ការសាងសង់ច្រាំងទន្លេបាសាក់ ក្នុងភូមិសាស្ត្រក្រុងសំពៅពូន ខេត្តកណ្តាល សម្រេចបាន ៥៥%

• Proeksa Meas
• 26 ខែ​មីនា 2026
• ព័ត៌មានសំណង់
• 784 មើល

វឌ្ឍនភាពការងារសាងសង់ច្រាំងទន្លេបាសាក់ ដែលមានទីតាំងស្ថិតក្នុងភូមិសាស្ត្រសង្កាត់ព្រែកជ្រៃ ក្រុងសំពៅពូន ខេត្តកណ្ដាល បច្ចុប្បន្នសម្រេចបាន ៥៥% ហើយ។ នេះបើយោងតាមដំណើរចុះពិនិត្យគម្រោងផ្ទាល់ ដឹកនាំដោយ ឯកឧត្តម ឈុន ពុទ្ធារិទ្ធ អគ្គនាយកនៃអគ្គនាយកដ្ឋានកិច្ចការបច្ចេកទេសក្រសួងធនធានទឹក និងឧតុនិយម កាលទី១៤ ខែមីនា ឆ្នាំ២០២៦។

គម្រោងសាងសង់ច្រាំងទន្លេបាសាក់នេះ មានប្រវែងសរុប ៥០០ម៉ែត្រ ដោយគិតមកទល់ពេលនេះ លទ្ធផលការងារសម្រេចបានប្រមាណ ៥៥% ហើយ ដោយឯកឧត្តមដែលដឹកនាំការងារចុះពិនិត្យ ក៏បានណែនាំដល់វិស្វករ និងអ្នកបច្ចេកទេស ត្រូវបន្តយកចិត្តទុកដាក់ខ្ពស់លើការងារសាងសង់ ដោយធានាឱ្យបានត្រឹមត្រូវតាមបទដ្ឋានបច្ចេកទេសវិស្វកម្ម ដើម្បីភាពរឹងមាំ និងប្រើប្រាស់បានយូរអង្វែង។

ឯកឧត្តម ក៏បានណែនាំភាគីពាក់ព័ន្ធជំរុញប្រសិទ្ធភាពការងារឱ្យសម្រេចបានតាមផែនការមេដែលបានកំណត់ ព្រមទាំងរៀបចំឱ្យមានសណ្តាប់ធ្នាប់ និងសោភ័ណភាពសមស្របទៅនឹងបរិស្ថានជុំវិញ ដើម្បីបម្រើផលប្រយោជន៍សាធារណៈឱ្យបានល្អប្រសើរ និងប្រកបដោយចីរភាព។

សូមជម្រាបថា ក្រសួងធនធានទឹក បានចាប់ផ្តើមអនុវត្តគម្រោងការពារច្រាំងទន្លេបាសាក់ ប្រវែង ៥០០ម៉ែត្រនេះនៅថ្ងៃទី២៥ ខែឧសភា ឆ្នាំ២០២៥ គឺបន្ថែមបន្តពីច្រាំងទន្លេដែលបានសាងសង់រួចប្រវែង ១២០០ម៉ែត្រ  ក្នុងសង្កាត់ព្រែកជ្រៃ ក្រុងសំពៅពូន ខេត្តកណ្តាល ដើម្បីការពារការបាក់ស្រុតច្រាំងទន្លេបាសាក់ ការពារទ្រព្យសម្បត្តិ និងអាយុជីវិតរបស់ប្រជាពលរដ្ឋដែលរស់នៅតាមដងទន្លេសាបាក់។ ដោយឡែក សម្រាប់ទំហំ និងប្រភពថវិកានៃគម្រោង មិនត្រូវបានប្រកាសជាសាធារណៈនៅឡើយ។