គ្មានចំណេះដឹងផ្នែកកូដ និង IT ក៏អាចប្រើកម្មវិធីសំណង់ឌីជីថលបានដែរ …

Proeksa Meas
2 ខែតុលា 2026
ព័ត៌មានសំណង់
32 មើល

ក្រុមហ៊ុន Bentley ថ្មីៗបានធ្វើឱ្យការប្រើកម្មវិធីសំណង់ឌីជីថលរបស់ខ្លួនកាន់តែងាយស្រួលប្រើ ពោលគឺទោះបីជាគ្មានចំណេះដឹងផ្នែកកូដ ឬផ្នែក IT សោះ ក៏អាចប្រើដែរ ដោយប្រើការបញ្ជាតាមរយៈ AI ខណៈគុណភាព និងលទ្ធផលគឺកាន់តែមានប្រសិទ្ធភាពជាងមុន។

ដោយប្រើការបញ្ជាដោយភាសាទូទៅជាមួយ AI បច្ចុប្បន្នវិស្វកររចនា វិភាគ និងគ្រប់គ្រងគម្រោងស្មុគស្មាញ ដោយមិនចាំបាច់សរសេរកូដឱ្យស្មុគស្មាញទៀតទេ។

ក្រុមហ៊ុន Bentley Systems កំពុងបង្ហាញវិធីសាស្ត្រថ្មីនេះតាមរយៈ Model Context Protocol (MCP) ដែលជាស្តង់ដារចំហដែលបើកឱ្យ AI អាចទំនាក់ទំនងដោយផ្ទាល់ជាមួយកម្មវិធីផ្សេងៗបាន។

Bentley បានបង្កើត MCP servers សម្រាប់ដំណោះស្រាយវិស្វកម្មមួយចំនួន រួមមាន MicroStation និង STAAD។ ក្នុង Webinar ថ្មីៗរបស់ក្រុមហ៊ុន មានមនុស្សជាង 2,000 នាក់បានចុះឈ្មោះចូលរួម ដើម្បីស្វែងយល់ពីរបៀបដែលបច្ចេកវិទ្យានេះអាចធ្វើឱ្យការងារវិស្វកម្មប្រចាំថ្ងៃកាន់តែងាយស្រួល។

ក្នុងបទបង្ហាញមួយ Bentley បានបង្ហាញពីសមត្ថភាពរបស់បច្ចេកវិទ្យានេះ តាមរយៈការបង្កើតរូបរាងស្ពាន Quebec Bridge ឡើងវិញ។ លោក Louis-Martin Losier របស់ Bentley បានភ្ជាប់ AI agent ទៅកាន់ MicroStation ហើយបញ្ជាឱ្យវាគូររូបស្ពានតាមភាសាធម្មតា។ បន្ទាប់មក លោកបានប្រើ STAAD ដើម្បីវិភាគរចនាសម្ព័ន្ធដែលបានបង្កើតឡើង។ គម្រោងស្ពានដែលដើមឡើយចំណាយពេល 17 ឆ្នាំក្នុងការសាងសង់ ត្រូវបានបង្កើតឡើងវិញជាទម្រង់ឌីជីថលក្នុងរយៈពេលប៉ុន្មានថ្ងៃប៉ុណ្ណោះ ខណៈវិស្វករនៅតែពិនិត្យការងាររបស់ AI ជាជំហានៗ។

បច្ចេកវិទ្យានេះក៏អាចជួយវិស្វករបង្កើតការរចនាបឋមដោយផ្អែកលើស្តង់ដារឧស្សាហកម្ម ដោយប្រើ AI assistant។ ឧទាហរណ៍ AI បានវិភាគគំរូផ្លូវដែលមានស្រាប់ ពិនិត្យស្តង់ដារសម្រាប់របាំងការពារសំឡេង និងបង្កើតរបាំងដែលបានស្នើឡើងដោយផ្ទាល់នៅក្នុង MicroStation។ វាក៏បានពន្យល់ពីច្បាប់រចនាដែលខ្លួនបានអនុវត្ត ដើម្បីឱ្យវិស្វករអាចពិនិត្យ និងសម្រេចថាតើគួរទទួលយក ឬបដិសេធលទ្ធផលនោះ។

ក្នុងវិស្វកម្មរចនាសម្ព័ន្ធ AI ក៏អាចកាត់បន្ថយតម្រូវការសរសេរកូដផងដែរ។ Bentley បានបង្ហាញថា AI assistant អាចពិនិត្យលទ្ធផលវិភាគនៅក្នុង STAAD និងបញ្ចូលការរចនាជាច្រើនដំណាក់កាលទៅជារបាយការណ៍មួយ ដើម្បីបង្ហាញពីការវិវត្តនៃការរចនារចនាសម្ព័ន្ធ។ ឧទាហរណ៍ AI បានជួយឱ្យការរចនាចុងក្រោយប្រើដែកតិចជាងការរចនាដើមដល់ទៅជិត 40%។

Bentley លើកឡើងថា AI មិនមែនដើម្បីជំនួសវិស្វករឡើយ ប៉ុន្តែដើម្បីធ្វើឱ្យការប្រើប្រាស់កម្មវិធីវិស្វកម្មកាន់តែងាយស្រួល ខណៈដែលការវិនិច្ឆ័យរបស់វិស្វករនៅតែជាចំណុចសំខាន់។

- Video Advertisement -