រដ្ឋបង្កើតសហគមន៍អំបិលខេត្តកំពត កែប ដែលមានផ្ទៃដីជាង ៤ពាន់ហិកតា ដើម្បីលើកកម្ពស់ការផលិត និងអភិរក្ស

• 23 ខែ​សីហា 2023
• Uncategorized @km
• 5 មើល

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានកំណត់វិធាននៃការបង្កើត និងគ្រប់គ្រងសហគមន៍អំបិលខេត្តកំពត កែប ដើម្បីលើកកម្ពស់ការផលិត ការធ្វើពិពិធកម្មផលិតកម្មអំបិល ការអភិរក្ស និងការអភិវឌ្ឍដីស្រែអំបិល។ នេះបើតាមប្រកាសលេខ១៩៥ MISTI/២០២៣ ចុះថ្ងៃទី១៦ ខែសីហា ឆ្នាំ២០២៣។

ប្រកាសនេះ បានកំណត់ឱ្យគណៈកម្មាការសម្របសម្រួលសហគមន៍អំបិលខេត្តកំពត កែប ត្រូវបានបង្កើតឡើង និងដឹកនាំដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងន​វានុវត្តន៍ និងមានការចូលរួមពីក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម រដ្ឋបាលខេត្តកំពត កែប។

គណៈកម្មការនេះ មានភារកិច្ចដូចខាងក្រោម៖

• សម្របសម្រួលការបង្កើត និងការគ្រប់គ្រងសហគមន៍អំបិលខេត្តកំពត កែប ដើម្បីជំរុញការប្រព្រឹត្តទៅ ឬ កិច្ចដំណើរការរបស់សហគមន៍ដោយឯករាជ្យ តម្លាភាព ប្រសិទ្ធភាព និងគណនេយ្យភាព
• ផ្តល់ការគាំទ្រលើផ្នែកបច្ចេកទេស និងក្របខណ្ឌគតិយុត្ត សម្រាប់កិច្ចដំណើរការជាប្រក្រតី និងការពង្រឹង សហគមន៍
• ធ្វើអន្តរាគមន៍ និង/ឬ ដាក់ចេញវិធានការក្នុងការដោះស្រាយទំនាស់ ឬ បញ្ហាប្រឈមរបស់ផលិតករ និង សហគមន៍អំបិល
• ជួយស្វែងរកជំនួយ និងការគាំទ្រដល់សហគមន៍។

បន្ថែមពីនេះ​ ដើម្បីអាចបង្កើត និងចុះបញ្ជីសហគមន៍អំបិលបាន លុះត្រាសហគមន៍ដែលត្រូវចុះបញ្ជីនោះ មានចំនួនសមាជិកចាប់ពី ៥០នាក់ឡើង ដែលមានសញ្ជាតិខ្មែរ​ និងមានអាយុចាប់ពី ១៨ឆ្នាំឡើង ដែលរស់នៅភូមិសាស្ត្រនៃរដ្ឋបាលជាក់លាក់នៅរាជធានី ខេត្តក្នុងប្រទេសកម្ពុជា និងមានមុខរបរចម្បងក្នុងក្របខណ្ឌនៃប្រព័ន្ធផលិតកម្ម ពាណិជ្ជកម្ម ឧស្សាហកម្ម ឬសេវាកម្មទាំងឡាយដែលពាក់ព័ន្ធនឹងអំបិល។

គួរ​បញ្ជាក់ថា បើតាមរបាយការណ៍ពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា គិតមកទល់ពេលនេះ ដីស្រែអំបិកខេត្តកំពត កែប មានសរុបប្រមាណ ៤.៧២១,១៤ហិកតា។

• land development and policy