រោងចក្រផលិតសំបកកង់រថយន្តមួយនៅខេត្តកំពង់ស្ពឺ អាចផលិតបានជាង ៦ម៉ឺនសំបក ក្នុងមួយខែ

Proeksa Meas
13 ខែកក្កដា 2026
ព័ត៌មានសំណង់
56 មើល

បន្ទាប់ពីការត្រួតពិនិត្យអន្តរក្រសួងដឹកនាំដោយ CDC ក្រុមហ៊ុន Sundance Industries បានបង្ហាញពីកំណើតនៃការផលិត និងទំហំពាណិជ្ជកម្មដែលជំរុញដោយការនាំចេញ ដែលជាសញ្ញានៃការផ្លាស់ប្តូរជាយុទ្ធសាស្ត្ររបស់ប្រទេសកម្ពុជាឆ្ពោះទៅរកការកែច្នៃឧស្សាហកម្មធុនធ្ងន់…

គម្រោងវិនិយោគ ផលិតសំបកកង់យានយន្ត យ៉ាន់ គ្រឿងបង្គំយ៉ាន់ និងផ្គុំដំឡើងកង់រថយន្ត ដែលមានទីតាំងនៅក្នុងខេត្តកំពង់ស្ពឺ កំពុងដំណើរការគម្រោងវិនិយោគផលិតសំបកកង់យានយន្ត ផ្គុំដំឡើងកង់រថយន្ត និងអាចមានសមត្ថភាពផលិតសំបកកង់រហូតបានជាង៦ម៉ឺនសំបកក្នុងមួយខែ។

នេះបើយោងតាមដំណើរចុះពិនិត្យរោងចក្រផ្ទាល់របស់គណៈកម្មការអន្តរក្រសួង ស្ថាប័ន ដែលដឹកនាំដោយឯកឧត្តម ជា វុទ្ធី អគ្គលេខាធិការ គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា កាលថ្ងៃទី៣០ ខែមិថុនា ឆ្នាំ២០២៦ ដើម្បីពិនិត្យលើវឌ្ឍនភាពនៃការអនុវត្តគម្រោងវិនិយោគ និងស្វែងយល់ពីបញ្ហាប្រឈមផ្សេងៗរបស់ក្រុមហ៊ុន។

គម្រោងវិនិយោគរោងចក្រ ផលិតសំបកកង់យានយន្ត យ៉ាន់ គ្រឿងបង្គំយ៉ាន់ និងផ្គុំដំឡើងកង់រថយន្ត គឺវិនិយោគដោយក្រុមហ៊ុន SUNDANCE INDUSTRIES CO., LTD.។ក្រុមហ៊ុននេះ ទទួលបានគោលការណ៍វិនិយោគ ពី គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១ ខែមេសា ឆ្នាំ២០២០ កន្លងទៅ និងបច្ចុប្បន្នកំពុងដំណើរការផលិតកម្ម ដោយចូលរួមបង្កើតការងារបានប្រមាណជាង១០០កន្លែង។

បច្ចុប្បន្នក្នុងជំហានដំបូង ក្រុមហ៊ុនកំពុងដំណើរការផលិតសំបកកង់រថយន្ត (សំបកកង់រថយន្តដឹកទំនិញ និងសំបកកង់រ៉ឺម៉កសណ្តោង) ដែលមានសមត្ថភាពផលិតប្រមាណ ៦២.៥០០សំបក ក្នុងមួយខែ សម្រាប់នាំចេញទៅកាន់ទីផ្សារបរទេស។

សូមជម្រាបដែរថា ក្រុមហ៊ុន SUNDANCE INDUSTRIES CO., LTD. កំពុងអនុវត្តន៍គម្រោងបង្កើតរោងចក្រផលិតសំបកកង់រថយន្តគ្រប់ប្រភេទ និងគ្រឿងបង្គុំកង់រថយន្ត ដែលមានទីតាំងវិនិយោគស្ថិតនៅភូមិទំពាម ឃុំតាំងក្រូច ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៣២,៩លានដុល្លារអាម៉េរិក និងអាចបង្កើតការងារបានចំនួន ៣៣២កន្លែង។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) កាលខែឧសភា ឆ្នាំ២០២០ កន្លងទៅ៕ (អានបន្ថែម)