កម្ពុជា-អារ៉ាប៊ីសាអូឌី ប្តេជ្ញាពង្រឹងកិច្ចសហប្រតិបត្តិការវិនិយោគលើវិស័យសក្តានុពលចំនួន៧

Proeksa Meas
31 ខែសីហា 2026
ព័ត៌មានអចលនទ្រព្យ
195 មើល

ក្នុងអំឡុងពេលជួបពិភាក្សាជាមួយលោកនាយករដ្ឋមន្ត្រី ហ៊ុន ម៉ាណែត លោក Thamer Mohammed A. Algosaibi ឯកអគ្គរដ្ឋទូតអារ៉ាប៊ីសាអូឌីត បានរៀបរាប់អំពីអាទិភាពការទូតសំខាន់ៗ និងផែនការសម្រាប់គណៈប្រតិភូពាណិជ្ជកម្មនាពេលខាងមុខ

កម្ពុជា-អារ៉ាប៊ីសាអូឌីត បានប្តេជ្ញារួមគ្នាពង្រឹងកិច្ចសហប្រតិបត្តិការលើវិស័យសក្តានុពលចំនួន៧ សំដៅជំរុញទំនាក់ទំនងទ្វេភាគីឱ្យឈានដល់កម្រិតថ្មីមួយទៀត។ នេះបើតាមជំនួបពិភាក្សារវាងសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ជាមួយលោក ថាម៊ែរ ម៉ូហាំម៉េដ អេ. អាល់ហ្គោសៃប៊ី (Thamer Mohammed A. Algosaibi) ឯកអគ្គរាជទូតអារ៉ាប៊ីសាអូឌីតប្រចាំកម្ពុជា កាលថ្ងៃទី២៤ ខែសីហា ឆ្នាំ២០២៦។

នាឱកាសនោះ លោកឯកអគ្គរាជទូត បេសកកម្មការទូតស្នូលចំនួនពីរ ដើម្បីជំរុញកិច្ចសហប្រតិបត្តិការទ្វេភាគីឱ្យកាន់តែរឹងមាំ រួមមាន៖ ទី១. ការជំរុញការផ្លាស់ប្ដូរដំណើរទស្សនកិច្ចការងាររវាងថ្នាក់ដឹកនាំ និងមន្ត្រីគ្រប់កម្រិត និង ទី២. ការផ្សារភ្ជាប់ទំនាក់ទំនងរវាងវិស័យឯកជន និងវិស័យឯកជន។ បន្ថែមពីនេះ លោកក៏បានបញ្ជាក់ពីគម្រោងរបស់គណៈប្រតិភូធុរកិច្ចអារ៉ាប៊ីសាអូឌីតដែលនឹងមកបំពេញទស្សនកិច្ចនៅកម្ពុជាក្នុងពេលអនាគតដ៏ខ្លីខាងមុខ ដើម្បីស្វែងរកកាលានុវត្តភាពពាណិជ្ជកម្ម និងវិនិយោគ។

ជាការឆ្លើយតប សម្ដេចធិបតី មានជំនឿជាក់ថា អាណត្តិការទូតរបស់ឯកឧត្តមនឹងចូលរួមចំណែកយ៉ាងសកម្មក្នុងការជំរុញទំនាក់ទំនងរវាងប្រទេសទាំងពីរឱ្យកាន់តែរីកចម្រើនទ្វេដង។ សម្ដេចធិបតីបានបន្ថែមថា ការវិនិយោគនៅកម្ពុជាមិនត្រឹមតែបំពេញតម្រូវការទីផ្សារក្នុងស្រុកប៉ុណ្ណោះទេ ប៉ុន្តែថែមទាំងផ្តល់ឱកាសក្នុងការទាញយកអត្ថប្រយោជន៍ពីកិច្ចព្រមព្រៀងពាណិជ្ជកម្មសេរីនានា ដែលកម្ពុជាមានជាមួយដៃគូក្នុងតំបន់ និងអន្តរជាតិទៀតផង។

តាមរយៈជំនួបខាងលើ ភាគីទាំងពីរ ក៏បានប្តេជ្ញារួមគ្នាពង្រឹងកិច្ចសហប្រតិបត្តិការលើវិស័យសក្តានុពលចំនួន៧ រួមមាន៖ សេដ្ឋកិច្ច ពាណិជ្ជកម្ម ការវិនិយោគ ទេសចរណ៍ កសិកម្ម បច្ចេកវិទ្យា និងបញ្ញាសិប្បនិម្មិត (AI)ជាដើម៕ (អានបន្ថែម)

- Video Advertisement -