ក្រុមហ៊ុនសិង្ហបុរី សហការជាមួយ WorldBridge Group គ្រោងបង្កើតស្ថានីយចែកចាយហ្គាសតាមគម្រោងលំនៅដ្ឋាននានា

Samphors Sao
17 ខែមីនា 2021
ព័ត៌មានក្នុងស្រុក
230 មើល

ក្រុមហ៊ុនសិង្ហបុរី Union Gas Holdings បានសហការគ្នាជាមួយក្រុមហ៊ុន Worldbridge Industrial Development (WBID) គ្រោងបណ្តាក់ទុនរួមគ្នា បង្កើតស្ថានីយកណ្ដាលសម្រាប់ផ្គត់ផ្គង់ និងចែកចាយហ្គាស នៅតាមគម្រោងលំនៅដ្ឋាន ពាណិជ្ជកម្ម និងឧស្សាហកម្មនានាទូទាំងប្រទេស។

វិធីចុះហត្ថលេខានៃក្រុមហ៊ុនទាំង ២ ត្រូវបានធ្វើឡើង កាលពីថ្ងៃទី ១០ មីនាកន្លងទៅ ដោយឡែក សម្រាប់សកម្មភាពអាជីវកម្ម និងប្រតិបត្តិការផ្គត់ផ្គង់ជាផ្លូវការ គឺគ្រោងនឹងចាប់ផ្ដើមនៅចុងឆ្នាំ ២០២១ នេះ។

បើយោងតាមសារព័ត៌មាន The Edge ក្រមហ៊ុនទាំង ២ គ្រោងបង្កើតជាស្ថានីយផ្គត់ផ្គង់កណ្ដាល ដោយគម្រោងគេហដ្ឋាន ឬអគារពាណិជ្ជកម្មនីមួយៗរបស់ក្រុមហ៊ុន Worldbridge នឹងត្រូវតភ្ជាប់ចូលស្ថានីយនេះ។ ដូច្នេះ លំនៅដ្ឋាននីមួយៗនឹងអាចប្រើប្រាស់ហ្គាស ដូចជាការប្រើប្រាស់សេវាកម្មទឹកភ្លើងដូច្នោះដែរ។

យោងតាមកិច្ចព្រមព្រៀង ក្រុមហ៊ុនសិង្ហបុរី នឹងកាន់កាប់ភាគហ៊ុនចំនួន ៥៥% ដោយនឹងបញ្ជូនបុគ្គលិក ដែលមានបទពិសោធពីប្រទេសសឹង្ហបូរី ដើម្បីជួយបង្ហាត់បង្រៀនបុគ្គលិកក្នុងស្រុកនៅកម្ពុជា។

ដោយឡែក ភាគហ៊ុនចំនួន ៤៥% នឹងត្រូវកាន់កាប់ដោយក្រុមហ៊ុន WorldBridge កម្ពុជា ដោយនឹងដើរតួរជាអ្នកទទួលផ្គត់ផ្គង់ និងបង្កើតបណ្តាញអាជីវកម្មក្នុងស្រុក។