រដ្ឋកំពុងរៀបខេត្តជាប់សមុទ្រចំនួន៤ ជារបៀងសេដ្ឋកិច្ចពហុបំណង និងប្រទាក់ក្រឡា

• 4 ខែ​មេសា 2024
• Uncategorized
• 10 មើល

គណៈកម្មាការអន្តរក្រសួង កំពុងរៀបចំដាក់ខេត្តចំនួន៤ ជាប់មាត់សមុទ្ររួមមានខេត្តកំពត ខេត្តកោះកុង ខេត្តព្រះសីហនុ និងខេត្តកែប ជារបៀងសេដ្ឋកិច្ចពហុបំណង និងប្រទាក់ក្រឡា។ នេះបើតាមផេកហ្វេកប៊ុកផ្លូវការរបស់រដ្ឋបាលខេត្តព្រះសីហនុ​កាលពីថ្ងៃទី៣ ខែមេសា ឆ្នាំ២០២៤។

ប្រភពនេះ បាន​ឱ្យដឹងថា ក្រុមការងារបច្ចេកទេសអន្តរក្រសួងសម្របសម្រួលរៀបចំផែនការមេអភិវឌ្ឍខេត្តព្រះសីហនុទៅជា តំបន់សេដ្ឋកិច្ចគំរូពហុបំណង (ក.ប.ស.ផ.) បានរៀបចំកិច្ចប្រជុំមួយ កាលពីថ្ងៃទី១ ខែមេសា ដើម្បីពិនិត្យ និងផ្តល់មតិយោបល់បច្ចេកទេសកម្រិតម៉ាក្រូ លើខ្លឹមសាររបាយការណ៍នៃផែនការមេអភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង។

ក្នុងនោះដែរ កិច្ចប្រជុំនេះ បានពិនិត្យ និងពិភាក្សាលើខ្លឹមសាររបាយការណ៍នៃផែនការមេនេះ ដោយបន្ស៊ីគ្នាជាមួយសក្តានុពលនៃបណ្តាខេត្តជាប់ឆ្នេរសមុទ្រកម្ពុជាទាំង៤ ឱ្យទៅជារបៀងសេដ្ឋកិច្ចពហុបំណង និងប្រទាក់ក្រឡា។​

ជាលទ្ធប្រជុំនៃកិច្ចប្រជុំខាងលើ ក្រុមការងារអន្តរក្រសួង បានផ្តល់មតិលើខ្លឹមសារសំខាន់​ៗ ក្នុងន័យបំពេញបន្ថែម លើផ្នែកទិន្នន័យពាក់ព័ន្ធ និងទិសដៅអភិវឌ្ឍន៍ ឱ្យមានភាពបន្ស៊ីគ្នាកាន់តែខ្លាំងទាំងកម្រិតគោលនយោបាយជាតិ និងការអភិវឌ្ឍថ្នាក់ក្រោមជាតិ។

ទន្ទឹមនឹងនេះដែរ ក្រុមការងារ នឹងបូកសរុបមតិ ដើម្បីបំពេញបន្ថែមក្នុងរបាយការណ៍ ​មុនដាក់ជូន រាជរដ្ឋាភិបាលអនុម័តនាពេលឆាប់ៗខាងមុខ។

​​​គួរបញ្ជាក់ថា ផែនការមេអភិវឌ្ឍខេត្តព្រះសីហនុឱ្យទៅជាតំបន់សេដ្ឋកិច្ចពិសេសគំរូពហុបំណង ដំណាក់កាលទី១ ត្រូវបានបញ្ចប់ហើយ ខណៈដំណាក់កាលទី២ បាននឹងកំពុងពិនិត្យ ពិភាក្សាលើ ១២ចំណុចសំខាន់ៗ ដើម្បីឱ្យមានភាពច្បាស់លាស់ និងគ្រប់ជ្រុងជ្រោយ។ (អានបន្ថែម)

• Economy and Finance