ម្ចាស់បំណុលរបស់ Evergrande ច្រានចោលផែនការពន្យារពេលសងប្រាក់ ៦៧១លានដុល្លារ

webmaster@construction-property.com
12 ខែកក្កដា 2022
Uncategorized @km
87 មើល

ម្ចាស់បំណុលជាច្រើនដែលជាអ្នកទិញប័ណ្ណបំណុលរបស់ក្រុមហ៊ុនអភិវឌ្ឍន៍អចលនទ្រព្យខ្នាតយក្ស Evergrande Group របស់ចិន បានធ្វើការច្រានចោលផែនការពន្យារការទូទាត់សងបំណុលរបស់ក្រុមហ៊ុនមួយនេះ ដែលមានទឹកប្រាក់ប្រមាណ ៤,៥ពាន់លានយ័ន ស្មើនឹង ៦៧១លានដុល្លារអាមេរិក។ នេះបើតាមការចុះផ្សាយរបស់ Asia financial កាលពីថ្ងៃទី១១ ខែកក្កដា ឆ្នាំ២០២២។

Evergrande បានថ្លែងការណ៍ទៅកាន់ផ្សារមូលបត្រ Shenzhen ថា ខ្លួនកំពុងចរចារជាមួយម្ចាស់បំណុលទាំងនោះ ដើម្បីឱ្យមានការព្រមព្រៀងមួយឱ្យបានកាន់តែឆាប់ បើអាចទៅរួច។

Evergrande បានឱ្យដឹងបន្ថែមទៀតថា ខ្លួនបាននឹងកំពុងរៀបចំផែនការដោះបំណុល ដែលចង់ឱ្យម្ចាស់បំណុលក្រៅប្រទេស ដែលខ្លួនបានជំពាក់ជិត ២៣ពាន់លានដុល្លារអាមេរិក ឱ្យជួយប្រឆាំងនឹងបណ្តឹងសុំឱ្យរំលាយក្រុមហ៊ុន នៅពេលដែលបណ្តឹងនេះបានទៅដល់ដៃតុលាការនៅថ្ងៃទី៣១ ខែសីហា ខាងមុខនេះ។

ជាមួយគ្នានេះផងដែរ កាលពីសប្តាហ៍មុន Evergrande ក៏បានពិនិត្យមើលថាតើម្ចាស់បំណុលក្រៅ ប្រទេសណាមួយ នឹងមានផែនការត្រឡប់មកប្តឹងឱ្យរំលាយក្រុមហ៊ុនមហាយក្សនេះម្តងទៀត នៅទីក្រុងហុងកុង។

យ៉ាងណាមិញ ក្រុមហ៊ុន Top Shine Global Ltd ជាអ្នកវិនិយោគក្នុងក្រុមហ៊ុន Evergrande ក្នុងផ្នែក Fangchebao (ជាផ្នែកលក់អចលនទ្រព្យតាមអនឡាញ និងលក់យានយន្ត) បានដាក់ពាក្យប្តឹងឱ្យរំលាយក្រុមហ៊ុន ដោយសារក្រុមហ៊ុន មិនគោរពទៅនឹងកិច្ចព្រមព្រៀង ដែលថានឹងទិញហ៊ុនពី Top Shine Global Ltd វិញ។

បើតាមប្រភពដដែលនេះ ក្រុមហ៊ុនដែលកំពុងជំពាក់គេវ័ណ្ឌកមួយនេះ ពីមុនបានជំពាក់ម្ចាស់បំណុលបរទេសប្រមាណ ១៩ពាន់លានុដុល្លារ បានរៀបចំសងជាសាច់ប្រាក់បណ្តើរៗ ឬសងជាភាគលាភ តាមរយៈផ្នែកសេវាកម្ម ឬផ្នែកលក់ឡានអគ្គិសនីរបស់ខ្លួន។

ឥឡូវនេះ Evergrande កំពុងទ្រេតទ្រោតចង់ដួល ដោយសារជាប់បំណុលគេជាង ៣០០ពាន់លានដុល្លារអាមេរិក ហើយក្លាយជានិមិត្តរូបអាក្រក់នៃវិបត្តិវិស័យអចលនទ្រព្យរបស់ចិន ដោយសារខ្លួនបានខកខានមិនបានសងសំណងឱ្យបានទៀងទាត់ទៅម្ចាស់បំណុល។

ក្រឡេកងាកមកកម្ពុជាវិញ អតីតនាយកគ្រប់គ្រងនៃក្រុមហ៊ុន CBRE Cambodia លោក James Hodge បានវិភាគថា ការវិបត្តិ Evergrande នឹងមិនមានផលប៉ះពាល់ដោយផ្ទាល់មកលើប្រទេសកម្ពុជាទេ ដោយសារក្រុមហ៊ុននេះមិនមានការវិនិយោគនៅកម្ពុជា។ ប៉ុន្តែវានឹងជះឥទ្ធិពលដោយប្រយោលទៅលើស្ថានភាពទីផ្សារក្នុងរយៈពេលខ្លី។ (អានបន្ថែម)

- Video Advertisement -