ក្រសួងការងារប្រកាសថា៖ កម្ពុជាមានឱកាសការងារនៅទូទាំងប្រទេសជិត ២០ម៉ឺនកន្លែង, ស្របពេលពលករទើបត្រឡប់មកពីថៃ

• Sommana Yan
• 13 ខែ​សីហា 2025
• Uncategorized @km
• 401 មើល

ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសកថា បច្ចុប្បន្ននៅទូទាំងប្រទេសកម្ពុជាមានតម្រូវការការងាររហូតដល់ទៅ រាប់សែនកន្លែងដែលនេះគឺជាឱកាសដ៏ល្អបំផុតសម្រាប់បងប្អូនប្រជាពលរដ្ឋដែលកំពុងវិលត្រឡ​ប់មកពីប្រទេសថៃ ចូលមកមាតុប្រទេសវិញ។

នេះបើយោងតាមទិន្នន័យចុះផ្សាយលើហ្វេសប៊ុក របស់សម្តេចនាយករដ្ឋមន្រ្តី ហ៊ុន ម៉ាណែត នៅថ្ងៃទី៩ ខែសីហា ឆ្នាំ២០២៥។

សម្តេចនាយករដ្ឋមន្រ្តីបានលើឡើងថា បច្ចុប្បន្នកម្ពុជាឱកាសការងារចំនួន ១៨៩.៤៩៣ កន្លែង នៅតាមបណ្ដាសហគ្រាស រោងចក្រ គ្រឹះស្ថាននានា នៅទូទាំង២៥​ រាជធានី-ខេត្តកំពុងរង់ចាំបងប្អូនពលករខ្មែរដែលទើបវិលត្រឡប់មកពីប្រទេសថៃ ដើម្បីដាក់ពាក្យចូលធ្វើការងារ ជាមួយនឹងប្រាក់ខែសមរម្យ ។

ទន្ទឹមគ្នានេះ សម្តេចបន្តថា រាជរដ្ឋាភិបាលកម្ពុជា​ បាននិងកំពុងខិតខំស្វែងរកការងារ ជូនបងប្អូនឱ្យអស់ពីលទ្ធភាព ដើម្បីឱ្យបងប្អូនអាចទទួលបានការងារសម្រាប់កសាងជីវភាពប្រចាំថ្ងៃឱ្យកាន់តែល្អប្រសើរ។

គួរបញ្ជាក់ថា ឱកាសការងារជិត២០ម៉ឺនកន្លែងនៅទូទាំង២៥​ រាជធានីរួមមាន៖ ខេត្តកំពង់ស្ពឺ-៤៥.៩៣១, ភ្នំពេញ-៤២.៤៧៨, ស្វាយរៀង-២១.៩២៥, កណ្តាល-១៤.៩៧៨, កំពង់ឆ្នាំង-១៣.០៣០, តាកែវ-១១.៧៥៨, ព្រះសីហនុ-៧.៥២៩, ក្រចេះ-៧.១០៧, រតនគិរី-៦.៨៥១, កោះកុង-៦.០១១, ស្ទឹងត្រែង-២.១៨៨, កំពង់ចាម-២.០៩០, កំពង់ធំ-១.៨៩២, ពោធិ៍សាត់-១.១៤៦, ត្បូងឃ្មុំ-១.០៨១, បន្ទាយមានជ័យ-៨៦៩, ខេត្តកំពត-៦៣២, ខេត្តមណ្ឌលគិរី-

៤៥០, ខេត្តឧត្តរមានជ័យ-៤០៨, ខេត្តព្រះវិហារ-៣២០, ខេត្តសៀមរាប-៣០៦, ខេត្តបាត់ដំបង-២៣៦, ខេត្តព្រៃវែង-

១៤១, ខេត្តប៉ៃលិន-១១៦, និង ខេត្តកែប-២០។

សម្រាប់ព័ត៌មានបន្ថែម បងប្អូនអាចទាក់ទង ទីភ្នាក់ងារជាតិមុខរបរ និងការងារនៃក្រសួងការងារ និងបណ្ដុះបណ្ដាលវិជ្ជាជីវៈ តាមរយៈលេខទូរស័ទ្ទ 1297​ ឬ តាមរយៈតណភ្ជាប់ទីនេះ៕