គម្រោងហេដ្ឋារចនាសម្ព័ន្ធច្រើនសន្ធឹកសរុបជិត ៣០ប៊ីលានដុល្លារ ពីមហិច្ឆតា និងយុទ្ធសាស្ដ្រជំរុញសេដ្ឋកិច្ចរបស់កម្ពុជា
ខណៈពិភពលោកកំពុងប្រឈមនឹងវិបត្តិសេដ្ឋកិច្ច សង្រ្គាម និងឥទ្ធិពលអវិជ្ជមានសេសសល់ពីជំងឺរាតត្បាតកូវីដ១៩ ក្នុងដើមឆ្នាំ ២០២៣ នេះ កម្ពុជាបែរជាងាកមកសម្រុកប្រកាស និងបើកការដ្ឋានសាងសង់គម្រោងហេដ្ឋារចនាសម្ព័ន្ធជាច្រើនសន្ធឹកសន្ធាប់ទៅវិញ ដែលបូករួមជាទុនវិនិយោគ គឺមានសរុបដល់ជាង ៣០ប៊ីលានដុល្លារ ឯណោះ។
គម្រោងខ្នាតធំដែលកម្ពុជាមិនធ្លាប់មានពីមុន គឺគម្រោងធ្វើទំនើបកម្មប្រព័ន្ធផ្លូវដែកទូទាំងប្រទេស។
កម្ពុជាគ្រោងនឹង ធ្វើទំនើបកម្មប្រព័ន្ធផ្លូវដែក ភ្នំពេញ-ប៉ោយប៉ែត ប្រវែងប្រមាណ ៣៨២គ.ម ឱ្យក្លាយទៅជាផ្លូវរថភ្លើងល្បឿនលឿនស្ដង់ដារដំបូងគេបំផុតនៅកម្ពុជា ដែលមានតម្លៃជាង ៤ពាន់លានដុល្លារ។
គម្រោងនេះកំពុងសិក្សាដោយ ក្រុមហ៊ុនសាជីវកម្មថ្នល់ និងស្ពានចិន (CRBC) ជាមួយក្រសួងសាធារណការ និងដឹកជញ្ជូន ដោយទុនវិនិយោគប្រមាណជាង ៤ពាន់លានដុល្លារនេះ នឹងរួមបញ្ចូលទាំងក្បាល និងទូរថភ្លើង ហើយប្រើប្រាស់រយៈពេលសាងសង់ប្រមាណ ៤ឆ្នាំ។
ផ្លូវរថភ្លើងល្បឿនលឿននេះដែរ មានខ្នាតទទឹងប្រវែង ១.៤៣៥ មម ល្បឿនសម្រាប់ធ្វើចរាចរណ៍គឺ ១៦០គ.ម/ម៉ និងមានស្ថានីយសរុបចំនួន៣៣ សម្រាប់ដំណើរការ។ (អានបន្ថែម)
ទាក់ទងនឹងវិស័យផ្លូវដែកនេះ ប្រធានាធិបតីចិនលោក ស៊ី ជិនពីង ថ្មីៗបានផ្តល់ជំនួយឥតសំណង ក្នុងទំហំទឹកប្រាក់ ៣០០លានយ័ន ដែលស្មើនឹងប្រមាណ ៤៤ លានដុល្លារអាមេរិក ដើម្បីគាំទ្រដល់គម្រោងអភិវឌ្ឍផ្លូវដែកនៅកម្ពុជា។ (អានបន្ថែម)
លើសពីនេះ កម្ពុជាក៏កំពុងស្នើក្រុមហ៊ុនចិន China Metro Group Limited សិក្សាពីគម្រោងផ្លូវល្បឿនលឿន និងរថភ្លើងល្បឿនលឿនធន់ស្រាលចំនួន ២ គម្រោង ផងដែរ សម្រាប់រាជធានីភ្នំពេញ និងខេត្តសៀមរាប ដើម្បីកាត់បន្ថយការកកស្ទះចរាចរណ៍។
