ADB៖ កំណើនសេដ្ឋកិច្ចកម្ពុជានឹងស្ទុះមក ៥,៩% នៅឆ្នាំ ២០២១ តែវិស័យសំណង់នៅតែមានហានិភ័យ

• 25 ខែ​កញ្ញា 2020
• Uncategorized
• 8 មើល

ធនាគារអភិវឌ្ឍន៍អាស៊ី (ADB) កាលពីពេលថ្មីៗនេះ បានព្យាករណ៍សារជាថ្មីថា កំណើនសេដ្ឋកិច្ចកម្ពុជានឹងស្ទុះមក ៥,៩% នៅឆ្នាំ ២០២១ ខណៈវិស័យសំណង់ និងវិស័យកាត់ដេរ អាចនឹងមិនទាន់ងើបឡើងនៅឡើយទេ។

សេចក្ដីប្រកាសព័ត៌មានរបស់ ADB កាលពីថ្ងៃទី ២៣ កញ្ញា នេះ ក៏បានព្យាករណ៍សារជាថ្មីថា ផលិតផលក្នុងស្រុកសរុបរបស់កម្ពុជានៅឆ្នាំ ២០២០ គឺធ្លាក់ចុះត្រឹមតែ ៤% ប៉ុណ្ណោះ ដែលប្រសើរជាងការព្យាករណ៍កាលពីខែ មិថុនា ដែលថាធ្លាក់ចុះ ៥,៥%។

ការប្រសើរឡើងនេះគឺដោយសារតែ វិស័យកសិកម្ម និងកំណើនការនាំចេញផលិតផលវិស័យដែលមិនមែនកាត់ដេរ ដូចជា កង់ និងគ្រឿងអេឡិចត្រូនិចជាដើម (ដែលកើនឡើងប្រមាណ ៣០,៣% ក្នុងឆមាសទី ១ ឆ្នាំ ២០២០ បើធៀបនឹងឆ្នាំ ២០១៩)។

យ៉ាងណាមិញ វិស័យផ្សេងៗរួមមាន វិស័យសំណង់ និងឧស្សាហកម្មកាត់ដេរ នៅតែបន្តថមថយក្នុងកំឡុងខែ មិថុនា និងខែ កក្កដា ហើយតម្រូវការក្នុងវិស័យទាំង ២ នេះ ក៏បន្តធ្លាក់ចុះផងដែរក្នុងកំឡុងពេលកូវីដ ១៩នេះ។

គួរបញ្ជាក់ផងដែរថា ធនាគារអភិវឌ្ឍន៍អាស៊ីក៏បានផ្ដល់ហិរញ្ញប្បទានចំនួន ២៥០ លានដុល្លារ កាលពីខែកក្កដា កន្លងទៅ ដើម្បីពង្រឹងប្រព័ន្ធសុខាភិបាល ពង្រីកការគាំពារសង្គម និងគាំទ្រដល់ការស្តារសេដ្ឋកិច្ចឡើងវិញក្នុងកំឡុងពេលកូវីដ ១៩ ផងដែរ។

• Economy and Finance