុងសែនមនោរម្យ ខេត្តមណ្ឌលគីរី ប្រវែង ១២៧គីឡូម៉ែត្រ និងពីក្រុងសែនមនោរម្យ ទៅកាន់តាអុង ស្រុកកូនមុំ ខេត្តរតនគិរី ប្រវែង ១៧២គីឡូម៉ែត្រ។ ក្រៅពីនេះ មានផ្លូវលេខ៧៥ ភ្ជាប់ពីស្រុកកោះញ៉ែក ទៅកាន់ស្រុកចិត្របុរី ខេត្តក្រចេះ មានប្រវែងសរុប ១៥០គីឡូម៉ែត្រ។ ចំណែកផ្លូវច្រកទ្វារព្រំដែនទ្វេភាគី តភ្ជាប់តំបន់ព្រំដែនជាមួយប្រទេសវៀតណាមមានចំនួនបីខ្សែ មានប្រវែង ៨៧គីឡូម៉ែត្រ៕

- Video Advertisement -