ក្រុមហ៊ុន Royal Railway អនុញ្ញាតឱ្យក្រុមហ៊ុនបីធ្វើការអភិវឌ្ឍថាមពលកកើតឡើងវិញ លើដីតាមបណ្កោយផ្លូវរថភ្លើង

3 ខែឧសភា 2023
ព័ត៌មានក្នុងស្រុក
8 មើល

Royal Railway Cambodia PLC ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនពហុផលិតផល Royal Group បានអនុញ្ញាតឱ្យក្រុមហ៊ុនចំនួន៣ ប្រើប្រាស់ដីតាមបណ្តោយផ្លូវរថភ្លើង សម្រាប់គម្រោង អភិវឌ្ឍន៍ថាមពលកកើតឡើងវិញ និងសកម្មភាពសេដ្ឋកិច្ចប្រកបដោយនិរន្តរភាពផ្សេងទៀត។

ក្រុមហ៊ុន Royal Group បានចុះអនុស្សរណៈយោគយល់គ្នា (MoU) កាលពីថ្ងៃទី២៨ ខែមេសាកន្លងទៅ ជាមួយនឹងក្រុមហ៊ុន Samaiden Energy (Cambodia)Co., Ltd ក្រុមហ៊ុន Management Venture Asia (Cambodia) Ltd. និងក្រុមហ៊ុន Panna Energy Sdn. Bhd។

នៅក្រោម អនុស្សារណនេះ ក្រុមហ៊ុនទាំងបី នឹងធ្វើការសិក្សាបឋមអំពីលទ្ធភាពនៃការអភិវឌ្ឍដីដែលមិនទាន់ប្រើប្រាស់តាមបណ្ដោយផ្លូវរថភ្លើងពីក្រុងប៉ោយប៉ែតទៅខេត្តព្រះសីហនុ សម្រាប់ការដំឡើងសូឡាខ្នាតតូច ឧបករណ៍ប្រើប្រាស់ ហេដ្ឋារចនាសម្ព័ន្ធសម្រាប់ជួល និងសកម្មភាពសេដ្ឋកិច្ចប្រកបដោយនិរន្តរភាពផ្សេងៗទៀត។

ក្រុមហ៊ុន Royal Group លើកឡើងថា គម្រោងនេះមានសក្តានុពលខ្លាំងលើវិស័យថាមពលកកើតឡើងវិញ និងកសិកម្ម ដែលវាជាឱកាសដ៏ល្អក្នុងការប្រើប្រាស់ដីនោះសម្រាប់គម្រោងអភិវឌ្ឍន៍ដូចជាថាមពលកកើតឡើងវិញ និងកសិកម្ម។

ក្រុមហ៊ុន Samaiden Energy លើកឡើងដែរថា តាមរយៈការចុះ MoU នេះ ក្រុមហ៊ុន ជឿជាក់ថាវាអាចត្រួសត្រាយផ្លូវសម្រាប់កិច្ចសហការដ៏មានសក្តានុពលនាពេលអនាគត ដែលចុងក្រោយនឹងជំរុញការអភិវឌ្ឍន៍ថាមពលបៃតងនៅកម្ពុជា។

បច្ចុប្បន្ន កម្ពុជា មានខ្សែរថភ្លើងចំនួនពីរខ្សែ ដោយខ្សែរថភ្លើងភាគខាងជើងមានប្រវែង ៣៨៦ គីឡូម៉ែត្រចេញពីភ្នំពេញទៅក្រុងប៉ោយប៉ែត (ព្រំដែនកម្ពុជា-ថៃ) ត្រូវបានកសាងឡើងចន្លោះពីឆ្នាំ ១៩២៩ ដល់ឆ្នាំ ១៩៤២ ចំណែកផ្លូវរថភ្លើងភាគខាងត្បូងសាងសង់ពីឆ្នាំ ១៩៦០-១៩៦៩ មានប្រវែង ២៦៤ គីឡូម៉ែត្រ៕

- Video Advertisement -