រដ្ឋបង្កើតភូមិរង់ចាំ១ ដល់ ៦ ដោយបំបែកចេញពីភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ

Proeksa Meas
10 ខែកក្កដា 2026
ព័ត៌មានអចលនទ្រព្យ
470 មើល

បំបែកចេញពីឃុំស្លាក្រាម ធាតុនៃរដ្ឋបាលថ្មីបានបង្កើតជាស្ថាប័នសម្រាប់ការតាំងទីលំនៅតាមព្រំដែនជានិមិត្តរូបមួយដែលដើមឡើយត្រូវបានដាក់ឈ្មោះដោយសម្តេចតេជោ ហ៊ុន សែន។

រាជរដ្ឋាភិបាល តាមរយៈក្រសួងមហាផ្ទៃ បានចេញសេចក្តីសម្រេចបង្កើតភូមិរង់ចាំ១ ភូមិរង់ចាំ២ ភូមិរង់ចាំ៣ ភូមិរង់ចាំ៤ ភូមិរង់ចាំ៥ និងភូមិរង់ចាំ៦ ដោយបំបែកចេញពីភូមិស្លក្រាម នៃឃុំស្លក្រាម ស្រុកស្វាយចេក ខេត្តបន្ទាយមានជ័យ។

បើយោងតាមសេចក្តីសម្រេចរបស់ឯកឧត្តម ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលចុះហត្ថលេខា នាថ្ងៃទី១ ខែកក្កដា ឆ្នាំ២០២៦ បានបញ្ជាក់ថា ការរៀបចំរចនាសម្ព័ន្ធគ្រប់គ្រងភូមិបង្កើតថ្មីដូចមានចែងនៅក្នុងប្រការ១ នៃប្រកាសនេះ ត្រូវអនុលោម ទៅតាមសេចក្ដីណែនាំលេខ ០០៤ សណន ចុះថ្ងៃទី១៧ ខែមីនា ឆ្នាំ២០០៦ របស់ក្រសួងមហាផ្ទៃ ស្តីពីបែបបទ នីតិវិធីនៃការជ្រើសរើសមេភូមិ ការចូលកាន់តំណែង ការផ្លាស់ប្តូរមេភូមិ ការតែងតាំងជំនួយការមេភូមិ និងតួនាទី ភារកិច្ច របៀបរបបធ្វើការងាររបស់ភូមិ។

តារយៈសេចក្តីសម្រេចនេះ ក្រសួងមហាផ្ទៃ ក៏បានណែនាំឱ្យក្រសួង ស្ថាប័ន និងភាគីពាក់ព័ន្ធ ត្រូវទទួលបន្ទុកអនុវត្តប្រកាសនេះតាមភារកិច្ចរៀងៗខ្លួនចាប់ពីថ្ងៃចុះហត្ថលេខាតទៅ។

សូមរំឭកដែរថា ភូមិរង់ចាំ ជាឈ្មោះដ៏មានអត្ថន័យជ្រាលជ្រៅ និងបង្កប់ដោយក្តីឈឺចាប់ជាប្រវត្តិសាស្ត្រ ដែលត្រូវបានប្រសិទ្ធនាមដោយសម្ដេចតេជោ ហ៊ុន សែន បានក្លាយជាទីតាំងមួយដែលរំលឹកដល់ទុក្ខលំបាករបស់ប្រជាពលរដ្ឋខ្មែររាប់ពាន់នាក់ ដែលធ្លាប់បានឆ្លងកាត់នូវបទពិសោធន៍ដ៏ជូរចត់នៃការបាត់បង់ទីជម្រក និងការតស៊ូដើម្បីរស់រានមានជីវិត។ ភូមិរង់ចាំ១ ដល់ភូមិរង់ចាំ៦ មិនមែនត្រឹមតែជាទីតាំងភូមិសាស្ត្រប៉ុណ្ណោះទេ ប៉ុន្តែជាព័ស្តុតាងរស់នៃរឿងរ៉ាវដ៏កំសត់ និងការឈឺចាប់ដែលបន្សល់ទុកដោយជម្លោះព្រំដែន។ ឈ្មោះ «ភូមិរង់ចាំ» នេះដែរ គឺពិតជាស័ក្តិសមទៅនឹងស្ថានភាពជាក់ស្តែងរបស់ប្រជាពលរដ្ឋ ដែលតែងតែរង់ចាំដោយក្តីសង្ឃឹមថា ថ្ងៃណាមួយពួកគេនឹងអាចវិលត្រឡប់ទៅកាន់ទឹកដីកំណើតរបស់ខ្លួនវិញដោយសុវត្ថិភាព និងសេចក្តីថ្លៃថ្នូរ៕