បន្ទាយមានជ័យមានតំបន់សេដ្ឋកិច្ចពិសេសរហូតដល់ ៥ទីតាំង បង្កើតការងារបានជាង២ម៉ឺនកន្លែង

• 21 ខែ​មិថុនា 2023
• ព័ត៌មានក្នុងស្រុក
• 12 មើល

ខេត្តបន្ទាយមានជ័យមានតំបន់សេដ្ឋកិច្ចពិសេសចំនួន ៥កន្លែង និងមានរោងចក្រជិត ២០រោងចក្រ ដែលបង្កើតការងារដល់ប្រជាពលរដ្ឋជាង ២ម៉ឺននាក់។ នេះបើតាម ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ដែលបានប្រាប់អ្នក យកព័ត៌មានរបស់វិទ្យុជាតិកម្ពុជា កាលពីថ្ងៃទី១៩ ខែមិថុនា ឆ្នាំ២០២៣។

ឯកឧត្តមអភិបាល បានថ្លែង​ឱ្យដឹងថា​ ខេត្តបន្ទាយមានជ័យមានតំបន់សេដ្ឋកិច្ចពិសេសចំនួន៥ ក្នុងនោះមាន ៤ កំពុងដំណើរការ និងសួនឧស្សាហកម្ម១ ដែលមានរោងចក្រជិត ២០រោងចក្រ ដែលបានផ្តល់ការងារជាង ២ម៉ឺនកន្លែងជូនប្រជាពលរដ្ឋ។

ក្រៅពីនេះ មូលដ្ឋានផលិតកម្មសិប្បកម្មតូចៗជាង ១ពាន់ទៀត ដែលមានបុគ្គលិក  ២នាក់ ៣នាក់ ៥នាក់ ១០នាក់ ២០នាក់ផងដែរ។ រោងចក្រ សហគ្រាសទាំងអស់នេះ កំពុងដំណើរការលើការងារផលិតគ្រឿងអលង្ការ វាយនភ័ណ្ឌ និងកែច្នៃផល និងអនុផលកសិកម្ម។

ឯកឧត្តមអភិបាលបានបន្ថែមទៀតថា តាមរយៈឧស្សាហកម្មទាំងនេះ បានប្រែក្លាយខេត្តបន្ទាយមានជ័យ ពីតំបន់ដាច់ស្រ​យាល និងស្ងាត់ដែលគ្មានមនុស្សរស់នៅ ទៅជាតំបន់អ៊ូអរពេញទៅដោយការអភិវឌ្ឍ  លើហេដ្ឋារចនាសម្ព័ន្ធគ្រប់បែ​ប​យ៉ាង ជាពិសេសទីក្រុងប៉ោយប៉ែត​ហើយប្រជាពលរដ្ឋមានការងារធ្វើគ្រប់ៗគ្នា ដែលម្នាក់ៗទទួលបានចំណូលសមរម្យ និងមានជីវិតដ៏ស៊ីវីល័យ​។

លើសពីនេះ ​​ឯកឧត្តម បានបញ្ជាក់ថា ក្រុមហ៊ុនដែលបោះទុនវិនិយោគក្នុងតំបន់សេដ្ឋកិច្ចពិសេសនៅខេត្តបន្ទាយមានជ័យ ភាគច្រើនជាក្រុមហ៊ុនបរទេសមានដូចជា ក្រុមហ៊ុនថៃ ជប៉ុន និងចិនជាដើម។

• Economy and Finance