កូរ៉េសិក្សាសក្តានុពលវិនិយោគអភិវឌ្ឍឧស្សាហកម្មផលិតឧបករណ៍ហោះហើរគ្មានមនុស្សបើកនៅកម្ពុជា

Proeksa Meas
3 ខែវិច្ឆិកា 2026
ព័ត៌មានសំណង់
26 មើល

វិនិយោគិនកូរ៉េ ដែលមកពីក្រុមហ៊ុន NEO Battery Materials Korea Ltd. កាលថ្ងៃទី២២ ខែតុលា ឆ្នាំ២០២៦ បានមកជួបពិភាក្សាជាមួយគណៈកម្មាធិការវិនិយោគកម្ពុជា ដើម្បីមកសិក្សាពីវិស័យឧស្សាហកម្មផលិតឧបករណ៍ហោះហើរគ្មានមនុស្សបើកនៅកម្ពុជា។

នាឱកាសនោះ លោក Park Janghwan អគ្គនាយកក្រុមហ៊ុន NEO Battery Materials Korea Ltd. ក្នុងគោលបំណងស្វែងយល់ពីសក្តានុពល និងសិក្សារៀនសូត្រពីកាលានុវត្តភាពវិនិយោគ ក្នុងការអភិវឌ្ឍឧស្សាហកម្មផលិតឧបករណ៍ហោះហើរគ្មានមនុស្សបើកនៅកម្ពុជា។

ជាការឆ្លើយតប ឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា បានលើស្វាគមន៍ចំពោះគណៈប្រតិភូដែលបានអញ្ជើញមកបំពេញទស្សនកិច្ចធុរកិច្ចនៅកម្ពុជា។ ឯកឧត្តម ក៏បញ្ជាក់ពីគោលនយោបាយបើកចំហរបស់កម្ពុជា ក្នុងការស្វាគមន៍ការវិនិយោគផ្ទាល់ពីបរទេស តាមរយៈកញ្ចប់លើកទឹកចិត្តប្រកបដោយភាពទាក់ទាញ កិច្ចសម្រួលវិនិយោគ និងការថែទាំវិនិយោគក្រោមច្បាប់ស្ដីពីវិនិយោគនៅកម្ពុជា។ ឯកឧត្តម ក៏បានជម្រាបជូនអំពីការគាំទ្រតាមរយៈមូលនិធិអភិវឌ្ឍន៍ជំនាញ (SDF) ដែលអាចផ្តល់ហិរញ្ញប្បទានគាំទ្ររហូតដល់ ៥០% លើថ្លៃចំណាយនៃការបណ្តុះបណ្តាល។

តាមរយៈជំនួបនេះដែរ ភាគីកម្ពុជា ក៏បានលើកទឹកចិត្តឱ្យក្រុមហ៊ុនពិភាក្សាលម្អិតជាមួយក្រសួង ស្ថាប័នមានសមត្ថកិច្ចដើម្បីស្វែងយល់លម្អិតអំពីច្បាប់ បទប្បញ្ញត្តិ និងតម្រូវការជាក់ស្តែងលើគម្រោងនេះ ព្រមទាំងសហការជាមួយវិទ្យាស្ថានបណ្តុះបណ្តាលបច្ចេកទេសក្នុងស្រុក ដើម្បីរៀបចំកម្មវិធីសិក្សា និងបណ្តុះបណ្តាលយុវជនកម្ពុជាលើជំនាញបច្ចេកវិទ្យានេះឱ្យមានប្រសិទ្ធភាព៕