គម្រោងទី ១ គឺវិនិយោគផ្លូវល្បឿនលឿនធុនស្រាលពីរាជធានីភ្នំពេញ ទៅកាន់អាកាសយានដ្ឋានអន្តរជាតិភ្នំពេញថ្មី និងផ្លូវរថភ្លើងល្បឿនលឿនធុនស្រាលក្នុងរាជធានីភ្នំពេញ។
គម្រោងទី ២ គឺគម្រោងវិនិយោគផ្លូវរថភ្លើងល្បឿនលឿនធុនស្រាលពីខេត្តសៀមរាប ទៅកាន់អាកាសយានអន្តរជាតិថ្មីនៅជីក្រែង ក្នុងខេត្តសៀមរាប។(អានបន្ថែម)
ក្រៅពីជំនួយ និងការសិក្សាពីចិន កម្ពុជាក៏កំពុងជំរុញឱ្យបារាំងវិនិយោគសាងសង់រថភ្លើងល្បឿនលឿនភ្នំពេញ – ហូជីមិញ ផងដែរ ។
សម្ដេចនាយករដ្ឋមន្រ្តី ហ៊ុន សែន បានជម្រាបជូន ប្រតិភូវិនិយោគបារាំងថា កម្ពុជាអនុញ្ញាតឲ្យធ្វើការវិនិយោគ ១០០% សម្រាប់ផ្លូវដែកថ្មីល្បឿនលឿនពីទីក្រុងភ្នំពេញ ទៅកាន់ទីក្រុងហូជីមិញ។ ចំពោះផ្លូវដែក ២ខ្សែទៀត ដែលមានស្រាប់ គឺត្រូវធ្វើការពង្រីក ហើយលើកទឹកចិត្តឲ្យមានការ វិនិយោគពីវិស័យឯកជនតាមរយៈគម្រោង B.O.T។ (អានបន្ថែម)
លើសពីនេះ ផ្លូវល្បឿនលឿនភ្នំពេញ-បាវិត ដែលជាផ្លូវល្បឿនលឿនខ្សែទី ២ នៅកម្ពុជា នឹងបើកការដ្ឋានសាងសង់នៅខែមិថុនា ឆ្នាំ២០២៣នេះ ខណៈបច្ចុប្បន្នក្រុមអ្នកបច្ចេកទេស និងភាគីពាក់ព័ន្ធ កំពុងពន្លឿនសិក្សាផលប៉ះពាល់។
ផ្លូវល្បឿនលឿនភ្នំពេញ-បាវិត គឺជាខ្សែផ្លូវថ្មីទាំងស្រុង ដែលមានប្រវែងសរុបប្រមាណជា១៣៥គ.ម ចេញពីរាជធានីភ្នំពេញត្រង់ចំណុចផ្លូវក្រវាត់ក្រុងទី៣ ឆ្ពោះទៅក្រុងបាវិត ព្រំដែនកម្ពុជា-វៀតណាម។
គម្រោងនេះ នឹងបញ្ចប់ការសាងសង់នៅបំណាច់ឆ្នាំ២០២៦ ឬដើមឆ្នាំ២០២៧ ដោយត្រូវចំណាយថវិកាសាងសង់សរុបប្រមាណ ១.៦៣៨ លានដុល្លារ។ (អានបន្ថែម)
ជាមួយគ្នានេះ ការសិក្សាផ្លូវល្បឿនលឿនភ្នំពេញ-សៀមរាប អាចនឹងឈានទៅចុះហត្ថលេខាលើកិច្ចព្រមព្រៀងក្របខណ្ឌការងារ (Framework Agreement) នៅខែកញ្ញា ឆ្នាំ២០២៣ នេះ ខណៈក្រសួងជំរុញដល់ក្រុមហ៊ុនដែលកំពុងសិក្សាគម្រោងនេះ។
បច្ចុប្បន្ននេះ មានក្រុមហ៊ុនចំនួន៤ បាននិងកំពុងសិក្សាសមិទ្ធលទ្ធភាពសាងសង់ផ្លូវល្បឿនលឿនពីភ្នំពេញទៅខេត្តសៀមរាបមួយទៀតផងដែរ។ (អានបន្ថែម)
