ក្រុមហ៊ុនយក្ស ២ Collins Engineers និង Bentley រួមគ្នាបង្កើតបច្ចេកវិទ្យាសំណង់ថ្មីមួយ…

• Proeksa Meas
• 18 ខែ​កក្កដា 2026
• ព័ត៌មានសំណង់
• 382 មើល

ក្រុមហ៊ុន Collins Engineers និង Bentley Systems កំពុងសហការគ្នាដោះស្រាយវិបត្តិហេដ្ឋារចនាសម្ព័ន្ធស្ពានចាស់រិចរិលជាច្រើនកន្លែងនៅសហរដ្ឋអាមេរិកបានយ៉ាងជោគជ័យ ដោយប្រើកម្មវិធីសំណង់ឌីជីថលដ៏មានប្រសិទ្ធភាពមួយ។

ជាក់ស្ដែងបច្ចេកវិទ្យានេះ មិនមែនថ្មីទាំងស្រុងនោះទេ តែគឺជាការធ្វើទំនើកកម្ម ឬឡើងកម្ពស់បច្ចេកវិទ្យា iTwin របស់ Bentley ដែរមានស្រាប់ ដោយប្រើ AI។

កម្មវិធីថ្មីនេះជួយឱ្យអ្នកត្រួតពិនិត្យទូទាំងពិភពលោកអាចចូលទៅពិនិត្យមើលគំរូស្ពានឌីជីថល 3D ដែលមានភាពដូចជាក់ស្តែងពិតៗ ដើម្បីកំណត់រកបញ្ហានៃរចនាសម្ព័ន្ធដូចជាស្នាមប្រេះ និងការខូចខាតផ្ទៃមុខបេតុង ដែលជួយបំពេញចន្លោះប្រហោងនៃកង្វះខាតកម្លាំងពលកម្មវិស្វករ។

បច្ចេកវិទ្យានេះប្រើប្រាស់កម្មវិធី iTwin Capture និង iTwin Experience របស់ Bentley ដែលអាចបំប្លែងរូបភាពដែលថតដោយដ្រូនឱ្យទៅជាគំរូឌីជីថល 3D ដែលមានអន្តរកម្ម។ នៅពេលដាក់បញ្ចូលជាមួយ AI គំរូទាំងនេះអាចរកឃើញ និងវាស់វែងការខូចខាតផ្ទៃមុខដោយស្វ័យប្រវត្តិ ដែលជួយឱ្យវិស្វករកំណត់បញ្ហាមុនពេលចុះទៅដល់ទីតាំងផ្ទាល់។

ឧទាហរណ៍ដូចជា គម្រោងជួសជុលស្ពាន Robert Street ក្នុងរដ្ឋ Minnesota។ ក្រុមហ៊ុនបានប្រើកម្មវិធីនេះ ដើម្បីកាត់បន្ថយពេលវេលាត្រួតពិនិត្យនៅនឹងកន្លែងបាន ២០% ខណៈសន្សំសំចៃថ្លៃពលកម្មបាន ៩០,០០០ ដុល្លារ។

លើសពីនេះ កម្មវិធីនេះក៏ជួយឱ្យអ្នកត្រួតពិនិត្យអាចពង្រឹងជំនាញរបស់ពួកគេតាមរយៈបរិស្ថាននិម្មិត ដោយប្រើវ៉ែនតា VR ដែលនឹងជួយឱ្យការដោះស្រាយបញ្ហាប្រឈមនៃហេដ្ឋារចនាសម្ព័ន្ធកាន់តែច្បាស់លាស់ និងមានប្រសិទ្ធភាពជាងមុន។

• iTwin
• iTwin Capture
• បច្ចេកវិទ្យា និងវិស្វកម្ម
• Bentley Systems
• iTwin Experience