ក្រុមហ៊ុនអឺរ៉ុបសហការគ្នា គ្រោងបង្កើតហេដ្ឋារចនាសម្ព័ន្ធ តាក់ស៊ីហោះលើអាកាសប្រើអគ្គិសនី

• Sommana Yan
• 15 ខែ​វិច្ឆិកា 2021
• Uncategorized
• 139 មើល

ក្រុមហ៊ុនមួយក្រុមនៃប្រទេសអ៊ីតាលី និងបារាំង បានបង្កើតក្រុមហ៊ុនរួមមួយឈ្មោះថា Urban Blue ដើម្បីសិក្សា និងបង្កើតគម្រោងតាក់ស៊ីហោះលើអាកាសដោយប្រើថាមពលអគ្គិសនី សម្រាប់ផ្ដល់សេវាដឹកជញ្ជូនអ្នកដំណើរពីព្រលានយន្តហោះចូលក្នុងក្រុង ដោយមិនចាំបាច់ស្ទះចរាចរណ៍។ នេះបើយោងតាម GCR ។

ក្រុមហ៊ុននេះ ត្រូវបង្កើតដោយក្រុមហ៊ុនព្រលានយន្តហោះនៅទីក្រុង Rome, Venice, Bologna និង Nice។ គោលបំណងដំបូងគឺដើម្បីសិក្សាពីលទ្ធភាពប្រតិបត្តិការនៃបណ្តាញ ក៏ដូចជាវិភាគពីបញ្ហាបច្ចេកទេស និងហិរញ្ញវត្ថុជាដើម។

តាក់ស៊ីហោះលើអាកាស ឬ vertical take-off and landing (VTOL) vehicles នេះ គឺស្រដៀងគ្នានឹងឧទ្ធម្ភាគចក្រដូច្នោះដែរ តែប្រើអគ្គិសនី និងមានខ្នាតតូចជាង។ ចំណុចល្អ គឺវាអាចហោះត្រង់ឡើងលើបានភ្លាម ដោយមិនចាំបាច់មានទីលានធំដូចយន្តហោះទេ ហើយដោយសារមានទំហំតូច វាគឺងាយស្រួលចតជាងឧទ្ធម្ភាគចក្រ។

ក្រុមហ៊ុន Urban Blue សង្ឃឹមថាខ្លួននឹងក្លាយជាក្រុមហ៊ុនធំជាងគេតែមួយគត់ ដែលធ្វើអាជីវកម្មនេះនៅអឺរ៉ុប។

គួរបញ្ជាក់ថា តាមផែនការ ទីក្រុង Rome និង Paris គ្រោងនឹងចាប់ផ្តើមផ្តល់សេវាតាក់ស៊ីហោះនេះ នៅឆ្នាំ ២០២៤ ខណៈប្រទេសអ៊ីតាលីទាំងមូល ត្រៀមផ្ដល់សេវាទ្រង់ទ្រាយធំនៅឆ្នាំ ២០៣០។

• បច្ចេកវិទ្យា និងវិស្វកម្ម
• អាកាសយាន្តដ្ឋាន និងអាកាសចរណ៍
• Technology & Engineering
• Airport and Aviation