CDC អនុម័តគម្រោងសណ្ឋាគារ និង រោងចក្រសម្ភារសំណង់តម្លៃសរុបជាង ១៦៥ លានដុល្លារ

• 9 ខែ​សីហា 2019
• Uncategorized @km
• 9 មើល

ក្រុមប្រឹក្សាអភិវឌ្ឍន៍កម្ពុជា ឬហៅកាត់ថា CDC កាលពីថ្ងៃ ៧ ខែសីហា បានអនុម័តគម្រោងវិនិយោគលើសណ្ឋាគារ និង រោងចក្រសម្ភារសំណង់តម្លៃសរុបជាង ១៦៥ លានដុល្លារក្នុងរាជធានីភ្នំពេញនិងខេត្តកំពត។

បើយោងតាមការប្រកាសរបស់ CDC ចំពោះគម្រោងសណ្ឋាគារគឺស្នើសុំដោយក្រុមហ៊ុន Royal Field Development Company Co., Ltd (ក្រុមហ៊ុនបុត្រសម្ព័ន្ធរបស់ Chip Mong Group) ដែលមានទីតាំងនៅមហាវិថីសហព័ន្ធរុស្សី ភូមិ១០ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ។ គម្រោងនេះរួមមានសណ្ឋាគារថ្នាក់ផ្កាយ៣ ចំនួន៣០០បន្ទប់ និងមជ្ឈមណ្ឌលពាណិជ្ជកម្ម ដែលប្រើប្រាស់ទុនវិនិយោគប្រមាណ ១៣៤លានដុល្លារអាមេរិក។

គួរបញ្ជាក់ផងដែរថា គម្រោងសណ្ឋាគារមួយនេះមានឈ្មោះថា Fairfield by Marriott ដែលជាសណ្ឋាគារប្រេន Marriott ដំបូងគេនៅកម្ពុជា។ ជាក់ស្ដែងគម្រោងនេះ បានបើកការដ្ឋានសាងសង់រួចមកហើយ កាលពីខែមករា កន្លងមកនេះ ហើយគ្រោងនឹងបញ្ចប់ការសាងសង់និងបើកឲ្យដំណើរការក្នុងឆ្នាំ២០២២ខាងមុខនេះ។ (អានបន្ថែម)

ដោយឡែក គម្រោងទី ២ គឺជាគម្រោងបង្កើតរោងចក្រផលិតសម្ភារៈតុបតែងពិដាននិងជញ្ជាំង ដែលគម្រោងនេះគឺស្នើសុំដោយក្រុមហ៊ុន Cambodian Decorative Building Material Chakrey Ting Co., Ltd.។ គម្រោងនេះប្រើទុនវិនិយោគប្រមាណ ៣០,៥លានដុល្លារអាមេរិក ហើយមានទីតាំងនៅភូមិភ្នំតូច ឃុំកណ្តោល ស្រុកទឹកឈូ ខេត្តកំពត។

គម្រោងទាំង ២នេះ នឹងជួយបង្កើតការងារដល់ប្រជាជនក្នុងតំបន់សរុបជិត ១០០០ កន្លែង។

កាលពីពេលថ្មីៗនេះ ក្រុមប្រឹក្សាអភិវឌ្ឍន៍កម្ពុជា ក៏បាននិងកំពុងរៀបចំសេចក្តីព្រាងច្បាប់ថ្មីស្ដីពីការវិនិយោគនៅកម្ពុជា ឱ្យកាន់តែមានភាព ទាក់ទាញ និងប្រកួតប្រជែងខ្ពស់ ដើម្បីធ្វើឱ្យប្រសើរឡើងនូវបរិយាកាសវិនិយោគនៅកម្ពុជា ក្នុងន័យទាក់ទាញការវិនិយោគពីក្រៅប្រទេសឱ្យបានច្រើន៕

• Economy and Finance