GDP វៀតណាមកើន ៥,៦% នៅឆមាសទី ១ ឆ្នាំនេះ ខណៈវិស័យឧស្សាហកម្ម និងសំណង់ជាកត្តាជំរុញចំបង

• 2 ខែ​កក្កដា 2021
• ព័ត៌មានសំណង់
• 9 មើល

កំណើនសេដ្ឋកិច្ចវៀតណាមសម្រាប់ឆមាសទី១ នៃឆ្នាំ២០២១ កើនឡើងដល់ទៅ ៥,៦៤% ដែលជាការស្ទុះឡើងជាង ៣ដង បើប្រៀបធៀបនឹងរយៈពេលដូចគ្នាកាលពីឆ្នាំមុន ដែលក្នុងនោះកំណើនវិស័យឧស្សាហកម្ម និងសំណង់ គឺកត្តាជំរុញដ៏ចម្បង។ នេះបើយោងតាមទីភ្នាក់ងារសារព័ត៌មាន Xinhua។

យោងតាមការិយាល័យស្ថិតិទូទៅវៀតណាម កាលពី ២៩ ខែមិថុនា កំណើននេះត្រូវបានជំរុញដោយវិស័យមួយចំនួនដូចជា វិស័យឧស្សាហកម្ម និងវិស័យសំណង់ដែលបានកើនឡើង ៨,៣៦% វិស័យកសិកម្មរុក្ខាប្រមាញ់និងនេសាទ បានស្ទុះដល់ ៣,៨២% និងវិស័យសេវាកម្មដែលមានកំណើន ៣,៩៦% ។

វិស័យទាំងបីនេះ ក៏បានរួមចំណែកក្នុងកំណើនសេដ្ឋកិច្ចជារួម ដល់ទៅ ៥៩,០៥% ៨,១៧% និង ៣២,៧៨% រៀងៗគ្នា។

ការិយាល័យនេះបានបន្តទៀតថា កំណើននេះគឺដោយសារតែរដ្ឋាភិបាល អ្នកវិនិយោគ ម្ចាស់អាជីវកម្ម និងប្រជាជនទូទៅ បានជួយគ្នាគ្រប់គ្រងវិបត្តិកូវីដ-១៩ ដើរតាមគោលដៅរបស់ខ្លួន និងរួមគ្នាអភិវឌ្ឍសេដ្ឋកិច្ច។

គួរបញ្ជាក់ផងដែរថា GDP វៀតណាម កាលពីឆ្នាំ ២០២០ កើនឡើងត្រឹមតែ ២,៩១% ប៉ុណ្ណោះ ដោយសារវិបត្តិកូវីដ ដែលជាកំណើនទាបបំផុតក្នុងរយៈពេលមួយទសវត្សរ៍ចុងក្រោយនេះ។

ទោះយ៉ាងណា មូលនិធិរូបិយវត្ថុអន្តរជាតិ IMF កាលពីខែមេសា បានព្យាករថា សេដ្ឋកិច្ចវៀតណាមនឹងកើនឡើង ៦.៥% នៅឆ្នាំ ២០២១ ខ្ពស់ជាងកំណើនមធ្យមរបស់ពិភពលោកដែលមានត្រឹមតែ ៦% ប៉ុណ្ណោះ។ ហើយសេដ្ឋកិច្ចប្រទេសនេះនឹងកើន ៧,២% នៅឆ្នាំ២០២២។

• Economy and Finance