ក្រសួងដែនដី៖ ធនធានមនុស្សជំនាញក្នុងវិស័យសំណង់ដែលបានចុះបញ្ជី កើនឡើងជាង ៧១%

• Sommana Yan
• 5 ខែ​ឧសភា 2021
• Uncategorized
• 189 មើល

ចំនួនធនធានមនុស្សមានវិជ្ជាជីវៈក្នុងវិស័យសំណង់ ដែលបានទៅចុះបញ្ជីមានការកើនឡើងជាមធ្យមប្រមាណ ៧១,៥% ក្រោយមានវត្តមានច្បាប់សំណង់។ នេះបើយោងតាម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ឯកឧត្តម ជា សុផារ៉ា ។

ឯកឧត្តម ជា សុផារ៉ា បានថ្លែងដូច្នេះ ក្នុងជំនួបអនឡាញជាមួយនឹង ឯកឧត្តម MIKAMI Masahiro ឯកអគ្គរដ្ឋទូតជប៉ុនប្រចាំព្រះរាជាណាចក្រកម្ពុជា កាលថ្ងៃទី៤ ខែឧសភា ឆ្នាំ២០២១។

ឯកឧត្តមបានមានប្រសាសន៍ថា៖ «បច្ចុប្បន្ន កម្ពុជាមានស្ថាបត្យករចុះបញ្ជីសរុប ១ ១៨១នាក់ ខណៈមុនមានច្បាប់សំណង់មានតែ ៨៣៨នាក់ ប៉ុណ្ណោះ។ ចំនួននេះបានកើនដល់ ៣៤៣នាក់ ឬស្មើ៤០,៩% ថែមទៀត»។

ដោយឡែក វិស្វករក្នុងវិស័យសំណង់ដែលចុះបញ្ជីមាននាពេលបច្ចុបន្នមានសរុប ៤ ៦២៣ នាក់។ តែមុនច្បាប់សំណង់មានត្រឹមតែ ២ ២៧៤ នាក់ ប៉ុណ្ណោះ ដែលកើនឡើងប្រមាណ ១០៣,២%។ ទាំង ២ ជំនាញនេះបានកើនឡើងប្រមាណ ៧១,៥%។

ទន្ទឹមគ្នានេះដែរ មន្រ្តីរាជការ អ្នកវិជ្ជាជីវៈ និងក្រុមហ៊ុនឯកជន សរុប ៦៦៨៧នាក់ ក៏បានមកចូលរួមការបណ្តុះបណ្តាលច្បាប់ស្តីពីសំណង់ផងដែរ។ ក្នុងនោះរួមមាន គ្រូបង្គោលនិងមន្រ្តីជំនាញក្រសួង ៥៩០ នាក់ អាជ្ញាធរថ្នាក់ក្រោមជាតិ ១២៦៦ នាក់ អ្នកមានវិជ្ជាជីវៈ ៣៨២៤ នាក់ និងអ្នកមានអាជ្ញាបណ្ណប្រកបវិជ្ជាជីវៈ ១០០៧ នាក់/ក្រុមហ៊ុន។

គួរបញ្ជាក់ដែរថា ច្បាប់សំណង់ ដែលបានដាក់ឱ្យប្រើប្រាស់ជាផ្លូវការ កាលពីថ្ងៃទី ៣ ខែ វិច្ចិកា ឆ្នាំ២០១៩ មានទាំងអស់ ២២ជំពូក និង ១១១មាត្រា។

ចាប់តាំងពីច្បាប់សំណង់ថ្មីត្រូវបានអនុវត្ត វិស័យសំណង់នៅកម្ពុជា ឃើញថាមានរបៀបរៀបរយជាងមុនស្ទើរគ្រប់ផ្នែក។ ជាក់ស្ដែង ចំនួនការដ្ឋានសំណង់ដែលគ្មានលិខិតអនុញ្ញាត ទូទាំងប្រទេសធ្លាក់ចុះជាង ៧,៧% ពីឆ្នាំ២០១៩ មកទល់បច្ចុប្បន្ន។ (អានបន្ថែម)

• បច្ចេកវិទ្យា និងវិស្វកម្ម
• Technology & Engineering