រដ្ឋអនុម័តបញ្ចេញកញ្ចប់ថវិកា ១០០លានដុល្លារ បន្ថែមទៀត ដើម្បីជួយទ្រទ្រង់ SME

• 17 ខែ​សីហា 2021
• 11 មើល

ក្រសួងសេដ្ឋកិច្ច និងហិរញ្ញវត្ថុ បានសម្រេចអនុវត្តគម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម (SME) ជំហានទី២ ជាមួយនឹងទំហំទឹកប្រាក់ប្រមាណ ១០០លានដុល្លារអាមេរិក បន្ទាប់ពីជំហានទី១ ទទួលបានជោគជ័យ។ នេះបើតាមសេចក្តីប្រកាសព័ត៌មានកាលពីថ្ងៃទី ១៦ ខែសីហា កន្លងទៅ។

គម្រោងនេះ មានគោលបំណងផ្តល់កម្ចីមានការប្រាក់ទាប ដល់សហគ្រាសធុនតូច និងមធ្យម ក្នុងវិស័យអាទិភាព ដូចជា ឧស្សាហកម្ម សេវាកម្ម និងពាណិជ្ជកម្ម ដើម្បីយកទៅទ្រទ្រង់អាជីវកម្ម និងប្រើជាទុនបង្វិលក្នុងអំឡុងវិបត្តិកូវីដនេះ។

ចំពោះកម្ចីសម្រាប់ចំណាយមូលធន ក្រុមហ៊ុនអាចខ្ចីបានខ្ពស់បំផុត ៥០ម៉ឺនដុល្លារ ខណៈកម្ចីទុនបង្វិល គឺអាចខ្ចីខ្ពស់បំផុតដល់ទៅ ៣០ម៉ឺនដុល្លារ។

ដូច្នេះ សម្រាប់ក្រុមហ៊ុនដែលចាប់អារម្មណ៍អាចទៅទាក់ទងនៅធនាគារសហគ្រាសធុនតូច និងមធ្យម កម្ពុជា ម.ក (ធ.ស.ក) និងគ្រឹះស្ថានហិរញ្ញវត្ថុដៃគូសរុបចំនួន ២៦ ស្ថាប័ន។

គួរបញ្ជាក់ថា នេះជាការអនុវត្តគម្រោងជំហានទី២ ក្រោយការអនុវត្តជំហានទី១ កាលពីខែមេសា ឆ្នាំ២០២០ ទទួលបានជោគជ័យ ដោយប្រើប្រាស់ថវិកាអស់ប្រមាណ ១០០លានដុល្លារអាមេរិក ដែលមានការចូលរួមពីគ្រឹះស្ថានហិរញ្ញវត្ថុចំនួន ៣៣។

• Economy and Finance