ក្រុមហ៊ុន Mizuda គ្រោងបំប្លែងសំរាមនៅរាជធានីភ្នំពេញទៅជាថាមពលអគ្គិសនី

• Sommana Yan
• 30 ខែ​មករា 2024
• ព័ត៌មានក្នុងស្រុក
• 174 មើល

ក្រុមហ៊ុន Mizuda Sanitation (Cambodia) Co., Ltd. មានបំណងពង្រីកការវិនិយោគលើការផលិតថាមពលអគ្គិសនីពីចេញពីសំណល់សំរាម ខណៈបច្ចុប្បន្នក្រុមហ៊ុននេះជាប្រតិបត្តិករប្រមូលសំរាមអស់រយៈពេល ០៣ឆ្នាំហើយនៅរាជធានីភ្នំពេញ។

នេះបើតាមការបង្ហាញឱ្យដឹងរបស់លោក សាន ជានមីង (Shan Jianming) ប្រធានក្រុមហ៊ុន Mizuda Group ក្នុងជំនួបជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី កាលពីថ្ងៃទី២៩ ខែមករា ឆ្នាំ២០២៤។

ក្នុងជំនួបនេះ លោកប្រធានក្រុមហ៊ុន Mizuda Group បាន​ឱ្យដឹងថា ក្រុមហ៊ុន Mizuda Sanitation (Cambodia) Co., Ltd. ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Mizuda Group កំពុងផ្តល់សេវាបោសសម្អាត ប្រមូល និងដឹកជញ្ជូនសំរាម និង សំណល់រឹង នៅរាជធានីភ្នំពេញ អស់រយៈពេលប្រមាណ ៣ឆ្នាំមកហើយ។

លោកបានបន្តថា ក្រុមហ៊ុនបានផ្តល់សេវាផ្សព្វផ្សាយកម្មវិធីការយល់ដឹងស្តីពីការគ្រប់គ្រងសំរាម និងសំណល់រឹង ក្នុងភូមិសាស្រ្តមួយចំនួននៅរាជធានីភ្នំពេញ និងបានបង្កើតការងារដល់ប្រជាជនកម្ពុជាចំនួន ៧១០កន្លែងផងដែរ។

ទន្ទឹមនឹងនេះ ក្រុមហ៊ុន​ ក៏បានបង្ហាញពីគោលបំណងក្នុងការពង្រីកការវិនិយោគរបស់ខ្លួននៅក្នុងការផលិតថាមពលអគ្គិសនីពីសំណល់ទាំងអស់នេះ ជាមួយនឹងបច្ចេកវិទ្យាចុងក្រោយ បច្ចេកទេសទំនើប និងការការពារបរិស្ថានកម្រិតខ្ពស់ នៅក្នុងរាជធានីភ្នំពេញផងដែរ។

ជាឆ្លើយតបវិញនោះ សម្តេចបវរធិបតី បានណែនាំឱ្យក្រុមហ៊ុនពិភាក្សាបន្ថែមជាមួយនឹងក្រសួង-ស្ថាប័នពាក់ព័ន្ធ ជាពិសេស ក្រសួងរ៉ែ និងថាមពល និងក្រសួងបរិស្ថាន ក្រោមកិច្ចសម្របសម្រួលរបស់ក្រុមប្រឹក្សាអភិវឌ្ឍន៍កម្ពុជា (CDC)។

ជាចុងក្រោយ សម្តេចបានវាយតម្លៃខ្ពស់ចំពោះកិច្ចសហការរវាងក្រុមហ៊ុននេះ ជាមួយនឹងរដ្ឋបាលរាជធានីភ្នំពេញ ដែលបានរួមចំណែ​កនៅក្នុងការលើកកម្ពស់សុខុមាលភាពរបស់ប្រជាពលរដ្ឋ ក៏ដូចជាការចូលរួមចំណែកនៅក្នុងការថែរក្សាបរិស្ថាន​ ក្នុងភូមិសាស្រ្តនៃរាជធានីភ្នំពេញ។

• Energy and Environment