UN ព្យាករសេដ្ឋកិច្ច២០២៤នឹងធ្លាក់ទាបជាង២០២៣ ខណៈអតិផរណានឹងកើនលើស ១០%សម្រាប់ប្រទេសកំពុងអភិវឌ្ឍ
អង្គការសហប្រជាជាជាតិ ទើបនឹងបានបញ្ចេញរបាយការណ៍បច្ចុប្បន្នភាពសេដ្ឋកិច្ចថ្មីរបស់ខ្លួន ដោយបានព្យាករថា កំណើនសេដ្ឋកិច្ចពិភពលោកនឹងថយចុះមកត្រឹម២,៤% នៅឆ្នាំ ២០២៤ នេះ ដែលមានកម្រិតទាបជាងពីចំនួនដែលធ្លាប់បានប៉ាន់ស្មានកាលពីក្នុងឆ្នាំ ២០២៣ ថាមានកម្រិត២,៧%។ ចំនួនធ្លាក់ចុះនេះ គឺលើសពីការរំពឹងទុក។ បើធៀបទៅនឹងអត្រាកំណើនសេដ្ឋកិច្ចកាលពីមុនពេលជំងឺរាតត្បាតកូវីដ១៩ ចាប់ផ្តើមនៅឆ្នាំ២០២០ តួលេខទាំងពីរខាងលើ នៅតែទាបជាងនោះទៅទៀត ដោយកាលណោះអត្រាកំណើនសេដ្ឋកិច្ចសាកល គឺ៣% នេះបើយោងតាមការចុះផ្សាយរបស់VOA កាលពីថ្ងៃទី០៩ មករា ឆ្នាំ ២០២៤។
ទោះយ៉ាងណាក្តី ការព្យាកររបស់អង្គការសហប្រជាជាតិនេះ គឺមានកម្រិតទាបជាងការព្យាកររបស់មូលនិធិរូបិយវត្ថុអន្តរជាតិ IMF ក្នុងខែតុលា ដោយបានរាយការណ៍ថា កំណើនសេដ្ឋកិច្ចពិភពលោកនឹងថយចុះពីចំនួនដែលបានរំពឹងទុក ៣% ក្នុងឆ្នាំ២០២៣ មកនៅត្រឹម២,៩% ក្នុងឆ្នាំ ២០២៤។
ចំណែកឯ អង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច ហៅកាត់ថា OECD កាលពីចុងខែវិច្ឆិកា ឆ្នាំមុន បានប៉ាន់ប្រមាណថា កំណើនសាកល ក៏នឹងថយចុះផងដែរ គឺពីចំនួនដែលរំពឹងទុក គឺពី២,៩% ក្នុងឆ្នាំ ២០២៣ មកនៅត្រឹម ២,៧% ក្នុងឆ្នាំ ២០២៤។
ចំពោះរបាយការណ៍របស់អង្គការសហប្រជាជាតិដែលមានចំណងជើងថា «ស្ថានភាពសេដ្ឋកិច្ចពិភពលោក និងទស្សនវិស័យឆ្នាំ ២០២៤» នេះ បានព្រមានថា ទស្សនវិស័យលក្ខខណ្ឌឥណទានកាន់តែតឹងរ៉ឹងរយៈពេលយូរ និងការចំណាយលើការខ្ចីប្រាក់ សុទ្ធសឹងតែជាបញ្ហាសម្រាប់សេដ្ឋកិច្ចពិភពលោកដែលជាប់ជំពាក់បំណុល ជាពិសេសនៅក្នុងប្រទេសកំពុងអភិវឌ្ឍន៍ដ៏ក្រីក្រ ហើយនឹងប្រទេសដែលត្រូវការការវិនិយោគដើម្បីស្តារការងើបឡើងវិញ។
លោក Shantanu Mukherjee នាយកផ្នែកវិភាគសេដ្ឋកិច្ច និងគោលនយោបាយរបស់អង្គការសហប្រជាជាតិ បាននិយាយថា “ការភ័យខ្លាចនៃការធ្លាក់ចុះសេដ្ឋកិច្ចនៅឆ្នាំ ២០២៣ ត្រូវបានបញ្ចៀស ដោយសារតែមហាអំណាចសេដ្ឋកិច្ចលេខ០១របស់ពិភពលោក គឺសហរដ្ឋអាមេរិក បានទប់ស្កាត់អតិផរណាខ្ពស់ដោយមិនធ្វើឱ្យប៉ះពាល់ដល់ល្បឿនសេដ្ឋកិច្ច។ ប៉ុន្តែ យើងនៅតែមិនទាន់ចេញផុតពីស្ថានភាពគ្រោះថ្នាក់នៅឡើយទេ។”
លោក Mukherjee បានបន្តថា នោះគឺដោយសារតែស្ថានការណ៍ដែលនៅមិនទាន់ដោះស្រាយបាននៅឡើយនៅក្នុងពិភពលោក អាចជំរុញឱ្យមានអតិផរណាកាន់តែខ្លាំងឡើង។
“ជាឧទាហរណ៍ ការបន្ទុចបង្អាក់ខ្សែសង្វាក់ផ្គត់ផ្គង់ដែលកើតឡើងភ្លាមៗទៀត ឬបញ្ហានៃលទ្ធភាពក្នុងការផ្គត់ផ្គង់ ឬការចែកចាយប្រេងឥន្ធនៈជាដើម អាចជំរុញឱ្យមានការដំឡើងអត្រាការប្រាក់ទៀត ដែលជាហេតុនាំឱ្យមានការលំបាកក្នុងការគ្រប់គ្រងស្ថានការណ៍។”
យោងតាមរបាយការណ៍ដដែល អតិផរណាពិភពលោកក្នុងឆ្នាំ ២០២២ មានកម្រិត ៨,១% និងបានធ្លាក់ចុះមកត្រឹម ៥,៧% ក្នុងឆ្នាំ ២០២៣ ហើយត្រូវបានគេព្យាករថានឹងបន្តធ្លាក់ចុះបន្ថែមទៀតដល់កម្រិត ៣,៩% នៅក្នុងឆ្នាំ ២០២៣ ដដែលនោះ។ ក៏ប៉ុន្តែ នៅក្នុងចំណោមប្រហែលមួយភាគបួននៃប្រទេសកំពុងអភិវឌ្ឍន៍ទាំងអស់លើពិភពលោក កម្រិតអតិផរណាប្រចាំឆ្នាំត្រូវបានគេព្យាករថានឹងលើសពី ១០% នៅឆ្នាំថ្មីនេះ៕
- Video Advertisement -
English 
ខ្មែរ 
