ក្រុមហ៊ុនកាស៊ីណូម៉ាកាវពន្យារទិញដី ១២០០ ហិចតា នៅសៀមរាប ទៅឆ្នាំក្រោយ
ក្រុមហ៊ុនប្រតិបត្តិការកាស៊ីណូម៉ាកាវ Macau Legend ប្រកាសពន្យារលទ្ធកម្មដី និងគម្រោងអភិវឌ្ឍន៍រីស៊តចម្រុះ (Integrated Resort) លើដី ១២០០ ហិចតា លើទឹកដីខេត្តសៀមរាប ទៅឆ្នាំក្រោយ ដោយសារផលវិបាកដែលកើតឡើងដោយវិបត្តិកូវីដ ១៩។ នេះបើយោងតាមសារព័ត៌មាន Inside Asia Gaming កាលពីថ្ងៃទី ២៩ មិថុនា ២០២០នេះ។
ក្រុមហ៊ុន Macau Legend បានឱ្យដឹងថា ក្រុមហ៊ុនបានពន្យារកាលបរិច្ឆេទនៃកិច្ចព្រមព្រៀងបំពេញលក្ខខណ្ឌដើម្បីការកាន់កាប់ដី ទៅថ្ងៃទី ២៦ មិថុនា ២០២១វិញ ដោយសារក្រុមហ៊ុនមិនអាចបញ្ចប់ដំណើរការវាយតម្លៃការបំពេញលក្ខខណ្ឌលទ្ធកម្មកម្មសិទ្ធិនេះទាន់តាមកាលបរិច្ឆេទបាន ព្រោះតែផលវិបាកមួយចំនួន ដែលបណ្តាលមកពីជំងឺកូវីដ ១៩។
លក្ខខណ្ឌលទ្ធកម្មទាំងនោះត្រូវបានកំណត់ដោយក្រុមហ៊ុនទៅឲ្យអ្នកលក់ដី រួមមានដូចតទៅ៖
“ដីនេះត្រូវតែជាដីទំនេរ គ្មានអ្នកកាន់កាប់ មិនមានជាប់ជាទ្រព្យបញ្ចាំ មិនមែនជាដីកេរអាករហើយគ្មានអ្នកភូមិ អ្នកដំណើរ សាលារៀននិងសិស្សណាប្រើប្រាស់ឡើយ។ ត្រូវតែជាដីដែលគ្មានជាប់ជម្លោះបញ្ចាំ កិច្ចសន្យានិងកាតព្វកិច្ចធានាផ្សេងៗ។ បន្ថែមពីនេះ ក្រុមហ៊ុនក៏តម្រូវឱ្យដីនោះ មានលក្ខណៈជាដីជាប់គ្នា និងមានឯកសារពាក់ព័ន្ធសម្រាប់បញ្ចាក់ឲ្យបានត្រឹមត្រូវ។”
ក្រុមហ៊ុន Macau Legend Development Limited បានឱ្យដឹងកាលពីចុងឆ្នាំ ២០១៨ ថា ខ្លួនបានទិញយកក្រុមហ៊ុន Howing Enterprises Co. Ltd ព្រមទាំងទិញដី ១២០០ ហិចតា ក្នុងតម្លៃ៩០ លានដុល្លារ។ បន្ទាប់ពីទទួលបានកម្មសិទ្ធិដីតំបន់នេះហើយ ក្រុមហ៊ុនមានគោលបំណងសាងសង់និងអភិវឌ្ឍរីស៊តចម្រុះ មានដូចជា កាស៊ីណូ និងបដិសណ្ឋារកិច្ចផ្សេងៗ ក្នុងខេត្តសៀមរាប ដែលជាការចូលរួមចំណែក និងផ្ដល់អត្ថប្រយោជន៍ដល់វិស័យទេសចរណ៍នៅកម្ពុជាសម្រាប់ការអភិវឌ្ឍរយៈពេលវែងរបស់ក្រុមហ៊ុន ក៏ដូចជាបង្កើនប្រាក់ចំណូលដល់ក្រុមហ៊ុនរបស់ខ្លួនផងដែរ។
ហើយក្នុងឆ្នាំបន្ទាប់ នាយកប្រតិបត្តិរបស់ក្រុមហ៊ុន Macau Legend Development Ltd លោក Sheldon Trainer បានឲ្យដឹងថា “មានគេហាមឃាត់មិនឲ្យលោកធ្វើកាស៊ីណូនៅខេត្តសៀមរាបនេះ។ក៏ប៉ុន្តែ កន្លែងអភិវឌ្ឍន៍រីស៊តចម្រុះរបស់យើង មានចម្ងាយរហូតដល់ ៥០ គ.ម ឯណោះ ពីតំបន់ប្រាសាទអង្គរ។”
លោកបាននិយាយថា៖ «ទេសចរណ៍ខេត្តសៀមរាបជាទូទៅល្អ យើងក៏អាចធ្វើគម្រោងនេះដោយគ្មានកាស៊ីណូបានដែរ។ ប៉ុន្តែ ប្រសិនបើគេអនុញ្ញាតឲ្យយើងធ្វើកាស៊ីណូបាន នោះរឹតតែល្អ តែយើងអាចនឹងប្ដូរទីតាំងទៅកន្លែងផ្សេងទៀត។ (អានបន្ថែម)
ក្រុមហ៊ុន Macau Legend ប្រតិបត្ដិការនៅតំបន់ Macau Fisherman’s Wharf ក្នុងឧបទ្វីបម៉ាកាវដែលរួមបញ្ចូលទាំងគម្រោង លេជេនផាលេស (Legend Palace) និងកាស៊ីណូបាប៊ីឡូន (Babylon Casino) ដែលមានសណ្ឋាគារនិងកន្លែងដែលមិនមែនជាកាស៊ីណូផ្សេងទៀត។ក្រុមហ៊ុននេះ ក៏បានបើកដំណើរការនូវសណ្ឋាគារ រីស៊តមជ្ឃមណ្ឌលកម្សាន្ត Savan Legend Resorts Hotel and Entertainment Complex ក្នុងប្រទេសឡាវ ដែលក្នុងនោះ មានទាំងបើកកាស៊ីណូកន្លែងមួយផងដែរ៕
- Video Advertisement -
English 
ខ្មែរ 