ទាំងនេះគ្រាន់តែជាគម្រោងខ្នាតធំប៉ុណ្ណោះ ប៉ុន្តែជាក់ស្ដែងកម្ពុជានៅមានគម្រោងសាងសង់ហេដ្ឋារចនាសម្ព័ន្ធជាច្រើនដូចជា ផ្លូវជាតិជាច្រើនខ្សែ ស្ពានឆ្លងទន្លេមេគង្គនៅភ្នំពេញដែលត្រៀមនឹងសាងសង់ក្រោមជំនួយកូរ៉េ អាកាសយានដ្ឋានអន្តរជាតិភ្នំពេញ និងសៀមរាប រោងចក្រប្រព្រឹត្តកម្មទឹកកខ្វក់ និងគម្រោងជាច្រើនទៀត ទូទាំងប្រទេស ដែលបូកជាទឹកប្រាក់សរុបយ៉ាងហោច ៣០ប៊ីលានដុល្លារ ពោលគឺធំជាងទំហំGDP ប្រចាំឆ្នាំ របស់កម្ពុជាទៅទៀត ដែលមានត្រឹមតែ ២៧ប៊ីលានដុល្លារ។
បើយោងតាមការវិភាគរបស់សារពត៌មានអន្តរជាតិ ដូចជា The Diplomat ការសម្រុកធ្វើហេដ្ឋារចនាសម្ព័ន្ធនេះ ជាគោលនយោបាយជំរុញសេដ្ឋកិច្ចរបស់កម្ពុជា ពិសេសតាមរយៈការវិនិយោគក្នុងទ្រង់ទ្រាយ BOT ឬ សាងសង់ ធ្វើប្រតិបត្តិការ និងផ្ទេរ។
ការធ្វើបែបនេះ ចាត់ទុកថាជាយុទ្ធសាស្ដ្រវៃឆ្លាតរបស់រដ្ឋាភិបាល ក្នុងការកាត់បន្ថយចំណាយផ្ទាល់របស់រដ្ឋ ខណៈក៏កាត់បន្ថយកម្ចីពីបរទេស។ ការងារសំខាន់បំផុតដែលរដ្ឋាភិបាលកម្ពុជា ត្រូវធ្វើ គឺការបង្កើនទំនុកចិត្ត និងបរិយាកាសវិនិយោគដែលអំណោយផលជាងមុនដល់វិនិយោគិន ពិសេសសម្រាប់គម្រោងហេដ្ឋារចនាសម្ព័ន្ធ។
ភាពជោគជ័យនៃគម្រោងផ្លូវល្បឿនលឿនភ្នំពេញ ព្រះសីហនុ ក៏នឹងក្លាយជាឧទាហរណ៍ និងគំរូដ៏សំខាន់មួយ ដើម្បីទាក់ទាញការវិនិយោគបែប BOT បន្ថែមទៀត។
លើសពីនេះ អ្នកវិភាគដដែលក៏បាន លើកឡើងថា ការដែលកម្ពុជាសម្រុកសង់ហេដ្ឋារចនាសម្ព័ន្ធ ខណៈពិភពលោកកំពុងជួបវិបត្តិ គឺជាការសំងំត្រៀមខ្លួនជាស្រេច ដើម្បីបង្កើនភាពប្រកួតប្រជែងរបស់ខ្លួនក្រោយស្ថានភាពវិបត្តិពិភពលោកស្ងប់ស្ងាត់ ខណៈសម្ដេចនាយករដ្ឋមន្រ្តី ហ៊ុន សែន ក៏យកឱកាសនេះ បង្ហាញពីសក្ដានុពលរបស់ខ្លួនដល់ប្រជាជន ស្របពេលកម្ពុជានឹងមានការបោះឆ្នោតថ្នាក់ជាតិឆាប់ៗនេះ។
- Video Advertisement -
English 
ខ្មែរ 
