រដ្ឋប្រកាសលើកទឹកចិត្តពិសេសដល់គម្រោងវិនិយោគចំនួន ២៧បន្ថែមទៀត នៅខេត្តព្រះសីហនុ

• 4 ខែ​សីហា 2025
• Uncategorized
• 10 មើល

ក្រុមការងារជំរុញការវិនិយោគក្នុងខេត្តព្រះសីហនុ បានសម្រេចផ្តល់គោលការណ៍លើកទឹកចិត្តពិសេស ដល់គម្រោងវិនិយោគ និងធុរកិច្ចចំនួន ២៧គម្រោង បន្ថែមទៀត ក្រោមទុនវិនិយោគ ២៨២ លានដុល្លារ។ នេះបើតាមទំព័រហ្វេកប៊ុកផ្លូវការរបស់ក្រុមការងារនេះ ចេញផ្សាយកាលពីថ្ងៃទី៣១ ខែកក្កដា ឆ្នាំ២០២៥។

ប្រភពដដែលនេះ បានឱ្យដឹងថា គម្រោងដែលទទួលបានការលើកទឹកចិត្តពិសេសនេះមានចំនួន ២៧គម្រោង រួមមា​ន​÷ គម្រោងពាក់ព័ន្ធនឹងអគារកំពុងជាប់គាំង ចំនួន ១៧, គម្រោងថ្មី ចំនួន ៨, គម្រោងពង្រីក ១ និង គម្រោងមានស្រា​ប់​ ចំនួន ១ ដែលមានទុនវិនិយោគប្រមាណ ២៨២ លានដុល្លារ និងប៉ាន់ស្មានអាចបង្កើតការងារប្រមា​ណ ១.៨​១២ កន្លែង។

បន្ថែមពីនេះ គម្រោងទាំង ២៧ នេះ មានជាអាទិ៍ គម្រោងរោងចក្រផ្គុំ និង ដំឡើងរថយន្ត, គម្រោងរោងចក្រផលិតគ្រឿងបន្លាស់យានយន្ត, គម្រោងសណ្ឋាគារ, គម្រោងរមណីយដ្ឋានទេសចរណ៍ និងគម្រោងអគារពហុមុខងារ ។

គួរបញ្ជាក់ថា គម្រោងដែលក្រុមការងារបានសម្រេចផ្តល់គោលការណ៍លើកទឹកចិត្ត ក្នុងត្រីមាសទី២ ឆ្នាំ២០២៥ មានកំណើន ១១% ធៀបនឹងត្រីមាសទី១ ឆ្នាំនេះ ដែលបង្ហាញពីការកើនឡើងនូវទំនុកចិត្តពីសំណាក់វិស័យឯកជន។ កម្លាំងចលករសំខាន់នៅពីក្រោយលទ្ធផលនេះ គឺវិនិយោគិនក្នុងស្រុក និង វិនិយោគិនបរទេស ដែលទទួលបានការលើកទឹកចិត្តពិសេស តាមរយៈយន្តការ «ច្រកចេញចូលតែមួយ» របស់ក្រុមការងារជំរុញការវិនិយោគក្នុងខេត្តព្រះសីហនុ និង ទំនុកចិត្តវិនិយោគនៅក្នុងខេត្ត។

ការប្តេជ្ញាចិត្តក្នុងការជំរុញបរិយាកាសធុរកិច្ចអំណោយផលក្នុងខេត្តព្រះសីហនុបានគូសបញ្ជាក់អំពីសក្តានុពលរបស់ខេត្តជាមជ្ឈមណ្ឌលសម្រាប់ការអភិវឌ្ឍន៍សេដ្ឋកិច្ចនៅកម្ពុជា។ នៅពេលដែលគម្រោងទាំងនេះទទួលបានផ្លែផ្កា ពួកគេត្រូវបានកំណត់ដើម្បីផ្លាស់ប្តូរទេសភាពនៃតំបន់ និងលើកកម្ពស់ជីវភាពរស់នៅរបស់អ្នកស្រុក។

• Projects Development
• Policy and Strategy