ក្រុមហ៊ុន PPSP សម្រេចទិញផ្ដាច់ក្រុមហ៊ុនសំណង់ក្នុងស្រុកធំមួយ ដើម្បីពង្រីកមហិច្ឆតាអាជីវកម្មរបស់ខ្លួន

• Me Wathana
• 24 ខែ​មីនា 2021
• Uncategorized
• 129 មើល

ក្រុមហ៊ុន PPSP ដែលជាក្រុមហ៊ុនគ្រប់គ្រងតំបន់សេដ្ឋកិច្ចពិសេសភ្នំពេញ សម្រេចទិញផ្ដាច់ក្រុមហ៊ុនសំណង់ក្នុងស្រុកមួយឈ្មោះថា Sahas E & C Co., Ltd. ក្នុងតម្លៃជាង ១,១ លានដុល្លារអាមេរិក ក្នុងគោលបំណងដើម្បីពង្រីកមហិច្ឆតាអាជីវកម្មរបស់ខ្លួននៅកម្ពុជា ក្រោយទទួលបានការអនុញ្ញាតពីគណៈកម្មការមូលត្រកម្ពុជា។

បើយោងតាមសេចក្ដីប្រកាសរបស់ក្រុមហ៊ុនកាលពីថ្ងៃទី ២២ មីនា កន្លងមកនេះ PPSP មានភាគហ៊ុន ៦០% រួចមកហើយក្នុងក្រុមហ៊ុន Sahas E & C Co., Ltd. ដូច្នេះការទិញនេះ គឺជាការទិញផ្ដាច់ភាគហ៊ុន ៤០% ទៀតពីម្ចាស់ដើម (LCH Investment Group)។

ដោយឡែកតម្លៃលក់ភាគហ៊ុន ៤០% នេះ គឺប្រមាណ ១,១ លានដុល្លារអាមេរិក ដោយបានទូទាត់រួចហើយ ៥ សែនដុល្លារ ក្នុងអំឡុងព្រមព្រៀងទិញលក់កាលពីថ្ងៃទី ១៨ ខែមីនា ហើយនឹងទូទាត់ទឹកលុយដែលនៅសល់មុនថ្ងៃទី ១៤ ខែមេសា។

ប្រភពដដែលបានឱ្យដឹងថា ក្រុមហ៊ុន Sahas E & C Co., Ltd. គឺក្រុមហ៊ុនសំណង់ដែលមានប្រាក់ចំណូលខ្ពស់ និងទទួលការងារពាក់ព័ន្ធជាច្រើនដូចជា ការងារវិស្វកម្ម ការរចនាប្លង់ ការសិក្សាលទ្ធកម្ម ការគ្រប់គ្រង និងថែទាំគម្រោងសាងសង់នានាជាដើម។​

ដូច្នេះ ក្រោយវិភាគដ៏ហ្មត់ចត់ហើយ ការទិញផ្ដាច់នេះ នឹងជួយពង្រីកអាជីវកម្មរបស់ PPSP ទាំងក្នុងរយៈពេលខ្លី និងរយៈពេលវែង។

គួរបញ្ជាក់ផងដែរថា ក្រុមហ៊ុន PPSP គឺជាក្រុមហ៊ុនគ្រប់គ្រងតំបន់សេដ្ឋកិច្ចពិសេសភ្នំពេញ ដែលលាតសន្ធឹងលើដីទំហំជាង ៣៥៧ ហិកតា។ ក្រុមហ៊ុន PPSP ក៏ជាអ្នកមើលការខុសត្រូវ ក្រុមហ៊ុនអន្តរជាតិចំនួន ៨០ មកពី ១៥ ប្រទេសផ្សេងទៀតផងដែរ។