រដ្ឋលើកទឹកចិត្តពិសេសដល់គម្រោងចំនួន៦ តម្លៃទុនវិនិយោគ ៨៣លានដុល្លារ នៅភូមិភាគឦសាន

Proeksa Meas
7 ខែកក្កដា 2026
ព័ត៌មានសំណង់
495 មើល

គម្រោងអភិវឌ្ឍន៍ថ្មីចំនួន៦ ត្រូវបានអនុម័តសម្រាប់ការលើកទឹកចិត្តពិសេសដើម្បីបង្កើតការងារក្នុងស្រុកចំនួន 2,587 និងពន្លឿនទំនើបកម្មកសិ-ឧស្សាហកម្ម

រាជរដ្ឋាភិបាល បានប្រកាសផ្តល់គោលការណ៍លើកទឹកចិត្តពិសេស ដល់គម្រោងវិនិយោគចំនួន ៦ នៅភូមិភាគឦសាន ក្រោមទុនវិនិយោគប្រមាណ ៨៣ លានដុល្លារអាម៉េរិក។ នេះបើយោងតាមកិច្ចប្រជុំពិនិត្យសម្រេច លើការផ្តល់គោលការណ៍លើកទឹកចិត្តពិសេស ជាលើកទី ៥ ដឹកនាំដោយឯកឧត្តម ហ៊ាន សាហ៊ីប ប្រធានក្រុមការងារជំរុញការវិនិយោគក្នុងភូមិភាគឦសាន កាលថ្ងៃទី ២៦ ខែ មិថុនា ឆ្នាំ ២០២៦។

កិច្ចប្រជុំនេះ បានប្រកាសសម្រេចផ្តល់គោលការណ៍លើកទឹកចិត្តពិសេស ជាលើកទី ៥ សម្រាប់គម្រោងវិនិយោគចំនួន ៦ ក្រោមទុនវិនិយោគប្រមាណ ៨៣ លានដុល្លារអាម៉េរិក និង អាចបង្កើតការងារថ្មី ២ ៥៨៧ កន្លែង នៅពេលដំណើរការ។

គម្រោងទាំងនេះ រួមមាន ៖ ២គម្រោងនៅខេត្តរតនគិរី ២គម្រោងនៅខេត្តមណ្ឌលគិរី ១គម្រោងនៅខេត្តស្ទឹងត្រែង និង ១គម្រោងនៅខេត្តក្រចេះ ដែលមានសកម្មភាពចម្រុះ មានជាអាទិ៍ គម្រោងវិនិយោគរោងចក្រផលិតម្សៅដំឡូងមីស្រស់ រោងចក្រកែច្នៃគ្រាប់ស្វាយចន្ទី គម្រោងដាំដុះដំណាំកៅស៊ូ និងរោងចក្រកែច្នៃជ័រកៅស៊ូ គម្រោងទេសចរណ៍ធម្មជាតិ និង គម្រោងដំាដុះ និងរោងចក្រកែច្នៃកាហ្វេ ។

សូមជម្រាបដែរថា បន្ទាប់ពីប្រកាសដាក់ឱ្យអនុវត្តជាផ្លូវការ «កម្មវិធីពិសេសជំរុញការវិនិយោគក្នុងខេត្តទាំងបួន នៅភូមិភាគឦសាន នៃព្រះរាជាណាចក្រកម្ពុជា ឆ្នាំ ២០២៥-២០២៨» កាលពីថ្ងៃទី៩ ខែមេសា ឆ្នាំ ២០២៥ ក្រុមការងារជំរុញការវិនិយោគក្នុងភូមិភាគឦសាន ទទួលបានសំណើគម្រោងវិនិយោគសរុបចំនួន ៦៦ គម្រោង ក្រោមទុនវិនិយោគសរុប ២.៤៧៨,៦លានដុល្លារអាម៉េរិក និង បានឯកភាពផ្តល់គោលការណ៍ជូនគម្រោងវិនិយោគចំនួន ៤៥គម្រោង ក្រោមទុនវិនិយោគជាង ២០០០លានដុល្លារអាម៉េរិក៕ (អានបន្ថែម)