រថភ្លើងល្បឿនលឿនដំបូងបង្អស់របស់ឥណ្ឌូណេស៊ី តម្លៃជាង ៧ពាន់លានដុល្លារ បើកដំណើរការហើយ

• Sommana Yan
• 13 ខែ​តុលា 2023
• ព័ត៌មានអន្តរជាតិ
• 144 មើល

ប្រទេសឥណ្ឌូណេស៊ី​ កាលពីថ្ងៃទី០២ ខែតុលាកន្លងមក បានបើកដំណើរការផ្លូវរថភ្លើងល្បឿនលឿនដំបូងរបស់ខ្លួននៅអាស៊ីអាគ្នេយ៍ ដែលមានតម្លៃរហូតដល់ទៅជាង ៧.៣ពាន់លានដុល្លារ និងជាគម្រោងដ៏សំខាន់នៃគំនិតផ្តួចផ្តើមខ្សែក្រវាត់ និងផ្លូវរបស់ប្រទេសចិនផងដែរ​។ នេះបើយោងតាមការចុះផ្សាយរបស់សារព័ត៌មាន CNN នៅថ្ងៃទី០២ តុលា ២០២៣។

ប្រធានាធិបតីឥណ្ឌូណេស៊ី​ លោក Joko Widodo បានថ្លែងថា ផ្លូវរថភ្លើងនេះត្រូវបានគេហៅថា WHOOSH ដែលជាអក្សរកាត់មកពីពាក្យថា “ការសន្សំពេលវេលា ប្រតិបត្តិការល្អបំផុត ប្រព័ន្ធដែលអាចទុកចិត្តបាន”។

ប្រធានាធិបតី Joko Widodo បានបញ្ជាក់បន្ថែមថា រថភ្លើងនេះត្រូវបានតភ្ជាប់ស្ថានីយ៍រថភ្លើង Halim រដ្ឋធានីហ្សាការតាទៅកាន់ស្ថានីយ៍រថភ្លើង Padalarang របស់ ក្រុងបានដុង (Bandung) ដែលជាមជ្ឈមណ្ឌលសេដ្ឋកិច្ច របស់ឥណ្ឌូនេស៊ី និងជាមណ្ឌលសិល្បៈ និងវប្បធម៌ដ៏សំខាន់មួយផងដែរ។ ម្យ៉ាងទៀត ខ្សែរថភ្លើងនេះមានសមត្ថភាពអាចដឹកអ្នកដំណើរបានរហូតដល់ ៦០០នាក់ និងអាចបើកក្នុងល្បឿនអតិបរមា ៣៥០គីឡូម៉ែត្រ ក្នុងមួយម៉ោង។

គួរបញ្ជាក់ថា ដំបូងឡើយ គម្រោងផ្លូវរភ្លើងនេះគ្រោងនឹងបញ្ចប់នៅឆ្នាំ២០១៩ ប៉ុន្តែដោយសារជម្លោះដីធ្លី បញ្ហាជំងឺរាតត្បាតកូវីដ-១៩ និងការចំណាយបន្ថែមលើផែនការរហូតដល់ជាង ១.២ពាន់លានដុល្លារ បានបណ្តាលឱ្យដំណើរការសាងសង់គម្រោងដ៏ធំនេះមានការយឺតយ៉ាវជាងផែនការ។

គម្រោងនេះត្រូវបានសាងសង់ដោយក្រុមហ៊ុន PT Kereta Cepat Indonesia China ដែលមានការចូលរួមដោយក្រុមហ៊ុនរដ្ឋឥណ្ឌូនេស៊ីចំនួន ៤ និងក្រុមហ៊ុនចិន China Railway International Co. Ltd៕

• Road and Infrastructure